ەلوردادا سانيتارلىق تالاپتاردىڭ ساقتالماۋىنان COVID-19-دىڭ «ەكىنشى تولقىنى» بولۋى مۇمكىن.
سوڭعى مالىمەتتەر بويىنشا نۇر-سۇلتان قالاسىندا كوروناۆيرۋس ينفەكتسياسىنىڭ تەز تارالۋى بايقالعان. وتكەن اپتاداعى اۋرۋ كورسەتكىشى الدىڭعى اپتادان 1,3 ەسە نەمەسە 28,7 پايىزعا جوعارى.
«قازان ايىنداعى اۋرۋشاڭدىقتىڭ ءوسۋى قالادا كارانتين شارالارىن جەڭىلدەتۋگە مۇمكىندىك بەرمەيدى» دەدى نۇر-سۇلتان قالاسىنىڭ باس مەملەكەتتىك سانيتارلىق دارىگەرى جاننا پىراليەۆا ارنايى وتكىزىلگەن بريفينگتە.
«قۇرمەتتى ەلوردا تۇرعىندارى مەن قوناقتارى, كەزەكتى رەت اينالاڭىزداعى ادامداردىڭ دەنساۋلىعى مەن ومىرىنە قامقورلىقپەن قاراۋىڭىزدى سۇرايمىن. ول ءۇشىن تەك قاراپايىم ەرەجەلەردى ساقتاۋ كەرەك: مىندەتتى تۇردە مەديتسينالىق ماسكا تاعۋ, الەۋمەتتىك قاشىقتىقتى ساقتاۋ, ادام جيناپ, وتىرىس وتكىزبەۋ, ادامدار كوپ جينالاتىن جەرلەرگە بارماۋ كەرەك» دەپ اتاپ ءوتتى باس سانيتارلىق دارىگەر قالا تۇرعىندارىنا ارناعان ۇندەۋىندە.
«سوڭعى ۋاقىتتا كوروناۆيرۋس ينفەكتسياسىمەن اۋىراتىن ناۋقاستاردىڭ تۇرعىلىقتى جەرى مەن جۇمىس ورنى بويىنشا, سونداي-اق جاقىن بايلانىستا بولعاندار تۋرالى فاكتىلەردى جاسىرۋ جانە جالعان اقپارات بەرۋ جيىلەدى. بۇل ەپيدەمياعا قارسى ءىس-شارالاردى ۋاقىتىلى جۇرگىزۋگە كەدەرگى كەلتىرەدى» دەپ اتاپ ءوتتى قالالىق باس سانيتارلىق دارىگەر.
بۇگىندە بيزنەس سۋبەكتىلەرى شەكتەۋ شارالارى مەن سانيتارلىق نورمالاردى, كارانتيندىك رەجيمدى ەلەمەي وتىرعان كورىنەدى. بۇعان 27 جانە 28 قازاندا مونيتورينگتىك توپتار جۇرگىزگەن كۇندىزگى جانە تۇنگى رەيدتەردىڭ ناتيجەسى دالەل بولادى. تەكسەرىلگەن 290 نىساننىڭ 49-ىندا بۇزۋشىلىقتار انىقتالدى.
«مەيرامحانالاردا كوپتەگەن ادامداردى شاقىرىپ, وتباسىلىق ءىس-شارالار وتكىزۋ ءالى دە بار. مىسالى, 24 قازاندا تۇران داڭعىلى, 5 مەكەنجايىنداعى GRANDHALLASTANA مەيرامحاناسىندا 70-تەن استام ادام بولدى. «قىز ۇزاتۋ» تويى ءوتىپ, وعان 50 ادام قاتىستى, ال تۋعان كۇن زالىندا 20 ادام بولدى» دەدى نۇر-سۇلتان قالالىق پد جەرگىلىكتى پوليتسيا قىزمەتى باسقارماسىنىڭ باستىعى گوسمان جاكين.
سونداي-اق ءموبيلدى توپ ماناس كوشەسىندەگى «پوشاشلىچيم» كافەسى مەن «جانىم-سول» كاراوكە-بارىندا جۇمىس جانە دەمالىس كۇندەرى بەلگىلەنگەن جۇمىس كەستەسىن ساقتاماي, ءوز قىزمەتىن جۇزەگە اسىرعان بۇزۋشىلىقتاردى انىقتاعان. تىيىم سالىنعان ۋاقىتتا تۇران داڭعىلى, 19 مەكەنجايىنداعى Fast425 تۇنگى كلۋبى جۇمىس ىستەگەن.
ەلوردالىق باس سانيتارلىق دارىگەر ءوز سوزىندە قالا تۇرعىندارىنا سانيتارلىق قاراپايىم ەرەجەلەردى ساقتاۋ كەرەك ەكەندىگىن تاعى ءبىر ايتىپ ءوتتى.
