قوعامدىق كولىك 70 پايىزعا جاڭاردى
قالا باسشىسى جولاۋشىلار كولىگىنىڭ تۇراقتى جۇمىس ىستەۋى حالىقتىڭ جايلى ءومىر ءسۇرۋ دەڭگەيىنىڭ ءبىر كورسەتكىشى بولىپ تابىلاتىنىن اتاپ ءوتتى. «جولاۋشىلار مەن اۆتوكولىك جۇرگىزۋشىلەرى وزدەرى تۇراتىن قالادا قولايلى, جايلى ءومىر ءسۇرۋى ءۇشىن جىل سايىن اۆتوپاركىمىز جاڭارىپ وتىرادى. ماسەلەن, باس قالانىڭ قوزعالمالى قۇرامى 70 پايىزعا جاڭاردى. ماماندار اۆتوبۋستاردى دەر ۋاقىتىندا جوندەپ, تەكسەرىستەن وتكىزەدى» دەدى التاي سەيدىرۇلى.
قالالىق اكسەلەراتوردىڭ شەڭبەرىندە قۇرىلعان جۇمىس توبى قوعامدىق كولىكتى ودان ءارى جەتىلدىرۋ جۇمىستارىمەن اينالىسۋدا. وسى ماسەلەنى تىلگە تيەك ەتكەن اكىم نۇر-سۇلتاننىڭ «جاسىل» ەكونوميكاعا كوشەتىنىن جەتكىزدى. «جىل سايىن قالا تۇرعىندارىنىڭ سانى ءوسىپ كەلەدى. حالىق كوبەيگەن سايىن اۆتوكولىكتەردىڭ سانى دا ۇلعايۋدا. قورشاعان ورتاعا تارالاتىن قالدىقتاردى قىسقارتۋعا ۇمتىلىپ جاتىرمىز. وسىعان وراي, جىلدىڭ سوڭىنا دەيىن 100 ەلەكترواۆتوبۋس ساتىپ الامىز. جانە ونىمەن شەكتەلىپ قالمايمىز» دەپ مالىمدەدى ا.كولگىنوۆ.
سەرۆيستىڭ ساپاسىنا شاعىم كوپ
قازىرگى تاڭدا ەلوردانىڭ جولاۋشىلار كولىگى سالاسىندا 3 مىڭنان اسا ادام جۇمىس ىستەيدى. كۇن سايىن 900 اۆتوبۋس جولعا شىعادى, ولاردا 1700 ادام ەڭبەك ەتەدى. بۇل سالاداعى دامۋدىڭ ءبىر كورسەتكىشى – جاڭا كولىكتەر. مىسالى, سوڭعى 5 جىلدا قالا بيلىگى 700-دەن اسا جاڭا اۆتوبۋس ساتىپ العان. جولاۋشىلارعا قىزمەت كورسەتەتىن كولىكتەردىڭ بارلىعى زاماناۋي بەينەباقىلاۋ ءجۇيەسىمەن جابدىقتالعان. جاڭا اۆتوبۋستاردىڭ بارىندە ەرەكشە قاجەتتىلىكتەرى بار ادامداردى تاسىمالداۋعا ارنالعان پاندۋستار بار. بۇعان قوسا, جەرگىلىكتى بيلىك اۆتوبۋستاردىڭ قولايلى جاعدايدا ءجۇرىپ-تۇرۋى ءۇشىن كوشەلەردەگى تاسجولدارعا ۇنەمى جوندەۋ جۇمىستارىن جۇرگىزەدى.
قالا باسشىسى قوعامدىق كولىكتىڭ باسىمدىعىن ارتتىرۋدىڭ ماڭىزدىلىعىنا توقتالدى. باس قالادا اۆتوبۋستارعا ارنالعان Bus Lane ارنايى جول جولاقتارىنىڭ پايدا بولۋى اۆتوبۋستاردىڭ قوزعالۋ جىلدامدىعىن ارتتىرا ءتۇستى. «ەگەر دە ادامدار قوعامدىق كولىكتى كوبىرەك پايدالاناتىن بولسا, بۇل قالا دامۋىنىڭ ءبىر كورسەتكىشى بولىپ تابىلادى. قازىر Bus Lane ەنگىزىلگەننەن كەيىن جولاۋشىلار دىتتەگەن جەرىنە جەڭىل اۆتوكولىكتەردەن جىلدامىراق جەتەتىن بولدى. بۇعان قوسا, بيلەت ساتۋدى ەلەكتروندىق جۇيەگە كوشىرۋ اۆتوپاركتەردىڭ تابىسىن 40 پايىزعا دەيىن كوتەرۋگە مۇمكىندىك تۋعىزدى» دەپ اتاپ ءوتتى ا.كولگىنوۆ.
الايدا ەلورداداعى قوعامدىق كولىكتەگى قىزمەت كورسەتۋدىڭ دەڭگەيىنە حالىقتىڭ كوڭىلى تولماي وتىرعانى راس. بۇل ماسەلەنى اشىق ايتقان اكىم ناقتى مىسالدار كەلتىردى. ونىڭ ايتۋىنشا, بيىل قوعامدىق كولىكتەگى قىزمەتكە قاتىستى اكىمدىككە كەلىپ تۇسكەن شاعىمدار 60 پايىزعا (2018 جىلى – 13 مىڭ, 2019 جىلى – 21 مىڭ) دەيىن ۇلعايعان. «ەگەر 2018 جىلى قىزمەت كورسەتۋ ساپاسىنا قاتىستى 13 مىڭ شاعىم تۇسسە, بيىل ونىڭ كولەمى 21 مىڭعا دەيىن ءوسىپ وتىر. بىزگە بۇل ساندى تۇزەتۋ كەرەك. ءبىز قازىر قوعامدىق كولىك سالاسىنا قاتىسۋشىلاردىڭ بارىنە قولايلى جاعداي تۋعىزۋ ءۇشىن جۇمىس ىستەپ جاتىرمىز. ەڭ باستىسى – جولاۋشىلاردىڭ قاۋىپسىزدىگىن تولىق قامتاماسىز ەتۋ» دەپ ءتۇسىندىردى ماسەلەنى اكىم.
