استاناداعى 63 مەملەكەتتىك مەكەمە «ە-قىزمەت» اقپاراتتىق جۇيەسىن پايدالانۋدا. بۇل تۋرالى كەشە اتالمىش قىزمەتتى قولدانىسقا ەندىرۋ جونىندە ەسىل اۋدانى اكىمىنىڭ اپپاراتىندا وتكەن سەمينار-كەڭەستە قر مەملەكەتتىك قىزمەت ىستەرى مينيسترلىگىنىڭ استانا قالاسى بويىنشا دەپارتامەنت باسشىسى تىلەگەن قاسكين مالىمدەدى.
الايدا قاعازباستىلىقتى جويىپ, مەملەكەتتىك پەرسونالدى وڭتايلى باسقارۋعا نەگىزدەلگەن جوبانى تولىققاندى جۇزەگە اسىرۋدا بىرقاتار قيىندىقتار كەدەرگى كەلتىرەتىنى بەلگىلى بولدى. سەمينار بارىسىندا ەلوردالىق كادر قىزمەتكەرلەرى «ە-قىزمەت» جۇيەسىندەگى قاتەلەر مەن وڭدەۋدى تالاپ ەتەتىن ماسەلەلەردى قوزعادى. ماسەلەن, ءىسساپار, ەڭبەك جانە دەكرەتتىك دەمالىس سەكىلدى ءتۇرلى بۇيرىقتاردى جۇيەگە كوشىرۋ ءۇشىن ۇزاق ۋاقىت كەتەدى, كەيدە اقپاراتتىق جۇيەدە اقاۋلار شىعىپ, قىزمەتكەردىڭ ەلەكتروندى نۇسقاعا كوشىرگەن جەكە قۇجاتتارى ساقتالماي, قايتا ەنگىزۋگە تۋرا كەلەدى دەدى جينالعاندار. سونداي-اق, جەدەل سۇراقتار بويىنشا «ە-قىزمەت» وپەراتورلارىمەن بايلانىسقا شىعۋ مۇمكىندىگى سىنالدى. ورفوگرافيالىق قاتەلەردى جوندەۋگە ءوتىنىش ءبىلدىرىلدى. «ە-قىزمەت» تەحنيكالىق قولداۋ ءبولىمىنىڭ باستىعى عاني زياشەۆتىڭ ايتۋىنشا, اقپاراتتاردىڭ جۇيەگە ۇزاق جۇكتەلۋىنە بىرنەشە فاكتورلار اسەر ەتەدى. «ماسەلەن, بايلانىستىڭ ءجيى ءۇزىلۋ سەبەبى – مەملەكەتتىك ورگانداردىڭ بىرىڭعاي كولىك جەلىسىنىڭ السىزدىگىنەن بولۋى ىقتيمال. بۇگىندە «Kazsatnet» ۇلتتىق كومپانياسى» اكتسيونەرلىك قوعامىمەن بىرلەسىپ, بۇل ماسەلەلەردىڭ تۇپكى سەبەپتەرىن زەرتتەۋدەمىز. مەملەكەتتىك ورگانداردىڭ بىرىڭعاي كولىك جەلىسى جىلدامدىعىن ەسكەرە وتىرىپ, بايلانىس جەلىلەرىن كەڭەيتۋ جۇمىستارىن قاراستىرىپ جاتىرمىز» دەدى ول. جيىن سوڭىندا اتالعان تۇسىنىسپەۋشىلىكتەرگە بايلانىستى ءاربىر مەكەمەگە جاقىن ارادا «ە-قىزمەت» جۇيەسىنىڭ ماماندارى كەلىپ, باعدارلامانىڭ قىر-سىرىن ۇيرەتەتىن بولىپ ۇيعارىلدى.
م. جاقىپ, astana-akshamy.kz
