كەشە مەملەكەت باسشىسى نۇرسۇلتان نازارباەۆ «استانا ارەنا» ستاديونى الدىنداعى الاڭدا بوي كوتەرگەن ەتنواۋىلدى ارالاپ, بارشا قازاقستاندىقتاردى ناۋرىز مەرەكەسىمەن قۇتتىقتادى.
– وسىناۋ ىزگى مەرەكە پارلامەنت سايلاۋىن وتكىزۋ ناۋقانىمەن قاتار كەلدى. قازاقستاندىقتار ءبىر ءۇيدىڭ بالاسىنداي اۋىزبىرشىلىگىن كورسەتتى. حالقىمىزدىڭ وسى بىرلىگى مىزعىمايتىن بولسىن. ءبىزدىڭ جاساپ جاتقان ءىسىمىزدىڭ ءبارى قازاقستاندىقتاردىڭ كەيىنگى ۇرپاعىنىڭ يگىلىگى بولىپ قالادى. تاۋەلسىز ەلىمىزدىڭ گۇلدەنۋىنىڭ ارقاسىندا ەلىمىزدى بولاشاققا اپاراتىن جول جارقىن جەتىستىكتەرگە تولى بولماق, – دەدى ەلباسى.
ناۋرىز مەرەكەسى كەزىندە بارشا تابيعات جاڭارىپ, ادامدار ءبىر-بىرىنە دەگەن وكپە-رەنىشىن كەشىرگەن. مۇقتاج جاندارعا كومەكتەسكەن. وسى كۇندەرى اعاش وتىرعىزۋ, بۇلاق كوزىن اشۋ سىندى يگى ىستەر جاسالعان. وسىنى اتاپ وتكەن قازاقستان پرەزيدەنتى: «حالىق بۇل كۇنى تىلەگەن تىلەكتەر مىندەتتى تۇردە ورىندالاتىنىن ايتادى. مەن ءاربىر شاڭىراققا باقىت, شاتتىق شۋاعىن جانە بار جاقسىلىقتى تىلەيمىن» دەپ ءسوزىن تۇيىندەدى.
«استانا ارەنا» ستاديونى ماڭىنا جينالعان جۇرت كونتسەرتتى تاماشالاپ, سپورتتىق جارىستاردى تاماشالادى. مەرەكە بارىسىندا تۇساۋكەسەر, بەسىككە سالۋ, سىرعا سالۋ, قىز ۇزاتۋ, قۇدا ءتۇسۋ سىندى حالقىمىزدىڭ سالت-ءداستۇرى كورسەتىلىپ, «توعىزقۇمالاق» جانە باسقا ۇلتتىق ويىنداردان سايىس ءوتتى.
امانعالي قالجانوۆ
astana-akshamy.kz
