استانادا 285 رۇقسات ەتىلمەگەن قوقىس ورنى انىقتالدى. بۇل تۋرالى قر ەكولوگيا جانە تابيعي رەسۋرستار ءمينيسترىنىڭ ورىنباسارى مانسۇر وشۋرباەۆ كەشە استانا قالاسىنىڭ تۇرعىندارىمەن جانە ۇكىمەتتىك ەمەس ۇيىمداردىڭ وكىلدەرىمەن بولعان كەزدەسۋدە مالىمدەدى.
قازىرگى تاڭدا الەمدىك ەكولوگيانىڭ جاعدايى بۇكىل جاھان جۇرتىن الاڭداتىپ وتىرعانى انىق. مينيسترلىك وكىلىنىڭ ايتۋىنشا, ەكولوگيالىق احۋالدى جاقسارتۋ جانە تابيعاتتى قورعاۋ ءىس-شارالارى اياسىندا اۋقىمدى جۇمىستار جۇرگىزىلۋدە.
– جالپى, استانا لاستانۋ دەڭگەيى جوعارى قالالار قاتارىنا جاتادى. ونىڭ نەگىزگى كوزدەرى جىلۋ ەلەكتر ورتالىقتارى, اۆتونومدى قازاندىقتار, جەكە سەكتورداعى پەشتەر جانە اۆتوموبيل كولىكتەرى بولىپ تابىلادى. ەكوجۇيەنى جاقسارتۋ ءۇشىن جۇيەلى ءىس-شارالار قاتارىندا 2021 جىلى جاڭا ەكولوگيالىق كودەكس جانە «جاسىل قازاقستان» ۇلتتىق جوباسى قابىلداندى. سونداي-اق 2022 جىلى اۋماقتاردا ەكوجۇيەنى جاقسارتۋ جونىندەگى جول كارتالارى جاڭارتىلىپ, بەكىتىلدى. بۇگىندە ولار ىسكە اسىرىلۋدا. ەلوردا جۇرتشىلىعىن تولعاندىراتىن باستى ماسەلەلەردىڭ ءبىرى – رۇقسات ەتىلمەگەن جەرلەردەگى پوليگونداردى جويۋ. اتموسفەرالىق اۋانىڭ ەكولوگيالىق مونيتورينگىنىڭ ناتيجەلەرى كورسەتكەندەي, استانادا 2023 جىلى 285 قوقىس ورنى انىقتالدى, ونىڭ 6%-ى عانا كادەگە جاراتىلدى, – دەدى مانسۇر وشۋرباەۆ.
بۇل ماسەلەنى رەتتەۋ ءۇشىن ەكوكودەكسكە جاڭا تالاپتار ەنگىزىلدى, قوقىس شىعاراتىن ۇيىمداردىڭ ءتىزىلىمى جۇرگىزىلۋدە, پوليگونداردا قالدىقتاردىڭ وسى تۇرلەرىن كومۋگە تىيىم سالىندى. اتالعان نورمالاردى ىسكە اسىرۋ ماقساتىندا ەلوردادا قۇرىلىس قالدىقتارىن قابىلداۋ جانە قايتا وڭدەۋ جۇرگىزىلەتىن «سولتۇستىك جوتاسى» الاڭى ىسكە قوسىلدى. بۇل الاڭدا جەكە تۇلعالاردان جىلىنا 250 كەلىگە دەيىنگى قۇرىلىس قالدىقتارى وتەۋسىز نەگىزدە قابىلدانادى.
– قالدىقتارمەن جۇمىس ىستەۋ سالاسىنداعى جاعدايدى جاقسارتۋ ءۇشىن ەكولوگيا جانە تابيعي رەسۋرستار مينيسترلىگى اكىمدىكتەرمەن ءتيىستى ينفراقۇرىلىم دامىتىلۋدا. اتاپ ايتقاندا, كەلىپ تۇسكەن ەميسسيالىق قاراجاتتىڭ شىعىستارى جوسپارلانىپ, وسى سالانى دامىتۋدى جۇيەلى جوسپارلاۋ ءۇشىن وڭىرلەردە كوممۋنالدىق قالدىقتاردى باسقارۋ جونىندەگى باعدارلامالاردى ازىرلەۋگە بايلانىستى ماسەلەلەر تالقىلانۋدا, – دەدى ءمينيستردىڭ ورىنباسارى.
سونداي-اق ەلدى مەكەندەردى كوگالداندىرۋ جۇمىستارى جۇرگىزىلۋدە. بۇل رەتتە ەلوردا اكىمدىگى 2021-2025 جىلدارعا ارنالعان قالانى كوگالداندىرۋ مەن جاسىل ايماقتاردى قۇرۋدىڭ وڭىرلىك جوسپارىنا سايكەس 5 633,3 مىڭ اعاش وتىرعىزىلادى.
مينيستر ورىنباسارىنىڭ مالىمەتىنشە, 2021-2022 جىلدارعا ارنالعان جوسپار ورىندالدى, وسى ۋاقىت ارالىعىندا 1,5 ملن ءتۇپ اعاش وتىرعىزىلدى. سونىمەن قاتار, استانا قالاسىنىڭ اينالاسىندا جاسىل بەلدەۋ قۇرۋ جۇمىستارى جالعاسۋدا. بۇگىنگى كۇنى ونىڭ اۋدانى 90 مىڭ گەكتاردان اسادى. الداعى ەكى جىلدا 5,8 مىڭ گەكتار جەرگە ورمان داقىلدارىن وتىرعىزۋ جوسپارلانىپ وتىر جانە كليماتتىق جاعدايلاردىڭ سالدارىنان السىرەگەن اعاشتاردى قايتا قالپىنا كەلتىرۋ جۇمىستارى جالعاسادى.
