«ونەردە شەكارا جوق» دەيمىز. بۇل ءسوزدىڭ بەكەردەن-بەكەر ايتىلمايتىنىن بىزبەن قوشتاسقالى تۇرعان جىل تاعى دالەلدەدى. كەشەگى ەدىل پاتشا (اتتيلا) بابامىز ەۋروپانى قارۋمەن جاۋلاسا, بۇگىنگى ونىڭ ۇرپاقتارى ونەرمەن باعىندىرىپ, لوندون, كانن, ماسكەۋ, مينسك سياقتى الەم قالالارىنا مادەني جورىقپەن باردى.
دارىندى ۇلىمىز ديماش قۇدايبەرگەن بىلتىر I am a singer بايقاۋىنا قاتىسقان ۋاقىتتان جاھان جۇرتشىلىعىنىڭ نازارىن وزىنە اۋداردى. سول بايقاۋدا ەكىنشى ورىندى جەڭىپ العان ول بيىل لوندوننان ءبىر-اق شىقتى. انگليا استاناسىندا ديماشتىڭ جەكە كونتسەرتى وتكەن كونتسەرت زالى كورەرمەنگە لىق تولدى. الەمنىڭ 45 مەملەكەتىنەن جينالعان حالىق قازاق بالاسىنىڭ ونەرىنە قول سوقتى. ديماش وتىزعا تارتا ءان شىرقاسا, سونىڭ ىشىندە «دايديداۋ», «ساعىندىم», «قازاقستان, العا!» سىندى قازاقتىڭ اندەرى بولدى. ەكى ساعاتقا سوزىلعان كونتسەرت عاجايىپ شوۋعا اينالدى.
بۇل كەشتىڭ ءبىر ەرەكشەلىگى – تۇسكەن قارجىنىڭ ءبارى ەلىمىزدىڭ جاس دارىندارىن قولداۋعا باعىتتالادى. وسىلايشا ديماش ورەلى ونەرىمەن وزىنەن كەيىن شىعاتىن تالانتتارعا شاپاعاتىن تيگىزىپ وتىر. بۇل جاعداي «سۇڭقار جەمىن شاشىپ جەيدى» دەگەن ءسوزدى ەسكە تۇسىرەدى. جاقىندا ءانشى «الەم ارۋى-2018» بايقاۋىنا بارىپ, ءان اۋەلەتتى. وندا دا ول بوسقا بارعان جوق, قازاقستان اتىنان بۇل سىنعا تۇسكەن ارۋدى دەمەۋ ءۇشىن باردى.
وتكەن كوكتەمنەن بەرى جۇرتتىڭ اۋزىندا قازاقتىڭ قارشاداي قىزى ءجۇر. كانن كينوفەستيۆالىنە ۇسىنىلعان «ايكا» فيلمىندە باستى ءرولدى سومداعان سامال ەسلياموۆا «ۇزدىك اكتريسا» اتانىپ, الەم نازارىن قازاقستانعا قاراتتى. اتالمىش كينوفەستيۆال كينو الەمىندەگى ەڭ بەدەلدى بايقاۋلاردىڭ ءبىرى ەكەنىن ايتا كەتۋ كەرەك. ەندى «وسكاردان» دا دامەلىمىز. «ايكا» ءفيلمى قازاقستاننىڭ اتىنان «شەتەلدىك ۇزدىك فيلم» اتالىمى بويىنشا «وسكار» جۇلدەسىنىڭ شورت-پاراعىنا كىردى. الداعى جىلدىڭ باسىندا ەندى مۇحيتتىڭ ارعى جاعىنان ءسۇيىنشى سۇرايتىن جاڭالىقتى كۇتەمىز.
وسىدان ءۇش جىل بۇرىن «ايالاعان استانا» بالالاردىڭ مۋزىكا بايقاۋىندا دانەليا تولەشوۆا دەگەن ەسىم جارق ەتتى. ەلوردادا وتكەن بۇل بايقاۋدان كەيىن دارىندى قىزىمىز بيىكتەرگە سامعادى. بىلتىر ۋكراينادا «داۋىس. بالالار», رەسەيدە «ەۋروپا ۇمىتتەرى» بايقاۋلارىندا باس جۇلدەنى يەلەندى. ال بيىل «حالىقتىڭ سۇيىكتىسى» جانە «BraVo» پرەميالارىن الدى. «Junior Evrovision-2018» بايقاۋىنىڭ ىرىكتەۋ كەزەڭىندە وعان تەڭ كەلەر جاس ءانشى بولمادى. الايدا «باق شابا ما, باپ شابا ما» دەمەكشى, اقتىق كەزەڭگە كەلگەندە التىنشى ورىننان كورىندى. بار بولعانى 12 جاستاعى عانا دانەليانىڭ ۇلكەن جەڭىستەرى ءالى الدا دەپ سەنەمىز.
ماتەماتيكا مەن مۋزىكانى ۇشتاستىرعان جاس پيانيست, كومپوزيتور, «دارىن» مەملەكەتتىك جاستار سىيلىعىنىڭ ەڭ جاس لاۋرەاتى, بىلتىر ەلىمىزدە العاش ۇيىمداستىرىلعان «100 جاڭا ەسىم» جوباسىنىڭ جەڭىمپازى راحات-بي ابدىساعين ريم قالاسىنداعى سانتا-چەچيليا اكادەمياسىنىڭ دوكتورانتۋراسىمەن قاتار يتاليانىڭ پادۋيا قالاسىنداعى كونسەرۆاتوريادا وقىپ جاتىر. دارىندى كومپوزيتوردىڭ كوپ شىعارمالارىنىڭ پرەمەراسى الەم ساحنالارىندا وتكەن. اتاپ ايتساق, پاريجدەگى يۋنەسكو شتاب-پاتەرىندە, لوندوندا, سەۋلدە, انكارادا, باسقا دا كوپتەگەن قالالاردا ورىندالدى. ال بيىل راحات-ءبيدىڭ «زىمىران زامان» اتتى العاشقى اۆتورلىق كونتسەرتى ەلوردا تورىندەگى «استانا وپەرا» تەاترىندا ۇيىمداستىرىلدى. كەلەر جىلى جيىرماعا تولاتىن دارىندى جىگىتتىڭ الار اسۋى مول.
استانالىق كوزدى بايلاپ سۋرەت سالاتىن سۋرەتشى رەنات ەلۋباەۆ شەتەلدەردە شەبەرلىك ساباقتارىن, كورمەلەرىن وتكىزىپ ءجۇر. بيىل «روسسيا-1» تەلەارناسىنداعى «عاجايىپ ادامدار» شوۋىنا قاتىسىپ, ورمانداي ورىس جۇرتىن تاڭعالدىردى. رەنات وسىنداي شىعارماشىلىق جەڭىستەرمەن قازاق بەينەلەۋ ونەرىنىڭ بولاشاعى جارقىن ەكەنىن دالەلدەپ كەلەدى.
ءبىز بيىل ونەر سالاسىندا الەمدىك دەڭگەيدە كورىنىپ, ءوزىمىزدى ءتانتى ەتكەن دارىندى جاستاردى عانا اتاپ وتتىك. نەگىزى, ەلىمىزدە تالانتتى جاستار وتە كوپ. الداعى «جاستار جىلى» ولاردى قولداۋ ءتيىستى دارەجەدە بولسا, جاڭا ەسىمدەردى ەستيتىنىمىز كۇمانسىز. لايىم سولاي بولسىن!
