كينوتەاتردان «گۋدباي, موي باي!» دەگەن قازاق كينوگەرلەرىنىڭ تۋىندىسىن كورىپ قايتتىق. كينودا ەپتەگەن ەزۋ تارتار تۇستارى بولماسا, اناۋ ايتقان شەدەۆر دەگەنگە كەلمەيدى. بۇگىنگى كورەرمەندەردىڭ پسيحولوگياسىن مەڭگەرىپ الىپ, تازا سولاردىڭ سۇرانىسىنا ساي فيلم جاساپ شىققان. ءبىر سوزبەن ايتقاندا رەجيسسەر كورەرمەندەردىڭ جەتەگىندە كەتكەن.
ال كوركەم تۋىندى كىتاپ بولسا – وقىرمانىن, كينو بولسا – كورەرمەنىن سوڭىنان تارتۋى ءتيىس ەدى. ەكىنشى, كادىمگى شالا قازاقتارعا ارنالعان. ءبىر ءسوزى قازاقشا, ەكى-ءۇش سويلەمى ورىسشا. «بالام», «اينالايىن» دەگەن سياقتى سوزدەردى قازاقشا ايتىپ قويادى. دۇبارالارعا لايىق دۇرەگەي فيلم. اتىنىڭ ءوزى ءۇش ۇلتتىڭ سوزىنەن تۇرادى: «گۋدباي» – اعىلشىن, «موي» – ورىس, «باي» – قازاقشا. ءتىپتى, كەيدە, كوشەنىڭ تىلىنە ءتۇسىپ كەتەتىن تۇستارى بار. كۇيەۋىنەن اجىراسىپ جاتقان ايەلدەر, ايەلىنەن ايىرىلىپ جاتقان ەرلەر… ەپتەگەن وي ايتپاقشى بولادى, ونىسى – بۇلىڭعىر. سوڭى «كود دا ءۆينچيدىڭ» كورىنىسىن سايقىمازاق تۇردە قايتالاعان – پلاگيات.
ءبىزدىڭ كينوگەرلەر تىم قۇرىماعاندا وزبەك پەن قىرعىزدار سياقتى دەڭگەيدە قاشان كوركەم فيلم تۇسىرەدى ەكەن دەگەن ويدا قايتتىق. توق ەتەرى, ارنايى ەففەكتىلەرى, تەحنيكا مەن تەحنولوگيالارى دامىعانىمەن, تولىققاندى كورەرمەندى تۇشىندىراتىن ورەلەرى دامىماعان.
وسىنداي ونەر تۋىندىلارىنىڭ سالدارىنان كورەرمەن تالعامى دا قۇنسىزدانا بەرەتىنىنە قارنىن اشادى. ۇلتتىق ناقىشتان الشاق كورىنىستەر ءوزى ءدۇبارا بولعان قالالىق جاستاردىڭ «ە-ە, بىزدىكى دۇرىس ەكەن عوي» دەگەن ويىن بەكىتىپ, ودان سايىن ەتنوستىق مادەنيەت پەن ولشەمنەن جۇرداي ەتە بەرەدى. ءبىز تەكتىلىك كودىن ساقتاعان ءبىرتۇتاس ۇلت قالىپتاستىرۋ جولىندامىز. بۇل تۇرعىدا ستسەناريست, رەجيسسەرلەر ويلانبايتىن بولسا كەرەك. وسى تۋىندىدان اڭعارىلىپ تۇرعانىنداي, ولاردىڭ ويلايتىنى – كاسسادان نەعۇرلىم مول اقشا جينايتىن كوممەرتسيالىق مۇددە. سوندىقتان ارزان ومىرگە ءاتۇستى قارايتىن تيپتەردى كورەرمەن نازارىنا ۇسىنادى.
بايقاساق, وسىنداي فيلمدەر كوبەيىپ بارادى… نەگە؟
ادىلبەك ىبىرايىمۇلى
