ەلوردانى دامىتۋ جونىندەگى كەڭەستە مەملەكەت باسشىسى بەس جىل ىشىندە استانانى جاسىل قالاعا اينالدىرۋدى, كوپجىلدىق وسىمدىكتەردى كوبىرەك وتىرعىزۋدى تاپسىرعان بولاتىن. وسى رەتتە ەلوردادا قالانى جاپپاي كوگالداندىرۋعا باعىتتالعان «جاسىل استانا» ەكولوگيالىق اكتسياسى جالعاسىپ جاتىر. كۇن سايىن قالانىڭ كوشەلەرى مەن ساياباقتارىندا, كوپشىلىكتىڭ دەمالىسىنا ارنالعان قوعامدىق كەڭىستىكتەردە اعاش وتىرعىزۋ جۇرگىزىلىپ جاتىر. جالپى, بيىل استانادا ءبىر ميلليون جاسىل جەلەك وتىرعىزۋ جوسپارلانعان.
ماڭگىلىك ەل داڭعىلىندا كوشەت كوبەيدى
«تازا قازاقستان: استانا – تازالىق پەن ءتارتىپتىڭ ۇلگىسى» اۋقىمدى ەكولوگيالىق اكتسياسى اياسىندا استاناداعى ماڭگىلىك ەل داڭعىلى بويىندا مادەنيەت قايراتكەرلەرى, زيالى قاۋىم وكىلدەرى جانە تانىمال ارتىستەر اعاش وتىرعىزدى.
اكتسيا اياسىندا ءارى مادەنيەت جانە ونەر قىزمەتكەرلەرى كۇنىنە وراي ۇيىمداستىرىلعان ءىس-شاراعا استانا قالاسىنىڭ اكىمدىگى مەن مادەنيەت جانە اقپارات مينيسترلىگى اتسالىستى.
«مادەنيەت جانە ونەر قىزمەتكەرلەرى كاسىبي مەرەكەسىنە وراي ماڭگىلىك ەل داڭعىلى بويىنا 50 كوشەت وتىرعىزىلدى. بۇعان دەيىن دە ەكواكتسيا اياسىندا قالامىزداعى مادەني مەكەمەلەر ماڭىندا, ەسكەرتكىشتەر اۋماعىندا, باسقا دا اۋدانداردا تازالىق اكتسيالارى ۇيىمداستىرىلعان بولاتىن. وسىنداي ءىس-شارالار ءجيى وتكىزىلىپ تۇرۋى كەرەك دەپ ەسەپتەيمىن. ويتكەنى مۇنداي اكتسيالار ارقىلى جاس بۋىنعا ۇلگى-ونەگە كورسەتەمىز. سونداي-اق تۇرعىنداردىڭ ەكولوگيالىق مادەنيەتىن كوتەرەمىز, قورشاعان ورتاعا دەگەن وڭ كوزقاراسىن قالىپتاستىرامىز» دەدى استانا قالاسى مادەنيەت باسقارماسى باسشىنىڭ ورىنباسارى نۇران حامزين.
ەكواكتسياعا تانىمال كينو جانە تەاتر ارتىستەرى مەن مەن انشىلەر قاتىستى.
«بۇگىن – ەرەكشە مەرەكە. كاسىبي مەرەكە كۇنى اعاش ەگۋ, قالانىڭ تازالىعىن ساقتاۋعا اتسالىسۋ مادەنيەتتىڭ ۇلگىسى دەپ سانايمىن. مىنەكي, بۇگىن ەكواكتسياعا قاتىسىپ, ەلىمىزدىڭ جانە ەلوردامىزدىڭ كوركىنە كورىك قوسىپ جاتىرمىز. اينالامىزدا اعاشتاردىڭ جايقالىپ ءوسۋى – ەكولوگيامىزعا قوسقان ۇلكەن ۇلەس بولماق» دەدى استانالىق تسيرك ديرەكتورى ەرىك جولجاقسىنوۆ.
ايتا كەتەيىك, «تازا قازاقستان» ءىس-شاراسى ءالى دە جالعاسىن تابۋدا.
ديپلومانتتار ەكواكتسيانى قولدادى
استانادا الەمنىڭ ءتۇرلى ەلدەرىنەن كەلگەن ديپلوماتتار قالانى كوگالداندىرۋعا ءوز ۇلەسىن قوسىپ, پرەزيدەنت ساياباعىنا اعاش وتىرعىزدى.
«تازا قازاقستان: استانا – تازالىق پەن ءتارتىپتىڭ ۇلگىسى» اۋقىمدى ەكواكتسياسى اياسىندا ەلوردادا مالايزيا, يزرايل, پورتۋگاليا, شۆەتسيا, برازيليا ديپلوماتتارىنىڭ قاتىسۋىمەن اعاش وتىرعىزىلدى. ەكواكتسيانى الماتى اۋدانى اكىمدىگىنىڭ وكىلدەرى مەن «جەر امباسسادورلارى» جوباسىنىڭ قاتىسۋشىلارى قولدادى.
«ءبىزدىڭ بۇگىنگى اعاش وتىرعىزۋىمىز ەلىمىزدىڭ «جاسىل» ەكونوميكاعا كوشۋى اياسىندا ورمانداردى قالپىنا كەلتىرۋ, سونداي-اق ورمانداردى كەسۋدىڭ الدىن الۋ جونىندەگى قازاقستاننىڭ كۇش-جىگەرىنە سايكەس كەلەدى. ءبىزدىڭ قىزمەتىمىز الماتى اۋدانى اكىمدىگىنىڭ جانە «جەر امباسسادورلارى» جوباسىنىڭ قولداۋىنسىز مۇمكىن بولماس ەدى. سىزدەردىڭ ءىس-شاراعا قوسقان ۇلەستەرىڭىزگە ءۇشىن شىن جۇرەكتەن العىسىمدى بىلدىرگىم كەلەدى» دەدى تايلاند كورولدىگىنىڭ ەلشىسى چاتچاۆان ساكورنسين.
ءىس-شارا بارىسىندا پرەزيدەنت ساياباعىندا جابايى الما اعاشتارىنىڭ 16 كوشەتى وتىرعىزىلدى.
«تايلاند ەلشىلىگىنىڭ وكىلدەرى «تازا قازاقستان» رەسپۋبليكالىق ەكواكتسياسىن قولداۋعا نيەت ءبىلدىردى. پرەزيدەنت ساياباعىنىڭ اۋماعىندا 16 اعاش وتىرعىزدىق. ەكواكتسياعا ءتۇرلى ەلدەردىڭ ەلشىلەرى مەن بەلسەندى جاستار دا قاتىستى» دەپ اتاپ ءوتتى الماتى اۋدانى اكىمىنىڭ ورىنباسارى نۇرمات ءابدىرايىموۆ.
«جەر امباسسادورلارى» جوباسىنىڭ قاتىسۋشىسى نۇرحاميت جاقىپوۆتىڭ ايتۋىنشا, وتىرعىزىلعان اعاشتار استانالىقتاردىڭ سۇيىكتى ساياباعىن گۇلدەندىرە تۇسەدى.
«ءبىز جەمىس بەرمەيتىن, بىراق وتە ادەمى گۇلدەيتىن 16 جابايى الما اعاشىن وتىرعىزدىق. كەلەسى جىلى ساياباق تەك سيرەنمەن عانا ەمەس, ءبىز وتىرعىزعان گۇلدەنگەن الما اعاشتارىمەن دە كوركەيە تۇسەدى دەپ ۇمىتتەنەمىز» دەدى نۇرحاميت جاقىپوۆ.
ريكاردو كاكا كوشەت وتىرعىزدى
«تازا قازاقستان: استانا تازالىق پەن ءتارتىپتىڭ ۇلگىسى» ەكولوگيالىق اكتسياسى اياسىندا فۋتزالدان ۇلتتىق قۇرامانىڭ باس باپكەرى ريكاردو كاكا مەن مەتسەنات تالعات قوجاحمەتوۆ قازاقستان فۋتبول فەدەراتسياسى اۋماعىندا كوشەت وتىرعىزۋ اكتسياسىنا قاتىستى.
2018 جىلى ۇلتتىق قۇرامانىڭ باس باپكەرى رەتىندە تاعايىندالعان ريكاردو كاكا 2021 جىلى ليتۆادا وتكەن الەم چەمپيوناتىندا قازاقستاندى العاش رەت جارتىلاي فينالعا جەتكىزگەن بولاتىن.
ال «سايران» جشس قۇرىلىس كومپانياسىنىڭ باس ديرەكتورى تالعات قوجاحمەتوۆ تە شاعىن فۋتبولدى تانىتۋ ماقساتىندا بىرنەشە الاڭداردى سالىپ بەرگەن.
«قازاقستان فۋتبول فەدەراتسياسىنىڭ جانىندا شاعىن فۋتبولىمىزدى الەمگە تانىتقان كاكامەن بىرگە كوشەت وتىرعىزۋ دا ۇلكەن مارتەبە. كەيىنگى جاس ۇرپاق وسى اعاشتى تانىمال باپكەر وتىرعىزدى دەپ ەسكە الىپ جۇرەدى» دەدى مەتسەنات تالعات قوجاحمەتوۆ.
قالالىق زيرات ايماعى تازارتىلدى
استانا قالاسى ءدىن ىستەرى ءجونىندەگى باسقارماسىنىڭ ۇيىمداستىرۋىمەن «تازا قازاقستان: استانا – تازالىق پەن ءتارتىپتىڭ ۇلگىسى» ەكواكتسياسى اياسىندا قالالىق زيرات ايماعىندا سەنبىلىك ءوتتى.
تازالىق جۇمىسىنا ءدىن ىستەرى جونىندەگى باسقارماسىنىڭ باسشىسى قايروللا كوشقالي, استانا قالاسىنىڭ باس يمامى ەربولات ءجۇسىپوۆ, دىندەردى زەرتتەۋ ورتالىعىنىڭ ديرەكتورى الماس ەرنازاروۆ پەن ورتالىق قىزمەتكەرلەرى جانە مەشىت جاماعاتى قاتىستى.
«ەكواكتسيا اياسىندا ءدىن ىستەرى جونىندەگى باسقارما, ءدىني بىرلەستىكتەر مەن دىندەردى زەرتتەۋ ورتالىعىنىڭ قىزمەتكەرلەرى بىرگە اكتسياعا اتسالىستى. قالالىق زيرات اينالاسىن قوقىستان, اسىرەسە قۇرىلىس قالدىقتارىنان تازالادىق. جالپى ءىس-شاراعا 70-تەن استام جاماعات قاتىستى» دەدى ءدىن ىستەرى جونىندەگى باسقارماسىنىڭ باسشىسى قايروللا كوشقالي.
«ەلىمىزدە «تازا قازاقستان» اكتسياسى اياسىندا كوپ يگى ءىس جاسالىپ جاتىر. بۇگىن مەشىت يمامدارى مەن شاكىرتتەرى ورتالىق زيراتقا كەلىپ, ساۋاپتى ءىس جاساۋدا. جالپى يماني تاربيەگە ءمان بەرەتىن بولساق, تازالىق يماننان دەپ ايتامىز. كەشەگى بابالارىمىز ءۇيىنىڭ جان-جاعىن تازالاپ, ارقاشان كوكتەم-جازعا دايىندىق جۇرگىزگەن. سوندىقتان ەڭ باستىسى تازالىقتى ۇستانۋ كەرەك. ەلىمىز امان, جۇرتىمىز تىنىش بولسىن» دەدى استانا قالاسىنىڭ باس يمامى ەربولات ءجۇسىپوۆ.
