تۇڭعىش پرەزيدەنت – ەلباسى نۇرسۇلتان نازارباەۆ رەسەي فەدەراتسياسىنىڭ پرەزيدەنتى ۆلاديمير پۋتينمەن كەزدەستى. كەزدەسۋدە تاراپتار وڭىرلىك جانە حالىقارالىق كۇن تارتىبىندەگى اسا وزەكتى ماسەلەلەر بويىنشا پىكىر الىستى. ەلباسى رەسەي فەدەراتسياسىنىڭ پرەزيدەنتىنە تمد-عا مۇشە مەملەكەتتەر كوشباسشىلارىنىڭ بەيرەسمي سامميتىنە جوعارى ەۋرازيالىق ەكونوميكالىق كەڭەستىڭ قۇرمەتتى توراعاسى رەتىندە قاتىسۋعا شاقىرعانى ءۇشىن ريزاشىلىعىن ءبىلدىردى.
«قۇرمەتتى توراعا رەتىندە بۇگىن بەيرەسمي كەزدەسۋگە قاتىسامىن. مەن 1991 جىلعى جەلتوقساندا الماتىدا تمد-نىڭ قۇرىلۋ ساتىنە كۋا بولعانداردىڭ ءبىرىمىن. بۇل تاريحي وقيعانىڭ قالاي بولعانىن جاقسى بىلەمىن» دەدى نۇرسۇلتان نازارباەۆ.
قازاقستاننىڭ تۇڭعىش پرەزيدەنتى سونداي-اق ەۋرازيا ەكونوميكالىق وداعىن ودان ءارى دامىتۋدىڭ ماڭىزدىلىعىنا توقتالىپ, بۇل ينتەگراتسيالىق بىرلەستىكتىڭ ءتيىمدى ءارى وزەكتى ەكەنىن ايتتى.
«ەۋرازيا ەكونوميكالىق وداعى تولىق قۇرىلدى, وعان كوپشىلىك كوز جەتكىزىپ وتىر. پاندەمياعا قاراماستان تەك قازاقستان مەن رەسەي اراسىنداعى تاۋار اينالىمىنىڭ كولەمى 24 ميللياردتى قۇرايدى. بۇل – بۇعان دەيىنگى جىلداردا بولىپ كورمەگەن رەكورد. ءبىزدىڭ مىندەتىمىز – ەۋرازيا ەكونوميكالىق وداعىن دامىتا ءتۇسۋ, قاۋىمداستىرىلعان مۇشەلەر مەن بايقاۋشىلاردى قابىلداۋ, جاڭا مۇشەلەرگە مۇنىڭ ءتيىمدى ەكەنىن دالەلدەۋ. ويتكەنى كونسەنسۋس نەگىزىندە جۇمىس ىستەيتىن بۇل بىرلەستىك ونىڭ بىردە-ءبىر مۇشەسىنىڭ قۇقىعى مەن مۇددەلەرىنە نۇقسان كەلتىرمەيدى» دەدى نۇرسۇلتان نازارباەۆ.
ۆلاديمير پۋتين قازاقستاننىڭ تۇڭعىش پرەزيدەنتىنىڭ ەۋرازيا ەكونوميكالىق وداعىن قۇرۋعا جانە ەۋرازيا قۇرلىعىندا ەكونوميكالىق ينتەگراتسيانى ودان ءارى دامىتۋعا قوسقان ۇلەسىن اتاپ ءوتتى.
«قازىر پاندەمياعا بايلانىستى جاعداي وتە كۇردەلەنىپ, بۇكىل دۇنيە جۇزىندە ءوندىرىس تومەندەگەن تۇستا ءبىزدىڭ وزىڭىزبەن بىرگە جاساعان مەحانيزمدەرىمىز بەن قۇرالدارىمىز ءتيىمدى جۇمىس ىستەپ تۇر. قازاقستانمەن قارىم-قاتىناسىمىزعا توقتالعاندا 2020 جىلى پاندەميا ەڭ كۇشەيگەن كەزەڭدە دە ەكونوميكامىزدىڭ قاتتى قۇلدىراۋىنا جول بەرمەگەنىمىزدى ايتساق جەتكىلىكتى. ال بيىلعى جىلدىڭ العاشقى توعىز ايىندا ءوسۋ كورسەتكىشى 30 پايىزدان استى. ارينە, بۇل – قازاقستاننىڭ قازىرگى باسشىلىعىمەن ءبىزدىڭ بىرلەسكەن جۇمىسىمىزدىڭ ماڭىزدى ناتيجەسى» دەدى رەسەي فەدەراتسياسىنىڭ پرەزيدەنتى.
***
قازاقستاننىڭ تۇڭعىش پرەزيدەنتى نۇرسۇلتان نازارباەۆ رەسەي فەدەراتسياسىنىڭ پرەزيدەنتى ۆلاديمير ءپۋتيننىڭ شاقىرۋىمەن تمد-عا مۇشە مەملەكەتتەر كوشباسشىلارىنىڭ بەيرەسمي كەزدەسۋىنە قاتىستى. سامميت بارىسىندا وڭىرلىك جانە حالىقارالىق كۇن تارتىبىندەگى وزەكتى ماسەلەلەر, سونىمەن قاتار كوروناۆيرۋس پاندەمياسىنا قارسى شارالار مەن وسى باعىتتاعى ىنتىماقتاستىق پەرسپەكتيۆالارى تالقىلاندى.
