نۇر-سۇلتان قالاسىنداعى وليمپيادا چەمپيونى جاقسىلىق ۇشكەمپىروۆ اتىنداعى جەكپە-جەك سارايىندا بوكستان وتكەن «Elorda Cup» حالىقارالىق ءتۋرنيرى مارەسىنە جەتتى. ەلوردا كۇنى مەرەكەسىنە وراي ۇيىمداستىرىلعان حالىقارالىق جارىستا قازاقستان بوكسشىلارى جاقسى بابىندا ەكەنى كورىندى.
شارشى الاڭدا التى كۇن بويى وتكىزىلگەن جەكپە-جەكتەر جانكۇيەر قاۋىمنىڭ دەلەبەسىن قوزدىرىپ, قانىن قىزدىرعانىن اڭعاردىق. ولاي دەيتىنىمىز, بۇل تۋرنيرگە قازاقستان ۇلتتىق قۇراماسىنىڭ ءبىرىنشى, ەكىنشى جانە ءۇشىنشى ءنومىرلى بوكسشىلارى تۇگەلدەي قاتىستى. سونىمەن قاتار كۋبا, وزبەكستان, جاپونيا, ءۇندىستان, قىتاي, موڭعوليا جانە قىرعىزستان سپورتشىلارى دا جارىستىڭ كورىگىن قىزدىرعانى ءسوزسىز.
ەكى جىلداي پاندەميا سالدارىنان ءىرى جارىستاردى كورمەي قالعان قازاق جانكۇيەرى ءۇشىن «Elorda Cup» ءتۋرنيرى شىن مانىندە سپورتتىڭ ۇلكەن مەرەكەسىنە اينالعانداي بولدى. بۇل رەتتە نۇر-سۇلتان قالاسى اكىمدىگىنىڭ جانكۇيەرلەردى جارىسقا تەگىن كىرگىزۋگە شەشىم قابىلداعانى كوپشىلىكتىڭ كوڭىلىنەن شىققانىن ايتۋىمىز كەرەك.
ال ەندى جارىستىڭ ناتيجەسىنە كەلسەك, وليمپيادا ويىندارىنىڭ جۇلدەگەرلەرى مەن الەم چەمپيوندارى قولعاپ تۇيىستىرگەن تۋرنيردە شىن مىقتىلار توپ جارعانى ءسوزسىز.
جارىس جەڭىمپازدارى مەن جۇلدەگەرلەرىنە قازاقستان بوكس فەدەراتسياسىنىڭ پرەزيدەنتى كەڭەس راكيشەۆ, قر مادەنيەت جانە سپورت مينيسترلىگى سپورت كوميتەتىنىڭ توراعاسى سامات ەرعاليەۆ, نۇر-سۇلتان قالاسى دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ, وليمپيادا ويىندارىنىڭ جانە الەم چەمپيوندارى دانيار ەلەۋسىنوۆ, بولات ءجۇمادىلوۆ, ادىلبەك نيازىمبەتوۆ, مەرەي اقشالوۆ, قايرات ەراليەۆ جانە باسقا بەلگىلى سپورت ساڭلاقتارى مەدالدار مەن قارجىلاي سىيلىقتار تابىس ەتتى.
مەرەي اقشالوۆ, قازاقستاننىڭ بوكستان مەملەكەتتىك جاتتىقتىرۋشىسى:
– بۇل جارىس ءبىزدىڭ بوكسشىلار ءۇشىن وتە پايدالى بولدى دەپ ويلايمىن. قۇرامانىڭ بارلىق بوكسشىلارىن قاتىستىردىق. سوڭعى الەم چەمپيوناتىندا جۇلدەگەر بولعان جىگىتتەر تۇگەلدەي جەكپە-جەككە شىقتى. ارينە, جاستاردى دا سىناپ جاتىرمىز. سونداي-اق جاپونيالىق جانە كۋبالىق الەم چەمپيوندارى دا باق سىنادى. وزدەرىڭىز كورگەندەي, كەرەمەت جەكپە-جەكتەردىڭ كۋاسى بولدىق. ەڭ باستىسى, ەلوردامىزدىڭ تويىنا ارنالعان تۋرنير قوناقتاردىڭ دا, جانكۇيەرلەردىڭ دە كوڭىلىن كوتەرگەن سياقتى.
ەمەليانو فيرۋرۋ الۆارەس, كۋبا قۇراماسىنىڭ جاتتىقتىرۋشىسى:
– جارىستىڭ وتكىزىلۋ دەڭگەيى وتە ۇنادى. مىقتى بوكسشىلار جينالىپتى. قازاقستاننىڭ استاناسىندا ءبىرىنشى رەت بولۋىم, سول جاعالاۋداعى عيماراتتار ادەمى. بىراق قالادا ادامدار از جۇرەدى ەكەن, دەگەنمەن ولار كوڭىلدى بولىپ كورىندى.
نيگينا ۋكتاموۆا, وزبەكستان قۇراماسىنىڭ مۇشەسى:
– چەمپيون بولعانىما قۋانىشتىمىن. تۋرنير وتە جوعارى دەڭگەيدە ۇيىمداستىرىلدى دەپ ايتا الامىن. وتە مىقتى بوكسشىلار جينالدى. قازاقستاننىڭ استاناسى ادەمى ەكەن, سوعان كوزىم جەتتى.
