رەسپۋبليكاعا تارالاتىن «استانا اقشامى» گازەتى جۋىردا «قازاقستاندىق ارمان نەمەسە ءار ادامعا 30 شارشى مەتردەن كەلەتىن باسپانا ماسەلەسىنە جاڭاشا كوزقاراس» («استانا اقشامى», №24, 27 اقپان, 2018 جىل) دەگەن تاقىرىپپەن ماقالا جاريالاپ, ءار قازاقستاندىقتىڭ باسپاناعا قولى جەتۋى ءۇشىن يپوتەكالىق نەسيە ۇستەمەسىن ارزانداتۋ جونىندە ۇسىنىس بىلدىرگەن ەدى. سول ماقالامىزدا باسپاناسىز جۇرگەن ازاماتتاردىڭ ءۇي ساتىپ الۋعا دەگەن مۇمكىندىكتەرىن ارتتىرۋ ءۇشىن كوممەرتسيالىق بانكتەردىڭ ارزان يپوتەكاعا يكەمدەلۋى قاجەتتىگىن ايتتىق. قازاقستاندىق ارمان سوندا عانا ورىندالاتىنىن ورتاعا سالدىق. كەشە عانا مەملەكەت باسشىسىنىڭ ءوزى پارلامەنت تورىنەن قازاقستان حالقىنا ۇسىنعان بەس باستاماسىنىڭ ءبىرى رەتىندە ءاربىر قازاقستاندىق جىلىنا 7 پايىزبەن يپوتەكا الۋعا مۇمكىندىگى بولاتىنىن حابارلادى. گازەت كوتەرگەن, ەل كوكەيىندە جۇرگەن ماسەلەگە ەلباسىنىڭ ءوزى ارالاسقانىنا قۋانىشىمىز شەكسىز.
سونىمەن بىرگە, پرەزيدەنت ەلىمىزدى گازبەن قامتاماسىز ەتۋ ماسەلەسىنە كەڭىنەن توقتالدى. بۇل دا ەلوردا تۇرعىندارىنىڭ كوكەيىندەگى ەڭ شەتىن ماسەلەلەردىڭ ءبىرى, ءبىزدىڭ باسىلىمدا دا تالاي رەت قوزعالدى. وسى ورايدا نۇرسۇلتان نازارباەۆ قالا اكىمدىگىنىڭ جەكەمەنشىك سەكتوردان تارالاتىن تۇتىننەن اۋانى تازالاۋعا ارەكەتتەنىپ جاتقانىن تىلگە تيەك ەتتى. استانا – الەمدىك دەڭگەيدەگى ۇلكەن-ۇلكەن ءىس-شارالار وتەتىن قالا. ەندەشە, قىستىكۇنى ەلوردانىڭ اسپانىن كوك ءتۇتىن باسىپ تۇراتىن بولسا, كەلەتىن قوناقتاردان ۇيات بولارى انىق. ەكىنشىدەن, بۇل – ەكولوگيا ماسەلەسى. ءبىر قۋانارلىعى, 1-1,5 جىلدىڭ ىشىندە استاناعا گاز كەلىپ, بۇل ماسەلە دە وڭ شەشىلەتىن بولدى. پرەزيدەنتتىڭ ايتۋىنشا, الداعى جىلى تولىقتاي گازعا كوشەتىن بولساق, اتموسفەراعا تارالاتىن زياندى زاتتار 6 ەسەگە نەمەسە جىلىنا 35 مىڭ تونناعا دەيىن تومەندەيدى ەكەن. تۇتىنگە تۇنشىققان استانالىقتاردى الاڭداتقان ماسەلە شەشىمىن تاباتىنىنا شىن قۋاندىق.
تولەن تىلەۋباي,
«استانا اقشامىنىڭ»
پارلامەنتتەگى ءتىلشىسى
