ەلباسى نۇرسۇلتان نازارباەۆتىڭ جارلىعىمەن بەكىتىلگەن ۇلتتىق دومبىرا كۇنى مەرەكەسى بيىل العاشقى مارتە 1 شىلدەدە اتاپ وتىلەدى. وسىعان وراي استانا قالاسى مادەنيەت جانە سپورت باسقارماسى وسى كۇنى «قازاق ەلى» الاڭىندا ۇلتتىق اسپابىمىزدى ۇلىقتايتىن شارانى ۇيىمداستىرادى.
الاڭدا حالىقتىق سەرۋەن ءوتىپ, كيىز ۇيلەر تىگىلەدى. جۇرت وندا ۇلتتىق اسپاپتارى مۋزەيىن تاماشالايدى. ارينە, باستى ورىنعا دومبىرا شىعارىلادى. سونىڭ ىشىندە قۇرمانعازى ساعىربايۇلى, دينا نۇرپەيىسوۆا, احمەت جۇبانوۆ جانە ت.ب. اسا كورنەكتى مۋزىكانتتاردىڭ دومبىرالارى كوپشىلىك نازارىنا ۇسىنىلادى. مۋزىكانتتار حالىق شىعارمالارىن ورىنداپ, «ورتەكە» ونەرى كورسەتىلەدى. قوناقتار دومبىرا شابۋ ونەرىنىڭ قىر-سىرىمەن تانىسا الادى.
ەكى مىڭ دومبىراشىنىڭ قاتىسۋىمەن وتەتىن «دومبىرا – اسىل مۇرا» كونتسەرتى شارانىڭ شارىقتاۋ شەگى بولماق. وندا سەكەن تۇرىسبەك, بەكبولات تىلەۋحان, ايتقالي جايىموۆ, ايتجان توقتاعان, ايگۇل ۇلكەنباەۆا, نۇرجان تاجىكەنوۆ, اسىلبەك ەڭسەپوۆ, «ارت دومبىرا» تريوسى, «مۋزارت» انسامبلى ونەر كورسەتەدى. بۇعان قوسا, قۇرمانعازى اتىنداعى قازاق مەملەكەتتىك ۇلتتىق اسپاپتار وركەسترى, «وتىرار سازى» ۇلتتىق اسپاپتاردىڭ فولكلورلىق-ەتنوگرافيالىق وركەسترى, استانا قالاسىنىڭ مەملەكەتتىك اكادەميالىق فيلارمونياسىنىڭ قازاق وركەسترى, تاتتىمبەت اتىنداعى اكادەميالىق ۇلتتىق اسپاپتار وركەسترى جانە اقتاۋ قالاسىنىڭ قازاق ۇلتتىق اسپاپتار وركەسترى مەرەكە كوركىن قىزدىرادى.
اتاپ وتەرلىك جايت, شاراعا قاتىسۋعا نيەت بىلدىرگەندەردىڭ بارلىعى ساحناعا شىعىپ, دومبىرادا ويناۋ ونەرىن كورسەتە الادى. بۇل ءۇشىن www.asyldombyra.kz سايتىندا ونلاين تىركەلىپ, «كوڭىلاشار», «اداي», «بالبىراۋىن», «ەركە سىلقىم», «سارىارقا» كۇيلەرىن شەرتە الۋلارى قاجەت. قازىرگە دەيىن استانادا ۇلتتىق دومبىرا كۇنىن مەرەكەلەۋگە ارنالعان كونتسەرتكە 1300-دەن اسا ادام تىركەلىپ ۇلگەردى.
30 ماۋسىم كۇنى ساعات 12.00-دە الاڭدا دايىندىق وتەدى. ۇيىمداستىرۋشىلاردىڭ ايتۋىنشا, دايىندىققا مىندەتتى تۇردە قاتىسۋ شارت. سەبەبى, قاتىسۋشىلار ءۇشىن ماڭىزدى اقپارات پەن كىرۋگە ارنالعان قاتىسۋشىنىڭ بەيدجى تاپسىرىلادى.
جالپى كۇي ونەرىنىڭ بىلگىرى اقسەلەۋ سەيدىمبەك «قازاقتىڭ كۇي ونەرى» اتتى مونوگرافياسىندا قازاق كۇيلەرى مەن اندەرىنىڭ ايماقتىق مەكتەپتەرىن بەس توپقا بولەدى. اتاپ ايتساق, قازاقستاننىڭ ورتالىق جانە سولتۇستىك وڭىرىنە ءتان كۇيشىلىك-انشىلىك مەكتەپ; وڭتۇستىك جانە جەتىسۋ ءوڭىرىن قامتيتىن كۇيشىلىك-انشىلىك مەكتەپ; باتىس ءوڭىرىن قامتيتىن كۇيشىلىك-انشىلىك مەكتەپ; سىر بويىن قامتيتىن كۇيشىلىك-انشىلىك مەكتەپ; قازاقستاننىڭ شىعىس ولكەسىن (التاي, ىلە, تارباعاتاي, بايان-ولگي مەن شىعىس تۇركىستاندى قوسقاندا) قامتيتىن كۇيشىلىك-انشىلىك مەكتەپ.
ال كۇيدىڭ ايماقتارعا قاراي ۇيالىق بولىنىستەرى التاي كۇيشىلىك ۇياسى, ايماعى – شىعىس قازاقستان; ارقا كۇيشىلىك ۇياسى, ايماعى – ورتالىق قازاقستان; جەتىسۋ كۇيشىلىك ۇياسى, ايماعى – وڭتۇستىك شىعىس قازاقستان; قاراتاۋ كۇيشىلىك ۇياسى, ايماعى – وڭتۇستىك قازاقستان; جيدەلى بايسىن كۇيشىلىك ۇياسى, ايماعى – سىرداريا, ارال ءوڭىرى; اتىراۋ – ورال كۇيشىلىك ۇياسى, ايماعى – باتىس قازاقستان; تۇبەك كۇيشىلىك ۇياسى, ايماعى – ماڭعىستاۋ اتالاتىن جەتى مەكتەپتى قۇرايدى.
بۇلاردىڭ قالىپتاسقان ءداستۇرىن ساقتاۋ بۇگىنگى كۇنى ۇلكەن ماقسات بولۋى ءتيىس. ۇلتتىق دومبىرا كۇنى قۇر دۋمانداتپاي, وسى جاعى دا ەسكەرىلۋى ءتيىس.
امانعالي قالجانوۆ
