Nur Otan پارتياسى نۇر-سۇلتان قالالىق فيليالىندا «پرەزيدەنت قاسىم-جومارت توقاەۆتىڭ 10 مىندەتى: مەملەكەتتىڭ الەۋمەتتىك-ەكونوميكالىق دامۋ باسىمدىقتارى» اتتى دوڭگەلەك ۇستەل ءوتتى. ونىڭ جۇمىسىنا ساياسي پارتيالاردىڭ, مەملەكەتتىك ورگانداردىڭ, ۇكىمەتتىك ەمەس ۇيىمداردىڭ, زيالى قاۋىمنىڭ وكىلدەرى, جوعارى وقۋ ورىندارىنىڭ پروفەسسورلارى مەن وقىتۋشىلارى, Nur Otan پارتياسى «جاس وتان» جاستار قاناتىنىڭ ەلوردالىق فيليالىنىڭ بەلسەندىلەرى قاتىستى. باسقوسۋ بارىسىندا جينالعان قاۋىم پرەزيدەنتتىڭ جانىنان قۇرىلاتىن ۇلتتىق قوعامدىق سەنىم كەڭەسىنىڭ جۇمىسىن ۇيىمداستىرۋ, ونى دامىتۋعا قاتىستى تۇشىمدى وي-پىكىرلەرىن, ۇتىمدى ۇسىنىستارىن ورتاعا سالدى. وسى جيىندا ايتىلعان پاراساتتى پىكىرلەر مەن ورامدى ويلاردى ىقشامداپ جاريالاپ وتىرمىز.
سارسەنباي مىڭباەۆ, بايقوڭىر اۋداندىق ارداگەرلەر كەڭەسىنىڭ توراعاسى:
– قازىر بيلىك پەن بۇقارانىڭ اراسى ءسال الشاقتاپ كەتتى. نەگىزى, الشاقتىق بولماۋ كەرەك. بيلىك حالىقپەن ەتەنە ارالاسىپ, قوعامداعى كۇرمەۋى شەشىلمەگەن ماسەلەلەردىڭ بارلىعىنىڭ ءتۇپ-تامىرىنا ءۇڭىلىپ, وڭتايلى شەشۋ جولدارىن قاراستىرعانى ابزال. پرەزيدەنتتىڭ 10 مىندەتىنىڭ ىشىندەگى ەڭ باستىسى – الەۋمەتتىك ماسەلەلەر. ءبىزدىڭ قوعامدا الەۋمەتتىك ماسەلەلەر رەت-رەتىمەن شەشىلۋدە. بىراق ونى اركىم ءارتۇرلى تۇسىنەدى. مەن ءبىر مىسال كەلتىرەيىن. وسىدان 20 جىل بۇرىن ەلوردادا جەدەل جاردەم شاقىرساڭ, دارىگەرلەر: «ەكپەڭىز بار ما, سالىپ بەرەيىن» دەيتىن. «اۋرۋحاناعا جاتاتىن بولساڭ, ىدىس-اياعىڭدى, جايماڭدى وزىڭمەن الا كەل» دەگەن سوزدەردى ءوز قۇلاعىمىزبەن ەستىدىك, كوزىمىزبەن كوردىك. جۋىردا ءبىر وقيعانىڭ كۋاسى بولدىم. ەلوردانىڭ №2 اۋرۋحاناسىنا ءبىر ادامدى اپاردىم. ناۋقاستىڭ جانىنا ءبىر دارىگەردى ىلەستىرىپ, 2 ساعاتتىڭ ىشىندە بارلىق تەكسەرىستەن وتكىزىپ, قانداي ەم-دوم قابىلدايتىنىن انىقتادى. ءارى تاڭعالدىم, ءارى قۋاندىم.
تولەگەن كۇنادىلوۆ, نۇر-سۇلتان قالالىق كاسىپوداقتار ورتالىعى توراعاسىنىڭ ورىنباسارى:
– ەلىمىزدە جىل سايىن 1,5 مىڭ ادام وندىرىستە جاراقات الادى. سونىڭ ىشىندە 200 ادام كوز جۇمادى. 2018 جىلى ەلوردادا وسىنداي 58 وقيعا تىركەلىپ, سونىڭ ىشىندە 15-ءى مەرت بولعان. قايعىلى 15 وقيعانىڭ 12-ءسى قۇرىلىستا تىركەلگەن. بۇل جاعدايدىڭ سەبەپتەرىن زەرتتەي كەلە انىقتالعانى, «بازيس-ا», «BI Group» سياقتى ءىرى-ءىرى باس مەردىگەرلەر ءارتۇرلى جۇمىستارعا ۇساق قۇرىلىس بريگادالارىن تارتادى ەكەن. حالىقتىڭ اراسىندا «جابايى بريگادا» دەپ اتالاتىن مۇنداي ۇجىمدار كوبىنەسە ەڭبەك شارتىن جاساسپايتىن, ءبىلىمى تاياز ادامداردان قۇرالادى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتتەرى بويىنشا وندىرىستەگى جاراقات الۋ وقيعالارىنىڭ دەنى تاڭەرتەڭ بولادى ەكەن. سوندىقتان قايعىلى جاعدايلاردىڭ الدىن الۋ ءۇشىن قالالىق كاسىپوداقتار ورتالىعى سپورتتىق-ساۋىقتىرۋ كەشەنىن اشتى.
باعداۋلەت جاندىلداەۆ, Nur Otan پارتياسى «جاس وتان» جاستار قاناتىنىڭ نۇر-سۇلتان قالالىق فيليالىنىڭ باسشىسى:
– بيىل – جاستار جىلى, كەلەسى جىلى – ەرىكتىلەر جىلى. مەملەكەت جاستاردى جان-جاقتى قولداۋعا ەرەكشە كوڭىل بولۋدە. مەنىڭشە, پرەزيدەنتتىڭ جانىنان قۇرىلاتىن ۇلتتىق قوعامدىق سەنىم كەڭەسىنە جاستار وكىلدەرىن كوبىرەك تارتۋ قاجەت. ويتكەنى ولار وي-ۇسىنىستارىن اشىق ايتادى. مىسالى, «جاس وتان» جاستار قاناتىنىڭ ەلوردالىق فيليالىنىڭ «ەركىن پىكىر» اتتى پىكىرسايىس پلاتفورماسى بار. وسى الاڭدا جاستار وزدەرىن تولعاندىرعان بارلىق تاقىرىپتارعا قاتىستى وي-پىكىرلەرىن, ۇسىنىس-تىلەكتەرىن اشىق جەتكىزىپ ءجۇر.
