استاناداعى مۋزىكالىق جاس كورەرمەن تەاترىنىڭ اكتەرلەرى عانا ەمەس, قويىلىمداردىڭ اۋەنى مەن اكتەرلەر داۋسىنىڭ دۇرىس شىعۋىن, ساحنا اكۋستيكاسىن رەتتەيتىن دىبىس رەجيسسەرى دە – جاس مامان. ءۇش جىل بۇرىن وسى تەاترعا كەلگەن سابينا ءىلياسوۆا – بالا كەزدەن انگە جاقىن, بىرنەشە باعىتتا كاسىبي مۋزىكالىق ءبىلىم العان ارۋ.
ەلوردانىڭ وزىندە دۇنيەگە كەلگەن سابينانىڭ ونەرگە قۇشتارلىعىن بايقاعان اتا-اناسى ونى مۋزىكا مەكتەبىنىڭ فورتەپيانو كلاسىنا وقۋعا بەرەدى. ودان ءارى مۋزىكالىق جوعارى ءبىلىمىن حورمەيستەر, دىبىس رەجيسسەرى ماماندىقتارى بويىنشا جالعاستىرعان ول وقىپ ءجۇرىپ, «استانا» كونتسەرت زالىندا دىبىس جازۋ ستۋدياسىندا ەڭبەك جولىن باستايدى. تاجىريبەسىن ارتتىرا بەرۋدى كوزدەگەن سابينا جەكەمەنشىك «Aevent» كومپانياسىندا ەڭبەك ەتىپ, شاعىن كونفەرەنتسيالاردان باستاپ, پرەزيدەنت قاتىساتىن ماڭىزدى جيىندارعا دەيىن دىبىس جونىندەگى مامان بولادى. اقىرى 2021 جىلى قازىرگى سۇيىكتى ونەر ۇجىمىنا كەلىپ, بۇرىنعىدان ءسال باسقاشالاۋ باعىتتا, ياعني تەاتر دەگەن ونەر الەمىندە جۇمىسىن باستايدى.
– تەاترداعى دىبىستى رەتتەۋدىڭ وزىندىك ەرەكشەلىكتەرى بولسا دا, بۇل تەاتردىڭ مۋزىكالىق دەگەن مارتەبەسىنىڭ بولۋى مەنىڭ جانىما جاقتى. قىزمەتىمدى تەز مەڭگەرىپ, ۇجىمعا ءسىڭىسىپ كەتكەندىكتەن مەن ءالى دە وسىندامىن. دىبىس رەجيسسەرى رەتىندەگى باستى مىندەتتەرىم – قويۋشى رەجيسسەردىڭ شىعارماشىلىق ويىنىنىڭ نەگىزىندە قويىلىمنىڭ مۋزىكالىق, شۋ جانە دىبىس تەحنيكالىق بەزەندىرىلۋىن ۇيىمداستىرۋ. مەنىڭ تەاترداعى جۇمىس كۇنىم ءوزىم قولداناتىن اپپاراتۋرانى, ياعني ميكروفونداردى تەكسەرىپ قاراۋدان باستالادى, سوسىن شىعارماشىلىق پروتسەسس باستالىپ كەتەدى. ەگەر جاڭا سپەكتاكل بولسا رەجيسسەرمەن بىرگە ونى مۋزىكالىق جاعىنان ارلەۋ ماسەلەسىن تالقىلايمىز. ال قويىلىم كەزەكتى رەت ساحنالار بولسا دايىندىق جۇمىستارىن جۇرگىزەمىز. مەنىڭ جۇمىسىمنىڭ ءبىر ارتىقشىلىعى – شىعارماشىلىق پەن تەحنولوگيانىڭ ءبىر ارنادا توعىسۋى. ماعان جۇمىسىم سونىسىمەن ۇنايدى, – دەيدى سابينا اسىلحانقىزى.
بۇگىندە دىبىس رەجيسسەرى ماماندىعى قازاقستاندا ەكى وقۋ ورنىندا وقىتىلادى. مۇنداي مامانداردى وقىتۋدىڭ ەكى باعىتى بار: ءبىرى – كينو جانە تەلەۆيدەنيە رەجيسسۋراسى مەن مۋزىكالىق دىبىس رەجيسسەرى.
– دىبىس رەجيسسەرىنىڭ مۋزىكالىق ەستۋ قابىلەتى مەن دىبىستارعا سەزىمتالدىعى مىقتى بولۋى اسا ماڭىزدى. وسى رەتتە مەنىڭ العاشقى العان حورمەيستەر ماماندىعىم قازىرگى جۇمىسىمدا كوپ كومەگىن تيگىزدى. ودان بولەك تەحنيكالىق جاقتارىن دا مەڭگەرۋ كەرەك, ءتۇرلى قۇرال-جابدىقتاردىڭ جۇمىسىنان حاباردار بولۋىڭ قاجەت. دىبىس رەجيسسەرى قىزمەتى قويىلىم ءۇشىن ۇلكەن ءرول وينايدى, دىبىستىق ارلەنۋى دۇرىس بولماسا, مۇنى كورەرمەن بىردەن سەزىپ قويادى, سوندىقتان ءبىز ۇنەمى ىزدەنىستە بولامىز, – دەيدى جاس مامان.
مۋزىكالىق جاس كورەرمەن تەاترىنداعى 20-دان استام قويىلىمدى اۋەنمەن ارلەۋدە سابينانىڭ قولتاڭباسى بار. ونىڭ مىندەتتەرى قويىلىمنىڭ «جاندى داۋىستا» نەمەسە اندەردى «جازىپ الۋ» ارقىلى وتۋىنە قاراي وزگەرىپ وتىرادى. ءبىرىنشى جاعدايدا مۋزىكالىق شىعارمالار وركەستر, حالىقتىق انسامبل نەمەسە ەسترادالىق بەند قاتىسۋىمەن سول مەزەتتە ورىندالادى. بۇل رەتتە جابدىقتاردىڭ تولىق جانە دۇرىس قوسىلۋى قاتتى قاداعالانادى. ال ەكىنشى جاعدايدا اكتەرلەردىڭ رەپليكاسىنىڭ دۇرىس كەلۋىن, مۋزىكالىق-شۋ تەڭگەرىمىنىڭ سايكەستىگىن باقىلاپ وتىرۋى كەرەك.
سابينانىڭ ەندىگى ارمانى – شەتەلدىك جەتەكشى دىبىس رەجيسسەرلەرىنەن ءبىلىم الىپ, بىلىكتىلىگىن ارتتىرۋ. بولاشاقتا جەكە پروداكشن ستۋدياسىن اشۋى دا مۇمكىن. ونىڭ ايتۋىنشا, قازىر مۋزىكا, جالپى دىبىس جازۋ سالاسىنا دا جاساندى ينتەللەكت دەندەپ ەنىپ كەلەدى, تەاتر شوۋلارىنا دا سول قولدانىلا باستادى. «ءاربىر سالا مامانى زامانعا ساي بەيىمدەلىپ, ءبىلىمىن ۇنەمى تەرەڭدەتىپ وتىرۋى كەرەك» دەيدى كەيىپكەرىمىز.
