بۇرىن مۇعالىمدەر قاۋىمى ەلەكتروندى وقۋلىقتاردى كۇندەلىكتى جۇمىسىندا پايدالانۋ تۋرالى ويلانباعان بولسا, بۇگىندە ولاردىڭ كوپشىلىگى جاڭا قۇرالدارعا سۇيەنەتىنى راس.
قازىرگى ۋاقىتتا ەلەكتروندى وقۋلىقتار تەحنولوگياسى تۋرالى كوپتەگەن داۋ-داماي, الۋان ءتۇرلى تۇسىنىك بار. كوپشىلىك بۇل ەلەكتروندى رەسۋرستى ەنگىزۋدى قولداسا, كەيبىرەۋلەرى قارسى.
سونىمەن, ەلەكتروندى وقۋلىق دەگەنىمىز نە جانە ونىڭ زاماناۋي ءبىلىم بەرۋ مەكەمەسىندەگى ءرولى قانداي؟ وسىعان تولىعىراق توقتالايىق.
ەلەكتروندى وقۋلىق – وقۋ كۋرسىنداعى ءبىلىم الۋشىنى ءوز بەتىنشە وقۋ مۇمكىندىگىمەن قامتاماسىز ەتەتىن باعدارلامالىق-ادىستەمەلىك كەشەن. وقۋلىق تەوريانى, انىقتامالىقتاردى, زەرتحانالىق پراكتيكۋمدى, دياگنوستيكالىق جۇيەنى جانە باسقا ۇقساس كومپونەنتتەردى قامتيتىن بىرىكتىرىلگەن قۇرال بولىپ تابىلادى. وقۋلىقتاردا ءبىلىم الۋشى بەلگىلى ءبىر پروتسەستەردى بەينەلەيتىن بەينەكليپتەردى, ءماتىندى, ستاتيستيكالىق سىزبالار مەن دياگراممالاردى ءداستۇرلى تۇردە كورسەتۋ ۇسىنىلادى.
ءبىلىم بەرۋ بارىسىندا قازاقستاندىق وقىتۋشىلار مەن وقۋشىلار TopIQ.kz پلاتفورماسىنداعى ەلەكتروندى وقۋلىقتاردى پايدالانا الادى. اتالمىش باعدارلاما قازاقستان رەسپۋبليكاسى عىلىم جانە جوعارى ءبىلىم مينيسترلىگى بەكىتكەن ءبىلىم بەرۋ ستاندارتىنا, وقۋ باعدارلاماسىنا, ءبىلىم مازمۇنىنا ساي كەلەدى. ەلەكتروندى وقۋلىق پلاتفورماسى بارلىق پاندەر بويىنشا 1-11 سىنىپتارعا ارنالعان «وقۋ ماتەريالدارىنىڭ كىتاپحاناسىنا» بىرىكتىرىلگەن. پلاتفورمادا اۋديو, بەينە كورىنىس, دياگراممالار, قوسىمشا اقپارات, تاپسىرمالار جيىنى ورناتىلعان.
ەڭ ماڭىزدىسى, ستارتاپ جوبا مەكتەپكە اۋىر سومكە تاسىماي, اقپاراتتى ونلاين الۋعا كومەكتەسەدى.
ەلەكتروندى باسىلىمداردا ءارتۇرلى اقپاراتتىق تەحنولوگيالاردى پايدالانۋ ءداستۇرلى وقۋلىققا قاراعاندا ايتارلىقتاي ديداكتيكالىق ارتىقشىلىقتارىمەن ەرەكشەلەنەدى. بىرىنشىدەن, مۋلتيمەديالىق تەحنولوگيا اقپاراتتىڭ جارقىن جانە كورنەكى كورسەتىلىمى بار وقۋ ورتاسىن جاسايدى, بۇل اسىرەسە مەكتەپ وقۋشىلارى ءۇشىن تارتىمدى. ەكىنشىدەن, ماتەريالدى وقۋدىڭ جەكە سحەماسىن تاڭداۋعا بولادى. ۇشىنشىدەن, ماتەريالدى زەرتتەۋ تراەكتورياسىن قاداعالاۋعا جانە باعىتتاۋعا مۇمكىندىك بەرەدى, وسىلايشا كەرى بايلانىستى قامتاماسىز ەتەدى. تورتىنشىدەن, ماتىندە شەكتەۋسىز باسقا ماتەريالعا سىلتەمەلەر بار, وقۋلىقتا ساباققا قاجەتتى بەينەماتەريالداردىڭ بولۋى مۇعالىمنىڭ ساباققا دايىندالۋىن جەڭىلدەتەدى.
مەن ءۇشىن بۇل پلاتفورما وتە ىڭعايلى جانە ۋاقىتىمدى ۇنەمدەيتىن ەلەكتروندى وقۋلىق. سونداي-اق ەلەكتروندى وقۋلىقتا ءبىلىم الۋشى ماتەريالدى وقىپ بولعاننان كەيىن بىردەن تەكسەرۋگە مۇمكىندىك بەرەتىن باقىلاۋ سىناقتارى بار. تەستىلەۋدەن وتكەننەن كەيىن ءبىلىم الۋشىلار وزدەرىنىڭ بارلىق قاتەلەرى مەن كەمشىلىكتەرىن بىردەن كورە الادى. مۇعالىم بۇل قاتەلەردى دە كورەدى, بۇل ءبىلىم الۋشىلاردىڭ قاي جەردە ولقىلىق بار ەكەنىن جانە نەگە نازار اۋدارۋ كەرەكتىگىن تۇسىنۋگە مۇمكىندىك بەرەدى.
ەلەكتروندى وقۋلىقتار باعىتىنداعى تاعى ءبىر ارتىقشىلىق – قاعازعا قاراعاندا سالماعى از. بۇل ماڭىزدى كورسەتكىش, ويتكەنى ءبىز ءبارىمىز جاس ۇرپاقتىڭ دەنساۋلىعىن ساقتاۋعا تىرىسامىز. كادىمگى وقۋلىقتان ەلەكتروندى نۇسقاعا كوشۋ پروتسەسىنىڭ كۇردەلىلىگى ءاربىر مۇعالىمنىڭ بۇل جاڭالىقتى تەز رەتتەپ, قابىلداي المايتىندىعىنا بايلانىستى. سونىمەن قاتار, ەگەر قازىرگى مەكتەپ وقۋشىلارىنىڭ «قىسقاشا ويلاۋىن» ەسكەرەتىن بولساق, وندا ەلەكتروندى وقۋلىقتىڭ ءسوزسىز ارتىقشىلىقتارىنىڭ ارقاسىندا وقۋ پروتسەسى مەكتەپ وقۋشىلارى ءۇشىن ەڭ قىزىقتى جانە ەستە قالارلىق بولادى. مەنىڭشە, ەلەكتروندى وقۋلىق بالا جانىنىڭ باعبانى – ۇستاز ءۇشىن دە, اۋىر سومكە ارقالاعان وقۋشى ءۇشىن دە تاپتىرماس قۇرىلعى ەكەنى داۋسىز.
جانار داۋلەتقاليەۆا,
حيميا ءپانىنىڭ مۇعالىمى
