ەلىمىزدىڭ ءار ايماعىنان كەلگەن جاستاردىڭ جولى ەلوردادا ءتۇيىسىپ, ولاردىڭ اراسىندا شاڭىراق كوتەرەتىندەرى از ەمەس. سولاردىڭ ءبىرى – ايدار مەن ايناگۇل سۇلەيمەنوۆتەر.
كەشە جاس جۇبايلار استانا قالاسىنىڭ اكىمى باقىت سۇلتانوۆتىڭ قابىلداۋىندا بولدى. ايتۋلارىنشا, ايدار «ەكسپو» كورمەسىندە جۇمىس ىستەگەن. ايناگۇل كورمەنى تاماشالاۋعا كەلسە دە, ءبىر-بىرىمەن جولىقپاپتى. كەيىننەن الەۋمەتتىك جەلىدە حات الماسىپ, ءبىر ۇيدە تۇراتىندارىن بىلگەن. سودان كوپ ۇزاماي جاستار كوڭىل قوسىپ, جۇپتاسۋعا ۋاعدالاسقان. ۇيلەنۋ تويىنىڭ الدىندا كۇيەۋ جىگىت مەملەكەت باسشىسىنىڭ باتاسىن الۋدى ماقسات تۇتىپ, قاڭتاردا اقورداعا ەلەكتروندى حات جولداپ, ۇيلەنۋ تويىنا پرەزيدەنتتى دە شاقىرىپتى.
– بۇل مەنىڭ يدەيام بولدى. وسى كۇننىڭ ماڭگىگە ەستە قالعانىن قالادىم. بىرىنشىدەن, ەكەۋمىزدىڭ دە اكەمىزدىڭ كوزى ءتىرى ەمەس. سول سەبەپتى ۇلى ادامداردىڭ باتاسىن الساق, نۇر ۇستىنە نۇر بولار دەگەن وي كەلدى. ءبىزدى بايلانىستىرعان استاناعا راقمەت. وسىلايشا وتباسىن قۇرىپ, ەلوردادا ءومىر ءسۇرىپ جاتقانىمىزعا وتە قۋانىشتىمىز, – دەدى ايدار سۇلەيمەنوۆ.
باقىت سۇلتانوۆ جاس جۇبايلارعا مەملەكەت باسشىسى نۇرسۇلتان نازارباەۆتىڭ قۇتتىقتاۋ حاتىن تابىستادى. قالا باسشىسىنىڭ ايتۋىنشا, ەلباسى جاس جۇبايلاردىڭ شاقىرۋ حاتىن ىستىق ىقىلاسپەن قابىل الىپ, ايدار مەن ايناگۇل سۇلەيمەنوۆتەردى وتباسىلىق ومىرگە قادام باسۋلارىمەن قۇتتىقتاعان. سونداي-اق مەملەكەت باسشىسى قوس عاشىققا زور دەنساۋلىق, باقىت پەن جارقىن بولاشاق تىلەگەن ەكەن.
– سىزدەردى قالا تۇرعىندارى اتىنان زاڭدى نەكەلەرىڭىزبەن شىن جۇرەكتەن قۇتتىقتايمىن! وسى جىلدى ەلباسىنىڭ «جاستار جىلى» دەپ جاريالاۋى – سىزدەر سياقتى ازاماتتارعا دەگەن ارتىلعان ءۇمىت پەن مۇمكىندىك. سىزدەرگە تاتۋلىق پەن باق-بەرەكە تىلەيمىن! – دەدى باقىت سۇلتانوۆ.
