وتكەن جىلدان بەرى «ەكسپو-2017» كورمەسىنە كىرۋ بيلەتتەرى تەك ەلەكتروندى تۇردە ساتىلۋدا. ەندى ناۋرىز ايىنان باستاپ ەلىمىزدىڭ ايماقتارىندا جانە رەسەيدىڭ بىرقاتار قالالارىندا قولما-قول ساتاتىن بيلەت كاسسالارى ءوز جۇمىسىن باستادى.
كورمە بيلەتتەرىن ساتۋ وتكەن جىلدىڭ جەلتوقسان ايىندا ەلىمىزدىڭ بىرقاتار ساۋدا ورىندارىندا رەسمي تۇردە اشىلدى. «كەرۋەن», «حان شاتىر», «MEGA PARK», «MEGA تسەنتر الماتى» ويىن-ساۋىق ورتالىقتارىندا جانە «قازپوشتانىڭ» 981 بولىمشەسىندە ساتىلۋدا. جۇمىس كۇندەرىنە قويىلعان بيلەتتەردىڭ باعاسى 4000 تەڭگە بولسا, دەمالىس كۇندەرىنە ارنالعان باعا 6000 تەڭگەنى قۇراپ وتىر. بيلەت ساتىپ العان ادام باعدارلاما بويىنشا كورمەنى تاماشالاي الادى.
ايتا كەتۋ كەرەك, كۇنى بەلگىلەنگەن جانە بەلگىلەنبەگەن بيلەتتىڭ ايىرماشىلىعى بار. كۇنى بەلگىلەنگەن بيلەت تەك سول كۇنى عانا كورمەگە كەلۋگە جارامدى. كۇنى بەلگىلەنبەگەن بيلەت بويىنشا كورمەگە كەلەر الدىن, ۋاقىتىن ءوزىڭىز تاڭدايسىز. ۇيىمداستىرۋشىلاردىڭ ايتۋىنشا, سوعىس ارداگەرلەرى, مۇمكىندىگى شەكتەۋلى جاندار, جەتىم بالالار مەن 6 جاسقا دەيىنگى بالالارعا كىرۋ – تەگىن. ال زەينەتكەرلەر, كوپ بالالى انالار, ستۋدەنتتەر مەن وقۋشىلارعا جەڭىلدىكتەر جاسالادى.
جالپى, بيلەت ساتۋعا «ەكسپو-2017» سەرىكتەستەرى – «قازپوشتا», «قازاقستان تەمiر جولى», «Air Astana» سەكىلدى ءىرى كومپانيالار تارتىلۋدا. بيلەتتەردى الدىن الا ساتۋ 2017 جىلدىڭ 9 ماۋسىمىنا دەيىن جالعاسادى.
داۋلەت ەركىمباەۆ, «استانا ەكسپو-2017» ۇك كوممەرتسيالىق دەپارتامەنتىنىڭ ديرەكتورى: – ءبىز رەسەي فەدەراتسياسىنىڭ بىرقاتار وڭىرلەرىندە «ەكسپو-2017» كورمەسىنىڭ رەسمي كاسسالارىن اشتىق. اتاپ ايتقاندا, ماسكەۋدەگى كاسسا لۋبيانكادا, ورتالىق بالالار دۇكەنىندە ورنالاسقان. پەتەربور قالاسىنداعى كاسسا گوروحوۆىي كوشەسىندە ورنالاسقان كاسسير رۋ عيماراتىندا جۇمىسىن باستادى. سونىمەن قاتار, قازان, نيجني نوۆگورود, ەكاتەرينبۋرگ, ءنوۆوسىبىر جانە سوچي قالالارىنداعى ءىرى ساۋدا ورتالىقتارىندا دا ءبىزدىڭ كاسسالار اشىلدى. جالپى, رەسەيدە كورمەگە ارنالعان بيلەتتەردى ساتۋ ماقساتىندا 38 ورىن بەلگىلەندى.
گۇلميرا ايماعانبەت, «استانا اقشامى»
