«استانا وپەرا» تەاترىندا ۇلتتىق ءان ونەرىنىڭ جارىق جۇلدىزى, كۇمىس كومەي ءانشى بيبىگۇل تولەگەنوۆانىڭ تورقالى توقسان جىلدىق مەرەيتويىنا ارنالعان «قازاقتىڭ بۇلبۇلى» اتتى ماعىنالى مازمۇنعا تولى كەش ءوتتى.
العاش ءان ايتۋدى قاتارداعى كوركەمونەرپازدار ءۇيىرمەسىنەن باستاعان ءانشىنىڭ تالانتىن تانىپ, ونەر جولىنا تۇسۋىنە باعىت سىلتەپ, اقىل بەرگەن ادام – جازۋشى گالينا سەرەبرياكوۆا بولىپتى. قالامگەر سول وتىزىنشى جىلداردىڭ سوڭىندا سەمەيدە تۇرعان ەكەن. ونەردەگى ءورىسى وسىنداي تىلەگى جاقسى ادامنىڭ باتاسىمەن باستالعان بيبىگۇل اپامىز تاماشا داۋىسىمەن قازاقتىڭ ونەرىن ءدۇيىم ەلگە تانىتىپ, حالقىمىزدىڭ ابىرويىن اسقاقتاتتى. 
ايتۋلى شارادا مادەنيەت جانە سپورت ءمينيسترى اقتوتى رايىمقۇلوۆا مەرەيتوي يەسىنە مەملەكەت باسشىسى قاسىم-جومارت توقاەۆتىڭ قۇتتىقتاۋ حاتىن وقىپ بەردى. سونداي-اق ايگىلى ءانشىنى پارلامەنت سەناتىنىڭ سپيكەرى داريعا نازارباەۆا قۇتتىقتادى.
كەش بارىسىندا بيبىگۇل تولەگەنوۆانىڭ ءوزى ساحناعا شىعىپ ە.برۋسيلوۆسكيدىڭ «قىز جىبەك» وپەراسىنان جىبەكتىڭ (گاككۋ) ارياسى, ع.توقايدىڭ سوزىنە جازىلعان تاتاردىڭ «تافتيلياۋ» ءانى جانە ن.لىسەنكونىڭ «ناتالكا-پولتاۆكا» وپەراسىنان ناتالكانىڭ ارياسىن ورىنداپ, جۇرتشىلىقتىڭ ىقىلاسىنا بولەندى. ونەرى اڭىزعا اينالعان انشىگە كورەرمەندەر ورنىنان تۇرىپ قوشەمەت كورسەتتى.
– مەن حالقىما ريزا اداممىن. وسى كەشتىڭ باسى-قاسىندا جۇرگەن ازاماتتارعا دا العىسىمدى بىلدىرەمىن. بۇگىنگى كەش – مەنىڭ عانا كەشىم ەمەس. مەنىڭ ونەردەگى ارىپتەستەرىم, بۇگىندە ارامىزدا جوق روزا جامانوۆا, ەرمەك سەركەباەۆ سەكىلدى دوستارىمنىڭ رۋحىنا ارنالعان كەش دەپ ويلايمىن. ءبىزدىڭ بالالىق شاعىمىز قيىنشىلىققا تولى بولدى. اشتىق دا, كەدەيلىكتى دە كوردىك. سونىمەن سالىستىرعاندا قازىرگى ءومىرىمىز – باقىتقا تولى دەپ ايتۋعا بولادى. ەلىمىزدە بەيبىتشىلىك بولسىن, بارلىعىمىز امان بولايىق, – دەپ جينالعان قاۋىمعا ريزاشىلىعىن ءبىلدىردى.
سونىمەن بىرگە كەشكە بيبىگۇل احمەتقىزىنىڭ شاكىرتتەرى مەن «استانا وپەرانىڭ» سوليستەرى – قازاقستاننىڭ ەڭبەك سىڭىرگەن ءارتىسى جاننات باقتاي, قازاقستاننىڭ ەڭبەك سىڭىرگەن قايراتكەرلەرى: سالتانات احمەتوۆا, ءجاميليا جارقىمباەۆا, دينا حامزينا, مەدەت شوتاباەۆ, مەيىر باينەش, جانات شىبىقباەۆ, ازامات جىلتىرگوزوۆ, باشقۇرتستاننىڭ ەڭبەك سىڭىرگەن ءارتىسى الفيا كاريموۆا جانە گۇلجانات ساپاقوۆا, ەلەنا نيزامۋتدينوۆا, گۇلدانا الدادوسوۆا قاتىسىپ, ساحنانى ءان مەن جىرعا بولەدى. كەشتىڭ ارنايى قوناعى رەتىندە بيىلعى ب.تولەگەنوۆا اتىنداعى بايقاۋدىڭ گران-پري يەگەرى كەرەمەت تەنور, ءانشى كوزيمو ورەستە يتاليادان ات ارىتىپ كەلىپ, ءان شىرقادى. 
بيبىگۇل اپامىز حح عاسىرداعى ەڭ اتاقتى جيىرما ايەلدىڭ ءبىرى رەتىندە يۋنەسكو تىزىمىنە ەنگەن. ول جيىرمادان استام ماراپاتقا يە. سونىڭ ىشىندە سوتسياليستىك ەڭبەك ەرى, كسرو حالىق ءارتىسى, كسرو مەملەكەتتىك سىيلىعىنىڭ لاۋرەاتى اتاقتارىن ايتساق بولادى. الايدا كۇمىس كومەي ءانشىنىڭ باستى ماراپاتى – تۋعان حالقىنىڭ قۇرمەتى دەپ ويلايمىز.
