ەلدىك باستاما
ەلباسى پارلامەنت پالاتالارىنىڭ بىرىككەن وتىرىسىندا جاريا ەتكەن «بەس الەۋمەتتىك باستامانى» ءبىلىم-عىلىم سالاسى, سونىڭ ىشىندە جوعارى مەكتەپ زور ىقىلاسپەن قابىلدادى.
بۇل توسىن دا جاڭاشىل ۇندەۋ – ءاربىرىمىزدىڭ تاعدىرىمىز تۋرالى. ەلىمىزدىڭ شيرەك عاسىرداعى ناتيجەلى ەڭبەگىنىڭ ماڭىزدى كەزەڭى جونىندە. الەۋمەت پەن الەۋەت بايانى – جارقىن ىستەردى جالعاستىرۋدىڭ كوزى مەن تەتىگى تۋرالى.
ءيا, بۇل ۇندەۋدىڭ اتى – «پرەزيدەنتتىڭ بەس الەۋمەتتىك باستاماسى».
بۇل – ەلباسىنىڭ ءجۇز ويلانىپ, ءجۇز تولعانعان ەل ەڭسەسىن تىكتەتەتىن, ەلدىكتىڭ باياندى مۇراتتارىن كورسەتەتىن ناقتى ءىس جوسپارى.
ءتىپتى «بەس باستاما» دەگەننىڭ دە ءرامىزدى ءمانى بار. مۇندا بىرلىك پەن تىرلىكتىڭ, جۇمىلۋ مەن سەرپىلۋدىڭ سيپاتى اڭعارىلادى.
ءار وتباسى جەڭىلدىكپەن پاتەرلى بولىپ جاتسا, سالىق جۇيەسى ودان سايىن وڭتايلانسا, جوعارى مەكتەپكە دەگەن مەملەكەتتىك ىنتا-ىقىلاس ارتا تۇسسە, نەسيە نەگىزى ءناسىپ اينالسا, الەۋمەتتىڭ ياكي حالىقتىڭ قۋانىشى ەسەلەنە تۇسەدى. الەۋمەتتىك باستامانىڭ الەۋەتى دە – وسىندا!
جالپى, «پرەزيدەنتتىڭ بەس الەۋمەتتىك باستاماسىنىڭ» جەمىسىن, بۇيىرسا, قازاقستاننىڭ بار ءوڭىرى, بارشا ازاماتتارى ءبىر كىسىدەي كورەدى. ۇندەۋدىڭ ءون بويىندا ەلباسى الەۋمەتتىك سەرپىلىس پەن ەل بىرلىگىن قاتار ايتىپ وتىردى. اسىرەسە, «بۇل – ءبىزدىڭ قوعامنىڭ الەۋمەتتىك بىرلىگىن نىعايتۋ ءۇشىن جىگەرىمىزدى جانىپ, ناقتى ىسكە كىرىسەتىن ءسات. ءبىز ونى اۋقىمدى الەۋمەتتىك جوبالار ارقىلى جۇزەگە اسىرامىز. مەملەكەت وسىنداي تۇبەگەيلى شارالاردى قولعا الادى. «قازاقستان – ءبىزدىڭ ورتاق ءۇيىمىز» دەگەن يدەيا جاڭا ماعىنامەن تولىعا تۇسۋگە ءتيىس» دەگەن ويدا قانشاما تەرەڭ ماعىنا بار.
مەملەكەت باسشىسى قاشاندا ەلىنە سەنەدى, ەل ەلباسى ءسوزىنىڭ ابدەن بايىپتالىپ, تارازىلانىپ, زەردەلەنىپ ايتىلاتىنىن بىلەدى. سوندىقتان ۇندەۋدەگى: «مەن وركەندەگەن قازاقستان – ەڭ الدىمەن مەملەكەتى ءوزىن قورعاپ, قولدايتىنىن, قامقورلىق جاسايتىنىن سەزىنەتىن, تيىسىنشە ەلىن جان جۇرەگىمەن سۇيەتىن, وزدەرىنە سەنىمدى ادامدار دەپ سانايمىن» دەگەن جولدار ايرانداي ۇيىعان حالقىمىزدى ودان سايىن توپتاستىرا ءتۇستى.
الەۋمەتتىك 5 باستامانىڭ ءبىر باستاماسى جوعارى ءبىلىم سالاسىنا ارنالعانى جاستاردىڭ وتانعا دەگەن سەنىمى مەن ءۇمىتىن تەرەڭنەن سەزىنۋ دەپ بىلەمىز. بۇل رەتتە ەلباسى: «ءبىز الەمدىك ستاندارتتارعا ساي ءبىلىم بەرۋ جۇيەسىن قالىپتاستىرا وتىرىپ, ستۋدەنتتەردىڭ ءبىلىم الۋىنا جانە تۇراتىن جەرىنە جاعداي جاساۋعا ءتيىستى نازار اۋدارۋىمىز قاجەت» دەدى. مەملەكەتتىك ءبىلىم گرانتىن – 20 مىڭعا, ستۋدەنتتەر ۇيىندەگى جاتىن ورىندى 75 مىڭعا ارتتىرۋ ناقتى جۇمىستاردىڭ ءبىر پاراسى عانا. بۇل ايادا ەلگە قاجەتتى ماماندىقتاردىڭ سۇرانىسى مەن تالابىن قۇنتتاۋ, جاتاقحانانى سالاماتتىلىق پەن بىرلىكتىڭ قۇتحاناسىنا اينالدىرۋ سىندى ءماندى جۇمىستار كۇتىپ تۇر. مۇنى دا مەملەكەت باسشىسى قاداپ تۇرىپ ايتتى. جاستاردى ءبىلىمدى دە بىلىكتى ەتۋ ءىسىن «ادام رەسۋرستارىنا سالىناتىن ۇلكەن سالىم» دەپ اتاپ كورسەتتى.
«پرەزيدەنتتىڭ بەس الەۋمەتتىك باستاماسى» – ەلباسىنىڭ اقىلى, پاراساتى, تاباندىلىعى, شەبەرلىگى, قاجىر-قايراتى, مەيىرىمى, ارمانى, ءۇمىتى. مۇنىڭ ءبارى ماڭگىلىك ەل مۇراتىمەن, رۋحاني جاڭعىرۋ جولىمەن, ءازىز تاۋەلسىزدىگىمىزدىڭ تالابىمەن تۇتاسادى.
بىرىنشىدەن, بۇل ۇندەۋ – ۇلتتىق دامۋدىڭ جاڭا باعدارلاماسى.
ءبىز, ءبىلىم سالاسىنىڭ ماماندارى, تاۋەلسىزدىك جىلدارداعى ەلباسىنىڭ, ەلشىل ازاماتتارىمىزدىڭ, تاتۋ حالقىمىزدىڭ ماڭداي تەرىن, ىزگى نيەتىن كوردىك. تالاي سىنعا توتەپ بەردىك. مىنا بەس باستاما – الەمدىك ەكونوميكالىق داعدارىستىڭ سىن-قاتەرىنە قازاقستان جولىنىڭ جاۋابى.
ەكىنشىدەن, نۇرسۇلتان نازارباەۆ – جاي ەل باسشىسى ەمەس, قۇرۋشى, جاسامپاز, كورەگەن پرەزيدەنت. سوندىقتان استانانى دەر كەزىندە تۇرعىزعانداي, الەمدىك ەكسپو كورمەسىن جايقالتقانداي, بولاتىندى كەيىنگە قالدىراتىن ۋاقىت جوق. ەندەشە, بۇل الەۋمەتتىك الەۋەتتى باستامالار – جاڭا قازاقستاننىڭ تۇلا بويىنا ودان سايىن قان جۇگىرتەتىن, ەلىمىزدىڭ ءتورت تارابىن ءبىر ىرعاقپەن سەرپىلتەتىن جاسامپازدىق جولى.
ۇشىنشىدەن, ەلباسى تاۋەلسىزدىك جىلدارى اركەز «ءبىزدىڭ ءوز جولىمىز بار» دەپ مالىمدەدى. بۇل باستامالار – قازاقستان جولىنىڭ باتىل تاجىريبەسى, قازاقستان جولىنىڭ بىرلىك ەپوپەياسى بولعالى تۇر.
قازاقستان مەملەكەتىنىڭ ءاربىر بەلەستى كەزەڭىنە كۋا بولۋ – زامانداستارىمىزدىڭ اسقاق ارمانى. ءبىز ءبارى ويداعىداي بولاتىنىنا سەنىمدىمىز.
ەرلان سىدىقوۆ,
استانا قالالىق ءماسليحاتىنىڭ دەپۋتاتى,
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ
رەكتورى, اكادەميك