10 ماۋسىم كۇنى «ەكسپو-2017» حالىقارالىق مامانداندىرىلعان كورمەسى بارشا الەمگە ەسىگىن ايقارا اشادى. كورمە استانادا وتەدى دەگەن كۇننەن باستاپ نىسانداردىڭ قۇرىلىس جۇمىستارى 6 جىلعا ەسەپتەلگەن بولاتىن. پرەزيدەنتتىڭ جان-جاقتى كومەگى مەن قولداۋى ارقاسىندا قۇرىلىس 21 ايدا اياقتالىپ, قوناقتاردى قارسى الۋعا دايىن تۇر. ءدۇيىم جۇرت كوز تىككەن عيماراتتاردىڭ كورمەدەن كەيىنگى تاعدىرى كوپشىلىكتى قىزىقتىراتىنى انىق. «استانا ەكسپو-2017» ۇلتتىق كومپانياسىنىڭ باسقارما توراعاسى احمەتجان ەسىموۆ ەكسپو نىساندارى وزىق جوبالاردىڭ جالعاسىنا اينالادى دەيدى.
ەكسپو نىساندارىن شارادان كەيىن پايدالانۋ بويىنشا قازىردىڭ وزىندە جيىرمادان استام ۇسىنىس ءتۇستى. كومپانيا باسشىسى احمەتجان ەسىموۆتىڭ ايتۋىنشا, نىسان ورنىندا الەمگە ايگىلى Job World ءبىلىم بەرۋ ورتالىقتارى اشىلۋى مۇمكىن. قازىرگى تاڭدا ماماندار كورەيلىك ارىپتەستەرمەن كەلىسسوز جۇرگىزىپ, تاجىريبەسىن زەرتتەپ جاتىر.
– 2015 جىلى ەكسپو كورمەسى ميلاندا وتكەنىن بىلەسىزدەر. كورمەدەن كەيىن پاۆيلونداردىڭ بارلىعى بۇزىلىپ, الىنىپ تاستالعان ەدى. ال ءبىز ءاۋ باستان كورمەنى ۇزاق مەرزىمدى ينۆەستيتسيالىق جوبا رەتىندە قاراستىردىق. سوندىقتان باستى نىسان – سفەرا «نۇر الەم» دەپ اتالىپ, بولاشاق مۇراجايعا اينالادى. سەبەبى وندا عارىش, كۇن, سۋ, جەر, كينەتيكا ەنەرگياسىنا قاتىستى الۋان ءتۇرلى جوبالار ۇسىنىلعان. تاريحتا «نۇر الەم» كورمەدەن قالعان مۇرا بولىپ قالماق, – دەدى باسقارما توراعاسى احمەتجان ەسىموۆ.
كورمە اياقتالعاننان كەيىن شەتەلدىك مەيماندار مەن دەلەگاتتار حالىقارالىق پاۆيلونداردى بوساتادى. ەكسپو ۇيىمداستىرۋشىلارى ولاردى پايدالى جوبالارعا تاپسىرۋدى جوسپارلاپ وتىر. ماسەلەن, پاۆيلونداردىڭ ورنىنا بىرىككەن ۇلتتار ۇيىمىنىڭ «جاسىل» ەكونوميكا ورتالىعى مەن «استانا» حالىقارالىق قارجى ورتالىعى قۇرىلادى. IT تەحنولوگيا سالاسىنداعى باستامالارعا دا وسى جەردە ورىن بەرىلەدى.
جاقىن ارادا ناقتى جۇزەگە اساتىن جوبا – حالىقارالىق ءبىلىم بەرۋ ورتالىعىنا قايتا ورالايىق. ورتالىق مەكتەپكە دەيىنگى بۇلدىرشىندەرگە, وقۋشىلارعا جانە 24-كە دەيىنگى جاستارعا ارنالعان. وندا بالالار ءارتۇرلى ماماندىقتارمەن جاقىنىراق تانىسىپ, زەرتتەپ-زەردەلەپ, بولاشاقتا ءسۇيىكتى جۇمىسىن وزدەرى تاڭدايدى. بارلىق دامىعان مەملەكەتتەردە وسىنداي Job World ورتالىقتارى بار. «ءبىزدىڭ بالالار دا جانىنا جاقىن كاسىپتى قىزىعۋشىلىعىنا قاراي تاڭداۋى كەرەك. جاستار ءورت ءسوندىرۋشى, دارىگەر, قۇرىلىسشى, اسپازشى سياقتى ءتۇرلى-ءتۇرلى ماماندىقتىڭ ەرەكشەلىگىمەن تانىسسا, وزىنە كەرەگىن تاڭداپ الادى. ال قازىر كوبىنەسە بالالاردىڭ اكە-شەشەسى جوعارى جالاقى تولەنەتىن ماماندىققا بارۋعا يتەرمەلەيدى. بىراق وقۋ بىتىرگەننەن كەيىن جاستاردىڭ كاسىبىنە كوڭىلى تولماي جاتادى. مۇنى ءبىزدىڭ پاۆيلونداردىڭ نەگىزىندە جاساۋعا بولادى» دەدى ا.ەسىموۆ.
ورتالىق مەملەكەت قاراماعىندا بولادى, بۇل كوپتەگەن دەمەۋشىلەردى تارتۋعا مۇمكىندىك تۋعىزادى. ال دەمەۋشىلەر 20-24 جاستاعى جاستار اراسىنان دايىن ماماندى ىرىكتەپ الادى.
«ەلۋ جىلدا – ەل جاڭا» دەپ قازاق بەكەر ايتپايدى. بۇگىن ۇلكەن سۇرانىسقا يە ماماندىقتار ەرتەڭگى كۇنى مۇلدەم كەرەكسىز بولىپ قالۋى مۇمكىن. بالكىم, «بولاشاق ەنەرگياسىن» زەرتتەيتىن ادام سول بالالاردىڭ قاتارىندا بولار؟!
كومپانيا توراعاسى «كورمەگە دەيىن ۇلگەرمەيدى» دەپ حالىقتى دۇرلىكتىرىپ جاتقاندارعا جاۋاپ بەردى.
– قاتىسۋشى مەملەكەتتەرگە پاۆيلونداردى قاراشانىڭ بىرىنەن باستاپ تاپسىردىق. الايدا بىرقاتار مەملەكەت قۇرىلىس جۇمىستارىن كەش باستادى. دەگەنمەن شارانىڭ سالتاناتتى اشىلۋ راسىمىنە دەيىن ءبارىن ۇلگەرۋىمىز كەرەك. ميلانداعى كورمەدە حالىقارالىق پاۆيلوندار دەر كەزىندە اياقتالماي, اشىلۋ سالتاناتىنان كەيىن دە قۇرىلىس ءجۇرىپ جاتتى. ءبىز بۇل قاتەلىكتەردى قايتالامايمىز, – دەپ تاقىرىپقا نۇكتە قويدى كومپانيا باسشىسى.
كومپانيا توراعاسى احمەتجان ەسىموۆ وسىدان ەكى جىل بۇرىنعى ەستەلىكتەرمەن ءبولىستى. ونىڭ ايتۋىنشا, وتكەن جىلى كورمەگە قاتىسۋعا نيەت بىلدىرگەن ەلدىڭ سانى بار-جوعى 30 بولعان. ال بۇگىنگى تاڭدا ونىڭ سانى 115 ەلگە جەتتى. ەكسپو تاقىرىبىنا الەم ەلدەرى دە, وتانىمىزدىڭ قاراپايىم ازاماتتارى دا قىزىعۋشىلىق تانىتىپ وتىر. باسقارما توراعاسى وتكەن جىلى وتاندىق ونەرتاپقىشتار اراسىندا بايقاۋ وتكەنىن ايتتى. ءبىر ايدىڭ ىشىندە 200-دەن استام جۇمىس كەلىپ ءتۇستى. باسىم بولىگىنىڭ پاتەنتى بار.
– پرەزيدەنتتىڭ كورمەگە «بولاشاق ەنەرگياسى» تاقىرىبىن تاڭداعانى بەكەر ەمەس. بۇگىندە مۇنايلى مەملەكەتتەر شيكىزاتتىڭ باعاسىنا تاۋەلدى بولىپ وتىرعانىن كورىپ وتىرمىز. ەلباسى قازبا بايلىقتان باسقا دا ەنەرگيانىڭ بالامالى كوزدەرىن ىزدەستىرۋدى بىرنەشە رەت ايتقان ەدى. شىنىمەن دە, مۇناي مەن شيكىزات كوزدەرىنىڭ باعاسى تۇسكەندە, ەلىمىزگە ونى ەكسپورتتاۋ ءتيىمسىز بولادى. مەنىڭ ويىمشا, كورمەنىڭ ەلوردامىزدا ءوتۋى بۇل سالاعا سەرپىن بەرەرى انىق, – دەپ ءسوزىن تۇيىندەدى ا.ەسىموۆ.
گۇلدانا تالعاتقىزى
