ەلوردا – ەلىمىزدەگى ەڭ جايلى ءارى تارتىمدى قالا

ەلوردا – ەلدىڭ جۇرەگى, مەملەكەتتىڭ ورتالىعى, بار قازاقتىڭ باس قالاسى. سوندىقتان دا نۇر-سۇلتان شاھارىنا حالىقتىڭ نازارى دا ەرەكشە. ارقانىڭ تورىنە, ەسىلدىڭ جاعالاۋىنا استانا قونعالى وتكەن 24 جىلدا قالا ادام تانىماستاي وزگەردى. ەلوردامىزدىڭ بۇگىنگى تىنىسى, كەلەشەككە كوزدەلگەن دامۋ جوسپارى جونىندە كەشە ورتالىق كوممۋنيكاتسيالار قىز­مەتىندە نۇر-سۇلتان قالاسىنىڭ اكىمى التاي كولگىنوۆ جان-جاقتى بايانداپ بەردى. مەملەكەت باسشىسى ق.توقاەۆتىڭ تاپسىرمالارى اياسىندا باس قالادا اتقارىلىپ جاتقان جۇمىستار بارىسى قالاي؟ ورتالىق كوممۋنيكاتسيالار قىزمەتىندە كەشە وتكەن بريفينگ بارىسىندا نۇر-سۇلتان قالاسىنىڭ اكىمى التاي كولگىنوۆ وسى ماسەلە توڭىرەگىندە, جالپى ەلوردانىڭ الەۋمەتتىك-ەكونوميكالىق دامۋ بارىسى تۋرالى كەڭىنەن باياندادى جانە جۋرناليستەر قويعان ساۋالدارعا ءۇش ساعاتقا جۋىق ەگجەي-تەگجەيلى جاۋاپ قايتاردى.

ۇلەسكەر الدانىپ قالماس ءۇشىن نە ىستەۋ كەرەك؟

ەلوردادا قۇرىلىسى قاڭتارىلعان نەمەسە ۇزاققا سوزىلعان نىسانداردىڭ جۇمىسىن اياقتاۋ بويىنشا جۇيەلى, ناقتى شارالار جۇرگىزىلىپ جاتىر. 16 مىڭ ۇلەسكەر وتباسىنىڭ 13 مىڭىنىڭ پروبلەماسى شەشىلدى. وسىعان وراي, ەلوردا اكىمى ۇلەسكەر رەتىندە الدانىپ قالماس ءۇشىن نە ىستەۋ كەرەك ەكەنىن ايتتى.

«مەملەكەت باسشىسىنىڭ تاپسىر­ماسىنا سايكەس قۇرىلىسى ۇزاققا سوزىلعان نىسانداردىڭ جۇمىسىن اياقتاۋ بويىنشا ەلوردادا اۋقىمدى جۇمىستار جۇيەلى ءجۇرىپ جاتىر. 150 كوپپاتەرلى تۇرعىن ءۇي كەشەنىنىڭ 90-ى اياقتالدى. 16 مىڭ ۇلەسكەردىڭ 13 مىڭى وزدەرىنە تيەسىلى پاتەرىن الدى. قازىر قالعان 3 مىڭ ۇلەسكەردىڭ پروبلەماسىمەن اينالىسىپ جاتىرمىز. ولاردىڭ ءبىر بولىگىن بيىل شەشەمىز, قالعان بولىگىن كەلەسى جىلى اياقتاۋدى جوسپارلاپ وتىرمىز. دەگەنمەن, مۇنداي جاعدايعا دۋشار بولعان جاڭا ۇلەسكەرلەردىڭ دە بولماۋى وتە ماڭىزدى. ويتكەنى قاشان دا قاۋىپ بار. الدانعان ۇلەسكەر بولماۋ ءۇشىن قۇرىلىس جۇمىسىن جۇرگىزەتىن ۇيىمنىڭ وتكەن تاريحىن زەرتتەۋ, قۇجاتتارىن تەكسەرۋ قاجەت» دەدى التاي كولگىنوۆ.

بۇل رەتتە مەملەكەت تاراپىنان قۇرىلىس سالۋشىلارعا قويىلاتىن تالاپتار كۇشەيتىلگەن. ەگەر قۇرىلىس سالۋشى نىساندى اياقتاۋعا جەتكىلىكتى قاراجاتى بولماسا, ونىڭ ىشىندە تۇرعىن ءۇي كەشەنىنىڭ قاڭقاسى تۇرعىزىلماعان بولسا, پاتەرلەردى ساتۋ مۇمكىن ەمەس. سونىمەن قاتار تۇرعىن ءۇي قۇرىلىسىن كەپىلدەندىرۋ قورىنىڭ كەپىلدىگى جانە ازىرلەۋشىنىڭ بانك كەپىلدىگى بولۋى كەرەك. كومپانيانىڭ جاعدايى دا تەكسەرىلەدى. سونداي-اق اكىمدىكتىڭ رەسمي اككاۋنتتارىندا جانە باق-تا قۇرىلىس جۇمىسىن جۇرگىزەتىن كۇماندى ۇيىمداردىڭ ءتىزىمىن تۇراقتى تۇردە جاريالانىپ تۇرادى.

قالا اكىمىنىڭ ايتۋىنشا, قۇرىلىسى ۇزاققا سوزىلعان نىساندار بويىنشا ءبىراز جۇمىس اتقارىلدى: ءبىر جەردە تەك شۇڭقىرى عانا قازىلعان, ەندى ءبىر جەردە اپاتتى دەپ تانىلعانىنا قاراماستان ءۇيدىڭ قاڭقاسى كوتەرىلگەن, قارجىلىق اۋديت, جوبالاۋ-سمەتالىق قۇجاتتاماسى بولماعان. سونداي-اق ءبىر پاتەردى ەكى-ءۇش ادامعا ساتۋ جاعدايى انىقتالعان. دەگەنمەن, مۇنىڭ ءبارى بۇگىندە ارتتا قالدى. بۇگىندە قۇرىلىسى ۇزاققا سوزىلعان قالعان نىساندار بويىنشا قادامدىق ءىس-شارالار جوسپارى بار.

گازداندىرۋ ەكولوگيا مەن ءومىر ءسۇرۋ ساپاسىنا وڭ اسەر ەتەدى

ەلورداداعى الماتى جانە سارى­ارقا اۋداندارى گازداندىرىلدى. بۇل ماسەلە – مەملەكەت باسشىسىنىڭ تىكەلەي باقىلاۋىندا. بايقوڭىر مەن ەسىل اۋدانىندا گاز قۇبىرىنىڭ قۇرىلىسى باستالدى. مىسالى, بۇل «يلينكا» (ۇركەر), «ءوندىرىس», «پريگورودنىي», «تەلمان» ەلدى مەكەندەرى, سول سياقتى «Family Village», «Garden Village» جانە «شۇبار», ت.ب. شاعىن اۋدانىندا جوبالاۋ جۇمىسى ءجۇرىپ جاتىر.

«ەسىل جانە بايقوڭىر اۋدانىندا گاز قۇبىرىنىڭ قۇرىلىسىن باستادىق, كەلەسى جىلى كۆارتالىشىلىك جەلىلەردىڭ قۇرىلىسىنا كىرىسەمىز. قالادا 2 اۋدان – سارىارقا جانە الماتى تولىعىمەن گازداندىرىلدى. ول ءۇشىن 680 كم-دەن استام گاز تاراتۋ جەلىسى سالىندى, كۆارتالىشىلىك جەلىلەر تارتىلدى. 14 مىڭ ابونەنت گازعا قول جەتكىزدى, 6 مىڭنان استام ابونەنت تەحنيكالىق شارتتار الدى. سونىمەن قاتار 3,6 مىڭنان استام ءۇي گازعا قوسىلدى (25%-دان استام).

وسى قىستا جەكە سەكتوردا گازعا قوسىلعان ۇيلەردىڭ ارقاسىندا اۋا الدەقايدا تازا بولدى. بۇل ايتارلىقتاي بايقالادى. مىسال رەتىندە وڭتۇستىك-شىعىس اۋدانىن ايتۋعا بولادى. ەلوردانى گازداندىرۋ قالانىڭ ەكولوگياسىنا عانا ەمەس, قالا تۇرعىندارىنىڭ ءومىر ءسۇرۋ ساپاسىنا دا وڭ اسەرىن تيگىزدى» دەدى شاھار باسشىسى.

الەۋمەتتىك ماڭىزدىلىعىن ەسكەرە وتىرىپ, قالا اكىمدىگى بۇعان دەيىن بىرقاتار جەڭىلدىكتەردى قابىلداعان بولاتىن. وسىلايشا, مۇقتاج جانداردىڭ گازعا قوسىلۋىنا قولداۋ كورسەتىلگەن ەدى. الەۋمەتتىك كومەك مولشەرى بۇگىندە 200 مىڭ تەڭگەدەن 400 مىڭ تەڭگەگە دەيىن ۇلعايتىلدى. ال قالا تۇرعىندارىنىڭ بارىنە ەسەپتەۋىشتەر تەگىن بەرىلەدى.

سونىمەن قاتار قالا تۇرعىندارىنىڭ ءوز ءۇيىن گازعا قوسۋ ءۇشىن قۇجاتتار جيناۋدا قيىندىقتارعا كەزىككەنىن ەسكەرە وتىرىپ, قۇجاتتار ءتىزىمى 2 ەسەگە دەيىن قىسقارتىلدى. بۇرىن قۇجاتتاردى جيناۋعا 6 ايعا دەيىن ۋاقىت كەتەتىن. بۇل شارا مەملەكەت باسشىسىنىڭ «مەملەكەتتىك اپپاراتتىڭ قىزمەتىن بيۋروكراتياسىزداندىرۋ جونىندەگى شارالار تۋرالى» جارلىعى اياسىندا قابىلداندى.

بۇدان باسقا, جەو-1 جانە جەو-2-ءنىڭ 13 سۋ جىلىتۋ قازاندىعى گازعا اۋىستىرىلدى. جەو-3 قۇرىلىسى قايتا باستالدى, جاڭا قۇرىلىس اۋداندارىن جىلۋمەن قامتاماسىز ەتۋ ءۇشىن 3 جەرگىلىكتى گاز قازاندىعىن جوبالاۋ جۇمىسى ءجۇرىپ جاتىر.

كوپىر قۇرىلىسى كەپتەلىستى ازايتادى

ەلوردادا كەشەندى كولىك سحەماسىنىڭ تۇجىرىمداماسى بەكىتىلدى. بۇل حالىقتىڭ جىل سايىنعى ءوسۋىن جانە جولدارداعى ترافيكتىڭ ۇلعايۋىن ەسكەرە وتىرىپ, قالالىق كولىكتىڭ 10 جانە ودان دا كوپ جىلعا ارنالعان بىرىڭعاي تەحنيكالىق پايىمىن ازىرلەۋگە مۇمكىندىك بەرەدى.

«جاڭا سىن-تەگەۋرىندەر مەن ۋربانيزاتسيانى ەسكەرە وتىرىپ, جول-كولىك ينفراقۇرىلىمىن دامىتۋ قالانىڭ باس جوسپارىندا جەكە جوسپارمەن ايقىندالدى. كەشەندى كولىك سحەماسى جاڭا اۆتوموبيل كوپىرلەرىنىڭ, كولىك ايرىقتارىنىڭ سانىن ۇلعايتۋدى, كوشەلەردى كەڭەيتۋدى, جەراستى جولدارىن, قوعامدىق كولىكتى جاڭعىر­تۋدى جانە ت.ب. كوزدەيدى. مىسالى, ۇلى دالا داڭعىلىندا ەكى اۆتوكولىك كوپىرىنىڭ قۇرىلىسىن جۇرگىزىپ جاتىر­مىز, ونى بيىل اياقتاۋدى جوسپارلاپ وتىرمىز. ول ماڭگىلىك ەل داڭعىلىنىڭ, ا.بايتۇرسىنوۆ, ر.قوشقارباەۆ, ج.ناجىمەدەنوۆ كوشەلەرىنىڭ, Nova city اۋدانىنىڭ, «مىڭجىلدىق» اللەياسىنىڭ جۇكتەمەسىن ءىشىنارا ازايتۋعا مۇمكىندىك بەرەدى, جاڭا «نۇرلى جول» ۆوكزالىنىڭ, «تەلمان» جانە «پرومىشلەننىي» ەلدى مەكەندەرىنىڭ, «مەترو» گيپەرماركەتى اۋدانىنىڭ, جۇماباەۆ داڭعىلى, جۇرگەنوۆ كوشەسى جانە ت.ب. اۋماققا وڭاي جەتۋدى قامتاماسىز ەتەدى» دەدى اكىم.

سونداي-اق ەسىل وزەنى ارقىلى تاۋەلسىزدىك داڭعىلىنداعى كوپىردىڭ قۇرىلىسىن جۇرگىزىپ جاتىرمىز, بۇل جۇمىس 2023 جىلى اياقتالادى. بۇرىن سوت پروتسەستەرى بولدى, بارلىق پروتسەدۋرالىق ماسەلەلەر شەشىلگەننەن كەيىن كوپىر قۇرىلىسى قايتا باستالدى. بۇل كوپىر تاۋەلسىزدىك داڭعىلى, جاڭا تەمىرجول ۆوكزالى اۋدانى, قوشقارباەۆ داڭعىلى, ناجىمەدەنوۆ كوشەسى, ازىرەت سۇلتان مەشىتىنىڭ اۋماعى, بايتۇرسىنوۆ كوشەسى, قورداي, ايناكول, مومىشۇلى داڭعىلىنىڭ سول جاق جاعالاۋىمەن قوسىمشا بايلانىستى قامتاماسىز ەتۋگە مۇمكىندىك بەرەدى.

قالا اكىمدىگى جول ينفراقۇرىلىمىن دامىتۋعا ەرەكشە كوڭىل ءبولىپ وتىر. ەلوردا باسشىسىنىڭ ايتۋىنشا, وسى ايدا كۇردەلى جوندەۋدەن كەيىن الاش تاس جولى بويىندا كوپىر اشىلدى. سونداي-اق بيىل 100-گە جۋىق كوشە سالىنادى جانە جوندەلەدى. جالپى, سوڭعى ەكى جىلدا 300-گە جۋىق كوشە جوندەلدى, ولاردىڭ جارتىسى قالا ماڭىنداعى ەلدى مەكەندەردە جۇزەگە اسىرىلدى.

نوسەر كارىزدەرىنىڭ پروبلەماسى شەشىلدى

نۇر-سۇلتان قالاسىندا 146 پروبلەمالى ۋچاسكەدە سۋ باسۋ ماسەلەسى شەشىلدى. ونىڭ ىشىندە قالانىڭ ەڭ وزەكتى داڭعىلدارىنىڭ ءبىرى – باۋىرجان مومىشۇلى داڭعىلى. وسى كوشەگە 130 كم-دەن استام نوسەر كارىزى مەن ارىق-ناۋا جۇيەسى سالىندى, 1 مىڭعا جۋىق باقىلاۋ جانە جاڭبىر قابىلداعىش قۇدىق, سونداي-اق 20 كم كوللەكتور تازارتىلدى, 6,5 مىڭ قۇبىر بۋلاندىرىلىپ, 350 تونناعا جۋىق تۇنبا قالدىق شىعارىلدى.

«ەلوردادا نوسەر كارىزى مەن ونىڭ قۇرىلىسى بويىنشا جۇمىستار تۇراقتى نەگىزدە جۇرگىزىلىپ جاتىر. قالانىڭ ەڭ پروبلەمالى داڭعىلدارىنىڭ ءبىرى ب.مومىشۇلى داڭعىلى بولاتىن. تولاسسىز جاۋىن جاۋسا, كولىكتەردىڭ جارتىسىنا جۋىعى سۋ استىندا قالاتىن. بۇل داڭعىلدا ءبىز نوسەر كارىزىنىڭ ماگيسترالدى كوللەكتورىن سالدىق. نوسەر كارىزىنىڭ ۇزىندىعى 500 مەتردى قۇرايدى – داۋىلپاز كوشەسىنەن باستالىپ, ب.مومىشۇلى داڭعىلىنان ءوتىپ,  ەلىم-اي كوشەسىنە دەيىن جالعاسادى. جاڭا قۇرىلىس قولدانىستاعى نوسەر كارىزى جەلىلەرىنىڭ وتكىزۋ قابىلەتىن 1,5 ەسەگە ارتتىرۋعا مۇمكىندىك بەردى» دەدى ا.كولگىنوۆ.

بۇدان باسقا, جاستار شاعىن اۋدانىندا, تاشەنوۆ پەن اممان كوشەلەرىنىڭ قيىلىسىندا جەتكىزۋشى كوللەكتورلاردى قايتا جاڭعىرتۋ ارقىلى تازارتۋ قۇرىلىسى سالىندى. جاڭا قۇرىلىستاردىڭ قۋاتتىلىعى – تاۋلىگىنە 42 مىڭ تەكشە مەتردەن استام. اتالمىش تازارتۋ عيماراتى تاشەنوۆ, باراەۆ, ءۋاليحانوۆ, پۋشكين, يمانباەۆا كوشەلەرىنىڭ, رەسپۋبليكا, تاۋەلسىزدىك داڭعىلدارىنىڭ جوعارعى بولىگىندە سۋ باسۋ ماسەلەسىن شەشۋگە مۇمكىندىك بەردى. بۇل قۇرىلىستىڭ ەرەكشەلىگى – ەسىل وزەنىنە قۇيار الدىندا جاڭبىر مەن ەرىگەن قار سۋىن تازارتىپ الادى.

سونداي-اق «تەلمان» ەلدى مەكەنىندە تازارتۋ قوندىرعىسى مەن ماگيسترالدىق كوللەكتور, «پريگورودنىي» ەلدى مەكەنىندە جانە الاش تاس جولى بويىنداعى لوگيستيكالىق ورتالىق اۋدانىندا تازارتۋ قوندىرعىسى سالىندى, وسىعان دەيىن مىڭجىلدىق اللەياسى اۋدانىنداعى 2 ۋچاسكەدە نوسەر كارىزىنىڭ پروبلەماسى شەشىلدى.

الماتى اۋدانىنداعى ش.قالداياقوۆ كوشەسى بويىنداعى جاڭا ۆوكزال ماڭىندا, ۇلى دالا داڭعىلىندا

جانە ت.ب. نوسەر كارىزىنىڭ قۇرىلىسى ءجۇرىپ جاتىر. نوسەر كارىزى مەن تازارتۋ قۇرىلىسىن سالۋ جانە قۋاتىن كەڭەيتۋ بويىنشا جۇمىستاردى قالا اكىمدىگى جۇيەلى دەڭگەيدە جۇرگىزىلۋدە.

«جايلى قالا» جوسپارى جۇيەلى جۇرگىزىلۋدە

اۋلالاردى اباتتاندىرۋ جۇمىسى ەلوردانىڭ بارلىق اۋدانىن قامتىدى.

وسىعان وراي, باس قالادا قوعامدىق كەڭىستىكتەر اشۋ جانە اۋلالاردى تۇبەگەيلى وزگەرتۋ جۇمىستارى بەلسەندى جۇرگىزىلىپ جاتىر. وسى ايدا بەيبىتشىلىك جانە كەلىسىم سارايى اۋماعىندا امفيتەاتر, قالانىڭ وڭ جاعالاۋىنداعى تاعى ءبىر جاياۋ جۇرگىنشىلەر جولى, 100-گە جۋىق اۋلا مەن قوعامدىق كەڭىستىك سالىندى. ولاردىڭ بارلىعى ەلوردانىڭ ۆيزيت كارتالارىنا – قالا تۇرعىندارى مەن قوناقتارى ءۇشىن تارتىمدى ورىندارعا اينالدى.

«وزدەرىڭىز بىلەتىندەي, ءبىز «نۇر-سۇلتان – جايلى قالا» ماستەر-جوسپارىن قابىلدادىق. بيىل تاعى 200-دەن استام قوعامدىق كەڭىستىك پەن اۋلا قۇرىلادى. بۇرىن 500-گە جۋىق ورىن اباتتاندىرىلدى, ولار قازىر ورىندارعا اينالىپ ۇلگەردى. مىسالى, وڭ جاعالاۋدا ءبىز العاشقى جاياۋ جۇرگىنشى جولىن, ورتالىق ساياباقتى, قالا الاڭىن سۋبۇرقاقتارمەن, «تەاترالنىي» بۋلۆارىمەن «جاستار» سارايىنان مۋزىكالىق جاس كورەرمەن تەاترىنا دەيىن, جاعالاۋدى جالعادىق. بەيبىتشىلىك جانە كەلىسىم سارايىنىڭ جانىندا امفيتەاتر اشىلدى, باراەۆ كوشەسىندە تاعى ءبىر جاياۋ جۇرگىنشىلەر جولى اباتتاندىرىلدى, كوشە سپورتىنىڭ كوليزەيى اشىلدى, كوپىر الاڭدارى اباتتاندىرىلدى. ولاردىڭ بارلىعى قالا تۇرعىندارى ءۇشىن دە, قالا قوناقتارى ءۇشىن دە تارتىمدى ورىندارعا اينالدى» دەدى شاھار باسشىسى.

سونداي-اق ەلوردادا قۇتقارۋشىلار, مۇعالىمدەر, مەديتسينا قىزمەتكەرلەرىنىڭ قۇرمەتىنە ساياباقتار اباتتاندىرىلدى. ماسەلەن, «كوكتال» ەلدى مەكەنىندە ساياباق اشىلدى. قوعامدىق كەڭىستىكتەر مەن اۋلا اۋماقتارىندا اركىم وزىنە ۇنايتىن ورىندى تابا الادى: باسكەتبول/فۋتبول الاڭدارى, workout-ايماقتار, دەمالىستى تىنىش ورىندا وتكىزۋگە ارنالعان ايماقتار, اتكەنشەكتەر, شىعارماشىلىق ونەر كورسەتۋگە ارنالعان كورىنىستەر, سكەيت-ايماقتار جانە ت.ب. وسىلايشا, ەلوردادا قۇرعاپ قالعان ورىندار, قاراۋسىز قالعان ۋچاسكەلەر مەن باتپاقتى جەرلەر سانى ايتارلىقتاي ازايدى. ولاردىڭ ورىندارىندا قالا تۇرعىندارى مەن قوناقتارى ءۇشىن تارتىمدى ورىندار پايدا بولدى.

مەكتەپ كوبەيسە دە, تاپشىلىق بار

سوڭعى ءۇش جىل ىشىندە ەلوردادا 34 مەكتەپ سالىندى. 2022 جىلى نۇر-سۇلتان قالاسىندا تاعى 20 مىڭنان استام وقۋشى ورنى اشىلىپ, تاعى 11 مەكتەپ سالىنادى.

«حالىقتىڭ جىل سايىنعى ءوسۋىن ەسكەرە وتىرىپ, الەۋمەتتىك نىساندارعا, ونىڭ ىشىندە وقۋ ورىندارىنا دەگەن سۇرانىس ارتىپ كەلەدى. جوسپارلى تۇردە وقۋشىلاردى ءتيىستى وقۋ ورىندارىمەن قامتاماسىز ەتۋ جانە جۇمىس ىستەپ تۇرعان ورىندارعا ارتىلىپ جاتقان ارتىق جۇكتەمەنى الىپ تاستاۋ ءۇشىن جىل سايىن كەمىندە 10 مەكتەپ سالۋ قاجەت. ءۇش جىل ىشىندە 34 مەكتەپ سالىنىپ, پايدالانۋعا بەرىلدى. اتالعان وقۋ ورىندارى 70 مىڭ وقۋشى ورنىن قۇرۋعا مۇمكىندىك بەردى» دەدى التاي كولگىنوۆ.

وقۋ ورىندارى قالانىڭ بارلىق اۋدانىندا سالىنىپ جاتىر. مىسالى, سوڭعى ەكى جىلدىڭ وزىندە حالىق تىعىز قونىستانعان ەسىل اۋدانىندا – 12 مەكتەپ, الماتى اۋدانىندا – 7, بايقوڭىر اۋدانىندا – 4, سارىارقا اۋدانىندا 2 مەكتەپ سالىندى.

بيىل قالادا تاعى 11 مەكتەپ سالىنادى. اتالعان وقۋ ورىندارى قوسىمشا 20 مىڭنان استام وقۋشى ورنىن اشۋعا مۇمكىندىك بەرەدى. قالا باسشىسىنىڭ مالىمدەۋىنشە, سارىارقا اۋدانىنداعى №65 مەكتەپتىڭ ەرەكشەلىگى – مۇندا ينكليۋزيۆتى ءبىلىم بەرۋ باعدارلاماسى جۇزەگە اسىرىلادى. بۇل مەكتەپتە ەستۋ, تىرەك-قيمىل اپپاراتى بۇزىلعان بالالار وقيدى. مۇندا بارلىعى 3 مىڭنان استام وقۋشى ءبىلىم الىپ ءجۇر, بۇل وقۋ ورنىنا جۇكتەلگەن ءتيىستى جۇكتەمەدەن اسىپ تۇسەدى. مەكتەپتىڭ قۋاتىن ارتتىرۋ ءۇشىن جانىنان جاڭا كورپۋس سالىنىپ جاتىر. ول تاعى 1200 وقۋشى ورنىن (ەكى اۋىسىمدا) قۇرۋعا مۇمكىندىك بەرەدى. سونداي-اق ساۋران كوشەسىندەگى №59 مەكتەپ-ليتسەيى­نىڭ اۋماعىندا جاڭا كورپۋستىڭ قۇرىلىسى باستالدى.

گۇلبارشىن وكەشقىزى