استانانى كوشىرۋ تۋرالى شەشىم 1994 جىلى جاريالاندى. 1997 جىلعى 10 جەلتوقسان – رەسمي تۇردە استانانى الماتىدان اقمولاعا كوشىرۋ كۇنى بولدى. قىسقا مەرزىم ىشىندە ول الەمدىك ماڭىزى بار قالاعا اينالدى. 1999 جىلى يۋنەسكو شەشىمىنە سايكەس بەيبىتشىلىك قالاسى سىيلىعىنا يە بولدى. بۇگىندە قالا قازاقستان تاۋەلسىزدىگىنىڭ سيمۆولىنا اينالدى. كەشە قر تۇڭعىش پرەزيدەنتى – ەلباسى كىتاپحاناسىنىڭ مۋزەيىندە قازاقستان تاۋەلسىزدىگىنىڭ 30 جىلدىعىنا جانە ەلىمىزدىڭ جاڭا استاناسىنىڭ جاريالانۋىنىڭ ەستەلىك كۇنىنە ورايلاستىرىلعان ەلوردانىڭ العاشقى قۇرىلىسشىلارىمەن كەزدەسۋ ءوتتى.
شارا بارىسىندا قالا اكىمى التاي كولگىنوۆ بارلىق قاتىسۋشىلاردى قۇتتىقتاپ, قالانىڭ قۇرىلىسى مەن دامۋىنا قاتىسقان تۇلعالارعا العىسىن ءبىلدىردى. كەزدەسۋگە ەلوردانىڭ كورنەكتى قايراتكەرلەرى جانىبەك كارىبجانوۆ, سۆەتلانا جالماعامبەتوۆا, تولەگەن مۇحامەدجانوۆ, سانسىزباي ەسىلوۆ, سەرىك رۋستامبەكوۆ, فاريت گاليموۆ, اناتولي چەنتسوۆ, الەكساندر ليتۆينوۆ, باير دوسماعامبەتوۆ, بولات قۋانىشەۆ, قايسار وماروۆ, احمەتوللا شاكىروۆ, سەرگەي فوميچەۆ, نيكولاي مەششەرياكوۆ قاتىستى. قالا اكىمىنىڭ العاشقى ورىنباسارلارىنىڭ ءبىرى سانسىزباي ەسىلوۆ شارادا:
– بۇگىن ايتۋلى وقيعا – قالامىزدىڭ قازاقستان رەسپۋبليكاسىنىڭ ەلورداسى بولىپ جاريالانعان كۇنى. كەشە سياقتى سەزىم. بۇگىن ءبىز تاعى دا بارلىعىمەن, قالانىڭ العاشقى اكىمىنىڭ كومانداسىندا بولعان العاشقى قۇرىلىسشىلارمەن كەزدەستىك. بۇگىنگى كەزدەسۋ ءبىز ءۇشىن وتە جاعىمدى. وسى ءىس-شارانى ۇيىمداستىرۋشىعا العىسىمدى بىلدىرگىم كەلەدى. 24 جىل ىشىندە قالا كوز الدىمىزدا وزگەردى. بۇگىنگى تاڭدا بۇل كەرەمەت, جارقىن, جايلى قالا. سوندىقتان ءبىز ونى تەك ماقتان تۇتامىز, – دەدى.
ال 2002-2006 جىلدارى استانا اكىمىنىڭ ورىنباسارى بولعان سەرگەي فوميچەۆتىڭ ايتۋىنشا, 10 جەلتوقسان – بۇل تاريحي كۇن جانە قازىرگى ۋاقىتتا ءومىر ءسۇرىپ جاتقان كوپتەگەن ادامدار ءۇشىن بۇل كۇن سونشالىقتى ەستە قالمايدى, بىراق جىلدار وتەدى جانە بۇل قازاقستان ازاماتتارى ءۇشىن ەڭ ەستە قالارلىق كۇن بولادى.
مۇراجايعا كىرەبەرىستە ۇلتتىق يدەيانى, قۇندىلىقتى, حالقىمىزدىڭ ءال-اۋقاتىن, قوعامدىق كەلىسىم مەن بولاشاققا دەگەن سەنىمدى بەينەلەيتىن ماڭگىلىك ەل كومپوزيتسياسى ورناتىلدى. وسى كومپوزيتسيا اياسىندا ەلوردانىڭ العاشقى قۇرىلىسشىلارى مەرەكەلىك ەستەلىك سۋرەتكە ءتۇستى.
