ەل جۇرەگى – استانا!
بيىلعى استانا كۇنى مەرەكەسى ەرەكشە سالتاناتپەن قازاقستان رەسپۋبليكاسى تاۋەلسىزدىگىنىڭ 25 جىلدىعى اياسىندا اتالىپ وتىلەدى.
استانا قالاسىنىڭ اكىمدىگى ايتۋلى مەرەكەگە وراي ەلوردانىڭ ءاربىر تۇرعىنى مەن قوناقتارىن قىزىقتىرا الاتىنداي مادەني-سپورتتىق شارالار باعدارلاماسىن دايىندادى. مەرەكەلىك شارالار قالانىڭ بارلىق اۋدانىندا, سونداي-اق, شەتكى ايماقتاردا, بارلىق ساياباقتار, گۇلزارلار مەن الاڭداردا ۇيىمداستىرىلاتىن بولادى.
استانا كۇنى مەرەكەسىنە ارنايى كەلۋشىلەردىڭ قاتارى جىل سايىپ كوبەيىپ كەلەدى.
بيىلعى مەرەكەلىك باعدارلامانى «ساحنادان سالەم» تەاترلار فەستيۆالى اشادى. 20-26 ماۋسىم كۇندەرى ساحنا ونەرىنىڭ كورەرمەندەرى ەلىمىزدىڭ ايماقتارىنان كەلەتىن تەاتر ۇجىمدارىنىڭ, سونىمەن قاتار رەسەي جانە ۋكراينا تەاترلارىنىڭ ۇزدىك قويىلىمدارىن تاماشالايتىن بولادى. مەرەكەلىك باعدارلاما جاسىل سۋلى-جەلەك بۋلۆارىندا وتەتىن «AstanaArtFest-2016» قازىرگى زامانعى ونەر فەستيۆالىمەن جالعاسادى. ونىڭ اياسىندا مۋزىكا جانە بي فەستيۆالدەرى, كىتاپ جانە پوەزيا مەرەكەلەرى, سۋرەتشىلەر سيمپوزيۋمى, سونداي-اق, كەلۋشىلەردىڭ كوڭىل-كۇيىن كوتەرۋگە ارنالعان باسقا دا قىزىقتى شارالار ۇيىمداستىرىلادى.
استانالىقتار مەن قالا قوناقتارى جىلدا كۇتەتىن «ازيا جاڭعىرىعى» اتتى تسيرك ونەرى فەستيۆالى دە كورەرمەنىن كۇتەتىن بولادى. «استانا ارقاۋ» تۇركى اۋەندەرى, سونداي-اق, يندۋسترياسىنىڭ ۇزدىك وكىلدەرىنىڭ قاتىسۋىمەن وتەتىن قازىرگى زامانعى مۋزىكا فەستيۆالدەرى دە مەرەكە كورىگىن قىزدىراتىن بولادى. بۇل شارالاردىڭ بارىنە وتاندىق ونەرپازدارمەن قاتار شەتەلدىك ارتىستەر دە قاتىسادى.
استانا كۇنى مەرەكەسى اياسىندا وتاندىق ءسان الەمىنىڭ ۇلگىلەرىن ناسيحاتتاۋ, جۇرتشىلىققا كورسەتۋ ماقساتىندا «ELLE» جۋرنالىنىڭ ەلىمىزدەگى ءسان سالاسىنداعى العاشقى سىيلىعى تابىس ەتىلەدى. سونداي-اق, قازاقستاندىقتار «ارقايىم – كۇن قالاسى» اتتى ۋاقىت تالابىنا ساي جاراقتالعان جاڭا تەحنولوگيالىق 3D-شوۋىن تاماشالاي الادى. ارينە, مەرەكەلىك كوڭىل-كۇيدى «استانا ءازىل Fest» جانە «كوڭىلدى استانا» ازىلقوي ونەرپازدارىنىڭ جۇرتتى قىران-توپان كۇلكىگە قالدىراتىن شوۋ-باعدارلامالارى كوتەرەدى.
بيىل دا دۋماندى مەرەكە اياسىندا «استانا – مىڭجىلدىقتار توعىسىندا» اتتى كوشپەندىلەردىڭ وركەنيەتتى فەستيۆالى دە ءوز ءسان-سالتاناتىمەن جۇرتشىلىقتى باۋرايدى. وندا حالقىمىزدىڭ سان عاسىرلىق تاريحى مەن مادەنيەتى جانە سالت-ءداستۇرى بەينەلەنەدى. تۇرعىندار مەن قوناقتار ەتنو اۋىلعا تىگىلگەن اقبوز ۇيلەرگە ەمىن-ەركىن كىرە الادى. سونىمەن بىرگە العاش رەت «قىمىزمۇرىندىق» فەستيۆالى وتەدى.
«سەرپەر» حالىق اسپاپتار وركەسترىنىڭ فەستيۆالى ۇيىمداستىرىلادى.
حالقىمىز ونەردەن ەشقاشان كەندە بولماعان. اسىرەسە, جۇرت ۇيىپ تىڭدايتىن «باعانالى وردام, باستى وردام» اتتى رەسپۋبليكالىق اقىندار ايتىسىن ەرەكشە ايتۋعا بولادى. ومىردەن ەرتە وزعان كورنەكتى كومپوزيتور سەيدوللا بايتەرەكتىڭ مەرەيتويلىق شىعارماشىلىق كەشى جوعارى دەڭگەيدە وتەدى دەپ كۇتىلۋدە. ەلدىڭ ىستىق ىقىلاسىنا ءبولەنگەن «مۋزارت» توبىنىڭ كونتسەرتىنە كەلۋشىلەر دە كوپ بولماق.
ارينە, ايتۋلى مەرەكەدە سالاۋاتتى ءومىر سالتىن قالىپتاستىراتىن سپورتتىق شارالار دا جەتەرلىك. تۇرعىندار مەن جانكۇيەرلەر حالىقارالىق «جاۋىنگەرلىك ونەر» بايقاۋىن اسىعا كۇتىپ جۇرگەنى انىق. سونىمەن بىرگە قالالىق «دۋاتلون» تۋرنيرى وتەدى. سونداي-اق, ۇلتتىق سپورت تۇرلەرى – اسىق اتۋ, قازاق كۇرەسى جانە كەيىنگى كەزدە اتاعى دۇركىرەگەن «قازاقستان بارىسى» بالۋاندارى كۇش سىناسادى.
دۋماندى شاراعا قازاقستانداعى ءار ەلدىڭ ەلشىلىكتەرى دە بەلسەندى ۇلەس قوسپاق. ايتالىق, امەريكا قۇراما شتاتى ەلشىلىگىنىڭ باستاماسىمەن «بەيبىتشىلىك جانە كەلىسىم» سارايى مەن «بايتەرەك» مونۋمەنتى الدىندا ونەرپازداردىڭ قاتىسۋىمەن «Broadway Bound» اتتى برودۆەي ميۋزيكلى وتەدى. يتاليا ەلشىلىگى «استانا سامالى» دەپ اتالاتىن ۇرلەمەلى وركەسترىنە شاقىردى. مەرەكەلىك ءىس-شارالاردىڭ باعدارلاماسى مەن اقپاراتتارى www.astanaday.kz سايتىندا جاريالانعان.
ال كونتسەرتتەرگە بيلەتتەر قالاداعى «قازاقستان» ورتالىق كونتسەرت زالى, «Mega Astana», «كەرۋەن» ساۋدا-ويىن-ساۋىق ورتالىقتارىنىڭ جانە «كونگرەسس-حولل», «جاستار», «بەيبىتشىلىك جانە كەلىسىم» سارايى جانە قازمەديا ورتالىعى مەن مينيسترلىكتەر ءۇيىنىڭ 11-كىرەبەرىسىندەگى كاسسالاردان جانە www.koncertyastany.kz سايتىنان ساتىپ الا الاسىز.
مەرەكەدەگى كونتسەرتتەردىڭ جازبا كورسەتىلىمى رەسپۋبليكالىق تەلەارنالار ارقىلى بەرىلەدى.