ەلدىگىمىزدىڭ, ەرلىگىمىزدىڭ مەرەكەسى

استانادا 11-13 قىركۇيەك كۇندەرى قازاق حاندىعىنىڭ 550 جىلدىعىنا ارنالعان سالتاناتتى شارالار وتەدى.

بۇل تۋرالى ورتالىق كوممۋنيكاتسيالار قىزمەتىندەگى بريفينگتە قر مادەنيەت جانە سپورت مينيسترلىگى مادەنيەت جانە ونەر ىستەرى دەپارتامەنتىنىڭ ديرەكتورى اقتوتى رايىمقۇلوۆا ءمالىم ءوتتى.

بيىلعى مەملەكەتتىك مەرەيتويلاردىڭ ىشىندە ۇلتتىق  تاريحىمىزدى, شىققان تامىرىمىزدى تۇپتەپ تانۋعا, ەلدىگىمىزدى باعالاپ, ەرلىگىمىزدى دارىپتەۋگە جەتەلەيتىن – قازاق حاندىعىنىڭ 550 جىلدىق تويىنىڭ سالماعى ايرىقشا دەسەك بولادى. سوندىقتان دا, ايتۋلى مەرەكە ەكى كەزەڭدە وتپەك. العاشقىسى – استانادان باستاۋ السا, ەكىنشىسى – 9 قازاندا  قازاق حاندىعىنىڭ تۋى تىگىلگەن تالايعى تاراز جەرىندە جالعاسپاق.

اقتوتى رايىمقۇلوۆانىڭ ايتۋىنشا, 11 قىركۇيەك كۇنى تاۋەلسىزدىك سارايىندا قازاق حاندىعىنىڭ 550 جىلدىعىنا ارنالعان سالتاناتتى جيىن وتەدى. ال, تۇستەن كەيىن نازارباەۆ ۋنيۆەرسيتەتىندە «ماڭگىلىك ەل» تاقىرىبىندا حالىقارالىق عىلىمي-تاجىريبەلىك كونفەرەنتسيا ۇيىمداستىرىلماق. سونداي-اق, كەشقۇرىم «بارىس» مۇز سارايىندا تەاترلاندىرىلعان مازمۇندى قويىلىم كورسەتىلەدى.

وسىعان وراي, استانا قالالىق  مادەنيەت باسقارماسىنىڭ باسشىسى بولات ماجاعۇلوۆ:  – ۇلكەن مەرەكە اياسىندا «قازاق ەلى» مونۋمەنتى الاڭى ءۇش كۇنگە ەلوردا تۇرعىندارى مەن قالا قوناقتارى تاماشالاي الاتىن ۇلكەن ەتنو-اۋىلعا اينالادى. الاڭدا ەلۋ كيىز ءۇي تىگىلىپ, ەكى ۇلكەن ساحنا, التىباقاندار, سپورتتىق الاڭدار, تايقازاندار جانە باسقا دا نىساندار ورناتىلادى, – دەدى.

باس قالادا وتەتىن مەرەيتويدى باستاپ بەرۋ مىندەتى حالقىمىزدىڭ ارداقتى ۇلى ءاسانالى اشىموۆكە جۇكتەلىپتى. اتاقتى تۇلعا ايتۋلى مەرەكە جايىندا دا ءوز پىكىرىن ءبىلدىرىپ:

–  حالقىمىز ءۇشىن قازاق حاندىعىنىڭ 550 جىلدىق مەرەكەسىنىڭ ورنى بولەك. بۇگىنگى وسكەلەڭ  ۇرپاق جاستايىنان ەلىنىڭ تاريحىن,  داستۇرىن ءبىلىپ ءوسۋى كەرەك.  جۋىردا مەن ورالداعى بوكەي, جاڭگىر حاندار ءومىر سۇرگەن  «وردا»  دەگەن تاريحي ەلدە بولدىم. ول جەردە دە كولەمدى شارالار  ءوتتى. ەندى ەلوردا تورىندە  ايتۋلى مەرەكە تويلانباق.  وسى ايرىقشا ۋاقيعانى باستاپ بەرۋ مىندەتى ماعان تاپسىرىلعانىنا ەرەكشە باقىتتىمىن. سونداي-اق, مەن قىزمەت ىستەيتىن م.اۋەزوۆ تەاترىنىڭ ارتىستەرى دە وسى شاراعا اتسالىسادى, – دەدى.

         ايتپاقشى,  مەرزىمدى باسپاسوزدە دە, الەۋمەتتىك جەلىدە دە قازاق حاندىعىنىڭ تورقالى تويىنا وراي  قولعا الىنعان فيلم جايىندا ءتۇرلى پىكىرلەردىڭ  ايتىلىپ جۇرگەنى ءمالىم. سوندىقتان,  اقتوتى رايىمقۇلوۆا جاڭا تۋىندىعا قاتىستى:

– كينو ءوندىرىسى وتە كۇردەلى سالا بولىپ ەسەپتەلەدى. ونى دايىنداۋ, اكتەرلاردى ىرىكتەۋ, ءتۇسىرۋ مەرزىمدەرى بولادى. بۇگىنگى تاڭدا قازاق حاندىعى تۋرالى فيلم دايىندىق مەرزىمىنەن ءوتىپ, ءتۇسىرىلىم جۇمىستارىنا كىرىستى. جەلتوقسانعا قاراي العاشقى سەريالاردى كورەمىز دەگەن ۇمىتتەمىز, – دەدى.

 ازامات ەسەنجول