كەشە استانادا «ازاماتتارعا ارنالعان ۇكىمەت» مەملەكەتتىك كورپوراتسياسى «Elektrondyq qyzmet ortalyǵy» كەشەنىن اشتى.
بۇل – حالىققا قىزمەت كورسەتۋ ورتالىعىنىڭ جاڭا فورماتتاعى نۇسقاسى. مۇندا تۇرعىندار زاماناۋي تەحنولوگيالار ارقىلى مەملەكەتتىك قىزمەتتەردى ءوز بەتىمەن الىپ, ساندىق ساۋاتتىلىعىن ارتتىرا الادى. ەندى جەكە كۋالىكتىڭ ورنىنا بەت-الپەتى مەن ساۋساق ءىزى جەتىپ جاتىر.
وسى ارقىلى قاجەت مالىمەتتەردى الۋعا بولادى. ال بازاعا تىركەلگەن ازاماتتى ورتالىققا كىرگەن بەتتە ينتەللەكتۋالدى كامەرا اتى-ءجونىن ايتىپ قارسى الادى. كەرى جاعدايدا بيومەترلىك مالىمەتتەرىن تىركەۋدەن وتكىزۋى قاجەت.
ورتالىقتىڭ تاعى ءبىر ەرەكشەلىگى تۇرعىندارعا I-sana اتتى ۆيرتۋالدى كەڭەسشى قىزمەت ەتەدى. ول قاجەت انىقتامانى قالاي الۋ كەرەكتىگىن ايتىپ تۇسىندىرەدى. سونىمەن قاتار مەكەنجاي انىقتاماسىن الۋ دا بۇرىنعىعا قاراعاندا ايتارلىقتاي جەڭىلدەدى. ەندى ونى Telegram جەلىسىندەگى پاراقشاسى ارقىلى دا كەز كەلگەن جەردەن الۋعا مۇمكىندىگى بار.
ال كوپشىلىكتى قىزىقتىراتىن تاعى ءبىر جاڭاشىلدىعى – جۇرگىزۋشى كۋالىگىن الاردان بۇرىنعى سىناقتى ءدال وسى ورتالىقتاعى كولىككە ۇقساس ورناتىلعان «digital drive» جابدىعى ارقىلى تاپسىرۋعا بولادى. بۇدان بولەك, «Video call room» ايماعىندا مەملەكەتتىك ورگانداردىڭ باسشىلارىنا بەينەجولداۋ ارقىلى قاجەت ساۋالدارىن قويىپ, 15 كۇننىڭ ىشىندە جاۋابىن الادى.
جاڭا ورتالىق ەكسپو اۋماعىندا ورنالاسقان. ونىڭ اشىلۋىنا پرەمەر-مينيستردىڭ ورىنباسارى اسقار جۇماعاليەۆ پەن وزگە دە رەسمي وكىلدەر قاتىستى.
