دۇنيە تەاترلارى – ەسىل جاعاسىندا

جەكسەنبى كۇنى «قازاقستان» ورتالىق كونتسەرت زالىندا ەلوردانىڭ 20 جىلدىعى اياسىندا «استانا» ءىى دۇنيەجۇزىلىك تەاتر فەستيۆالىنىڭ شىمىلدىعى ءتۇرىلدى. فەستيۆال قازاقستاننىڭ ەڭبەك ەرى, كسرو حالىق ءارتىسى, مەملەكەتتىك سىيلىقتىڭ لاۋرەاتى ءاسانالى ءاشىموۆ باستاعان قازاقستاندىق ارتىستەر مەن ەۋروپا مەن ازيادان كەلگەن قوناقتاردىڭ قىزىل كىلەممەن ءجۇرىپ ءوتۋ سالتاناتىمەن اشىلدى.

– استانانىڭ 20 جىلدىعى اياسىندا ءوتىپ جاتقان وسى جىل تەاتر قاۋىمىنا ۇلكەن مەيرام, حالىققا قۋانىش سىيلاپ وتىر. بيىل ەلوردا مەرەكەسى شەڭبەرىندە 5 تەاتر فەستيۆالى, 2 كينوفەستيۆال ۇيىمداستىرىلادى. مۇنى ونەر تويى دەپ ەسەپتەۋگە بولادى. بۇل وركەندى ەلىمىز باسشىلارىنىڭ بىزگە جاساعان ۇلى قامقورلىعى دەپ بىلەم. مۇحتار اۋەزوۆتىڭ «ونەرسىز ەل – ەل ەمەس» دەپ ايتقانى بار. ونەردى قۇرمەتتەگەن ادام – باقىتتى ادام» دەدى فەستيۆالدىڭ اشىلۋ سالتاناتىندا ءاسانالى ءاشىموۆ. قر مادەنيەت جانە سپورت مينيسترلىگى, قازاقستان تەاترلارى اسسوتسياتسياسى, «قازاقكونتسەرت» مەملەكەتتىك كونتسەرتتىك ۇيىمى ەكىنشى جىل قاتارىنان ۇيىمداستىرىپ وتىرعان فەستيۆالگە 12 مەملەكەتتىڭ تەاترلارى قاتىسىپ جاتىر. قازاقستاننان م.اۋەزوۆ اتىنداعى قازاق مەملەكەتتىك اكادەميالىق دراما تەاترى, ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى جانە ع.مۇسىرەپوۆ اتىنداعى بالالار مەن جاسوسپىرىمدەرگە ارنالعان مەملەكەتتىك اكادەميالىق تەاترى, «استانا ميۋزيكل» تەاترى قويىلىمدارىن ۇسىنادى. وسىلارمەن قاتار «Piccolo di Milano» تەاترى (يتاليا), «1927» تەاترى (ۇلىبريتانيا), «Meno Fortas» (ليتۆا), «Warszawa» (پولشا), تاۋەلسىز ينتەرناتسيونالدى «11» تەاترى (گەرمانيا), ش.رۋستاۆەلي اتىنداعى گرۋزيا مەملەكەتتىك اكادەميالىق تەاترى (گرۋزيا), بەيجىڭ حالىقتىق كوركەم تەاترى (قىتاي), وزبەك ۇلتتىق اكادەميالىق دراما تەاترى (وزبەكستان), لەنسوۆەت اتىنداعى سانكت-پەتەربۋرگ اكادەميالىق تەاترى, ماسكەۋ گۋبەرنيالىق تەاترى (رەسەي), ش.تەرميچيكوۆ اتىنداعى شۋ وبلىستىق تەاترى (قىرعىزستان) قاتىسۋدا. «استانا ميۋزيكل» تەاترىنىڭ «قىز جىبەك» ەتنو-فولكلورلىق ميۋزيكلىن كورەرمەندەر تاماشالاپ ۇلگەردى. ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى كەشە جۋىردا پرەمەراسى وتكەن ۋ.شەكسپيردىڭ «وتەللو» تراگەدياسىن ۇسىندى. م.اۋەزوۆ اتىنداعى قازاق مەملەكەتتىك اكادەميالىق دراما تەاترى عاريفوللا ەسىمنىڭ «تاڭسۇلۋ» سپەكتاكلىن, ع.مۇسىرەپوۆ اتىنداعى بالالار مەن جاسوسپىرىمدەرگە ارنالعان مەملەكەتتىك اكادەميالىق تەاترى گ. حۋگاەۆتىڭ قويىلىمىن كورسەتەدى. فەستيۆال, جالپى, 28 ماۋسىمعا دەيىن جالعاسادى. سونىڭ اياسىندا دراما, تراگەديا, كومەديا سىندى ءار الۋان جانرداعى سپەكتاكلدەردى تاماشالاۋعا بولادى.

قويىلىمدار قالا تەاترلارى مەن «ەكسپو» قالاشىعىنداعى ەنەرگيا-حولدا, بەيبىتشىلىك جانە كەلىسىم سارايىندا كورسەتىلەدى. قازىلار القاسىنا بەلگىلى تەاتر ماماندارى ءاسانالى ءاشىموۆ (قازاقستان), يوناس ۆايتكۋس (ليتۆا), داۆيد اساتياني (فرانتسيا), بەاتريس پيكون-ۆاللەن (فرانتسيا), داۆيد پاپاۆا (ۇلىبريتانيا) شاقىرىلدى. فەستيۆالدىڭ باستى قوناعى – وسكار سىيلىعىنىڭ يەگەرى, دۇنيە جۇزىنە بەلگىلى كينو جانە تەاتر اكتريساسى جيۋلەت بينوش. ول استانادا شەبەرلىك ساباقتارى مەن شىعارماشىلىق كەشىن وتكىزەدى.