استانا قالاسىنىڭ اكىمى اسەت يسەكەشەۆ ەلوردا تۇرعىندارىمەن ەسەپتىك كەزدەسۋ وتكىزۋ بارىسىندا قالالىق دەنساۋلىق ساقتاۋ باسقارماسىنا ەلورداداعى №4 ەمحانادا گەرونتولوگيالىق ورتالىق اشۋ جونىندە تاپسىرما بەرگەن بولاتىن. كەشە وسى ورتالىق سالتاناتتى جاعدايدا اشىلدى.
سالتاناتتى شاراعا ۇلى وتان سوعىسىنىڭ مايدانگەرلەرى, اۋعانستان سوعىسىنىڭ ارداگەرلەرى, چەرنوبىل اپاتىن جويۋعا قاتىسۋشىلار شاقىرىلدى. استانا قالاسى جۇمىسپەن قامتۋ, ەڭبەك جانە الەۋمەتتىك قورعاۋ باسقارماسىنىڭ باسشىسى ەرمەك وسپانوۆ پەن استانا قالاسى ارداگەرلەر كەڭەسىنىڭ توراعاسى سانسىزباي ەسىلوۆ جينالعان قاۋىمدى وتان قورعاۋشىلار جانە جەڭىس كۇنىمەن قۇتتىقتاپ, ەمحانا ۇجىمىنا العىستارىن جەتكىزدى.
– استانا قالاسى بويىنشا ءومىر ءسۇرۋ جاسى جىلدان-جىلعا ۇلعايىپ كەلەدى. بۇل – الەۋمەتتىك دەڭگەيدىڭ جاقسارىپ كەلە جاتقانىن بىلدىرەتىن كورسەتكىش. جاڭادان اشىلىپ وتىرعان گەرونتولوگيالىق ورتالىقتا 75 جاستان اسقان ازاماتتارعا ارنايى مەديتسينالىق كومەك كورسەتىلەتىن بولادى. مۇندا قارتايعان ادامدارعا تەك قانا ەمدىك قىزمەت كورسەتىلىپ قويماي, ولاردىڭ جاسىنا قاراي جان-جاقتى زەرتتەۋ-تەكسەرۋلەر جۇرگىزىلەدى. قارت ادامداردىڭ فيزيكالىق, پسيحولوگيالىق جانە ەموتسيونالدىق جاعدايلارىنا ايرىقشا ءمان بەرىلەتىن بولادى. ەلوردا اكىمدىگى جاڭا ورتالىققا قاجەتتى قۇرال-جابدىقتارمەن, تەحنيكالىق قوندىرعىلارمەن تولىقتاي قامتاماسىز ەتتى. تۇپتەپ ايتقاندا, ەلوردامىزدىڭ ەگدە ادامدارىنا ەرەكشە قىزمەت كورسەتەتىن ورتالىقتىڭ جۇمىسىن باستاپ وتىرمىز, – دەدى №4 قالالىق ەمحانانىڭ باس دارىگەرى سەرىك شايمەردەنوۆ.
عالىم قوجابەكوۆ
