كەشە اقوردادا مەملەكەت باسشىسى نۇرسۇلتان نازارباەۆتىڭ توراعالىعىمەن «ەكسپو-2017» حالىقارالىق كورمەسىنە دايىندىق جانە ونى وتكىزۋ ماسەلەلەرى جونىندە كەڭەس ءوتتى. كەڭەستە پرەمەر-مينيستر سەرىك احمەتوۆ, قورشاعان ورتانى قورعاۋ ءمينيسترى نۇرلان قاپپاروۆ جانە «استانا ەكسپو-2017» ۇلتتىق كومپانياسىنىڭ باسقارما توراعاسى تالعات ەرمەگياەۆ اتقارىلعان جۇمىستار تۋرالى ەسەپ بەردى.
نۇرسۇلتان نازارباەۆ استاناعا بۇكىلالەمدىك كورمە وتەتىن الاڭ رەتىندە تاڭداۋ تۇسكەن كەزدەن باستاپ ءبىر جىلداي ۋاقىت وتكەنىن, «ەكسپو-2017» حالىقارالىق كورمەسىنە دايىندىق بارىسىن قاراپ, ءتىركەۋ ءمالىمەتىن ازىرلەپ, وزگە دە ۇيىمداستىرۋشىلىق-قۇقىقتىق ماسەلەلەردى شەشكەن ءجون ەكەنىن ايتتى.
مەملەكەت باسشىسى «ەكسپو-2017» كورمەسىنە قارجىلاندىرۋدىڭ وزگە كوزدەرىن, سونىڭ ىشىندە كورپوراتيۆتى قاتىسۋشىلاردى – الەمدىك دەڭگەيدەگى كومپانيالاردى تارتۋدىڭ ماڭىزدىلىعىن, مۇنىڭ كورمەگە دايىندىق جاساۋ جونىندەگى جۇمىستىڭ نەگىزگى باعىتتارىنىڭ ءبىرى بولۋعا ءتيىس ەكەنىن اتاپ ءوتتى. بۇعان قوسا, قازاقستان پرەزيدەنتى ءدال وسى «ەكسپو-2017» كورمەسى اياسىندا جاڭا جوعارى تەحنولوگيالىق ازىرلەمەلەر تانىستىرىلىمىن وتكىزۋ قاجەتتىگىنە توقتالدى.
مەملەكەت باسشىسى ينتەرنەتتەگى, الەۋمەتتىك رەسۋرستار مەن باق-تاعى ءتيىمدى ءارى شىعىن از جۇمسالاتىن جارناما ەسەبىنەن العا قويعان ءمىندەتتى ورىنداۋدا اقپاراتتىق-يميدجدىك جۇمىستى جۇزەگە اسىرۋدا جاڭاشىل قادامدار قاجەتتىگىنە نازار اۋداردى.
كەڭەس بارىسىندا پرەمەر-مينيستر كورمەگە دايىندىق مەملەكەت باسشىسىنىڭ تاپسىرماسىنا جانە ۇلتتىق جوسپارعا سايكەس جۇرگىزىلىپ جاتقانىن باياندادى, سونداي-اق, بارلىق اتالعان ماسەلە ۇكىمەت پەن ۇلتتىق كوميسسيانىڭ ۇدايى باقىلاۋىندا ەكەنىنە توقتالدى.
قورشاعان ورتانى قورعاۋ مينيسترى كورمەنىڭ جالپى اۋماعى 173 گەكتار بولاتىنىن جانە وعان ءارتۇرلى ينفراقۇرىلىمدىق نىساندار ورنالاساتىنىن باياندادى. بۇعان قوسا, كورمەنىڭ اۋماعى استانانىڭ ورنىقتى ەنەرگەتيكانى دامىتۋ جونىندە كوشباسشى بولۋىنا مۇمكىندىك بەرەتىن ءۇشىنشى يندۋستريالىق رەۆوليۋتسيانى ءىس جۇزىنە اسىراتىن الەمدەگى ءبىرىنشى اۋدانعا اينالماق.
كەڭەس سوڭىندا مەملەكەت باسشىسى «Adrian Smath + Gordon Gill Architecture» كومپانياسى ازىرلەگەن كورمە كەشەنىنىڭ ارحيتەكتۋرالىق ەسكيزىن ماقۇلدادى.
تاڭاتار تولەۋعاليەۆ
