رەسمي دەرەككە سۇيەنسەك, ەلىمىزدەگى تۋريستىك كومپانيالاردىڭ 90 پايىزعا جۋىعى سىرتقى ءتۋريزمدى ناسيحاتتايدى ەكەن. ەندى مەملەكەت تاراپىنان ىشكى ءتۋريزمدى دامىتۋعا كوڭىل بولىنە باستادى. وعان بۋرابايدا ءتۋريزمدى دامىتۋ جوبالارىن تانىستىرۋعا ارنالعان ءباسپاسوز تۋرىندا كوزىمىز جەتتى. الداعى ۋاقىتتا بۋراباي ايماعى قالاي تۇرلەنبەك؟ قانداي ساۋىقتىرۋ ورتالىقتارى بوي كوتەرەدى؟ شىنىندا, وندا دەمالۋ تۇركيامەن سالىستىرعاندا قىمبات پا؟ اشىق اسپان اياسىندا وتكەن شارا كەزىندە بۇل سۇراقتارعا اقمولا وبلىسىنىڭ اكىمى مالىك ءمىرزاليننىڭ ءوزى جاۋاپ بەردى.
دەمالۋعا كەلەتىن كىمدەر؟
بۋرابايعا بارا جاتقاندا تاۋدىڭ ۇستىندەگى «BURABAY» جازۋى الىستان ءايبات كورىندى. تۋرا كاليفورنياداعى بەلگىلى HOLLYWOOD جازۋىنداي. الىپ ارىپتەر ششۋچينسك قالاسىنداعى تەلەمۇنارانىڭ جانىنداعى تاۋعا ورناتىلعان. اقمولا وبلىسى اكىمىنىڭ ورىنباسارى مارات يعاليدىڭ ايتۋىنشا, جالپى ۇزىندىعى – 60 مەتر, بيىكتىگى 14 مەتردى قۇرايتىن ارىپتەر تۇندە ءتۇرلى-ءتۇستى بولىپ جانادى ەكەن.
سونىمەن, پرەزيدەنت بۋرابايعا قاتىستى ناقتى تاپسىرما بەرگەنى بەلگىلى. ءبىرىنشى, وتاندىق جانە شەتەلدىك تۋريستەردىڭ سانىن كوبەيتۋ بولسا, ەكىنشىدەن, قىزمەت كورسەتۋ ساپاسىن ارتتىرىپ, سايكەسىنشە باعاسىن ءتۇسىرۋدى مىندەتتەدى. ءوزىن وبلىس اكىمىمەن قاتار, ششۋچە-بۋراباي كۋرورتىنىڭ باستى PR مەنەدجەرى رەتىندە تانىستىرعان مالىك مىرزالين وتكەن جىلى ايماققا 1 ميلليوننان استام تۋريست كەلگەنىن ايتتى. دەمالۋعا كەلۋشىلەردىڭ كوبى ءوزىمىزدىڭ جانە رەسەي ازاماتتارى ەكەن. ءبىزدىڭ بار كورگەن-بىلگەنىمىز ءبىر عانا بۋراباي بولعاندىقتان, وبلىستىڭ تۋريستىك كلاستەرىنە جالپى جەتى جۇزدەن استام نىسان كىرەتىنى تاڭعالدىردى. ونىڭ ىشىندە كۋروروتتىق مەكەمەلەر, ۇلتتىق تابيعي پاركتەر, ۇلتتىق قورىق جانە مادەني ەسكەرتكىشتەر بار.
ون جىل سوعىلعان ترامپلين
الدىمەن استانانىڭ جيىرما جىلدىعى قارساڭىندا پايدالانۋعا بەرىلگەن الەمدىك دەڭگەيدەگى شاڭعى بازاسىنا جولىمىز ءتۇستى. مۇندا كوكشەتاۋ, پاۆلودار وبلىستارىنان كەلگەن سپورت مەكتەپتەرىنىڭ شاكىرتتەرى دايىندىق جۇرگىزۋدە. نىساننىڭ تەحنيكالىق جانە تەحنولوگيالىق جابدىقتالۋى حالىقارالىق ستاندارتقا ساي. كورەرمەندەرگە ارنالعان تريبۋنالار, باسسەيندەرى بار سپورتزالدار, تورەشىلەر پاۆيلونى, زاماناۋي تەلەتۇسىرىلىم بولمەلەرى, دارىگەرلىك ورتالىق, اكىمشىلىك عيمارات, 187 ورىنعا لايىقتالعان قوناق ءۇي دە بار. وبلىس اكىمى بۇل نىساننىڭ ەلىمىزدە قىسقى سپورت تۇرلەرىنىڭ دامۋىنا ىقپال ەتەتىنىن, شاڭعى جارىسى مەن بياتلوننان جاتتىعۋلار, جارىستار وتكىزۋگە ۇلكەن مۇمكىندىك بەرەتىنىن العا تارتتى. «بۇدان بىلاي ءبىزدىڭ ەلدە شاڭعى جارىسى, بياتلون, شاڭعى روللەر سپورتى بولسىن, حالىقارالىق دارەجەدەگى جارىستاردى وتكىزۋگە بولادى. بۇگىنگى تاڭدا الىس جاقىن شەتەلدەردەگى سپورتشىلار وسى شاڭعى بازاسىندا وزدەرىنىڭ وقۋ- دايىندىق جيىندارىن وتكىزۋگە قىزىعۋشىلىق تانىتىپ وتىر» دەدى ول. نىساننىڭ اشىلۋ سالتاناتىندا ەلباسىنىڭ ءوزى «قازاقستاننىڭ جەرى انشەيىن جاتقان دالا ەمەس, نەشە ءتۇرلى كەرەمەت دەمالاتىن جەرلەر بار ەكەنىن كورسەتەيىك. ونىڭ ۇستىنە استانا ىرگەسىندەگى بۋرابايدا الۋان ءتۇرلى شارالار وتكىزىلەتىن بولادى. تۋريستىك جەرلەردى كوبەيتىپ, باعاسىن قولجەتىمدى ەتىپ قويۋ كەرەك. تۋريستەردىڭ سانىن ءۇش ميلليوننان ون ميلليونعا ارتتىراتىن بولساق, ودان تۇسەتىن قارجى 8 پايىزعا ارتادى» دەگەنى ەسىمىزدە.
جاعاجاي, اللەيا, اكۆاپارك…
ءترامپليندى تاماشالاعان سوڭ, وبلىس اكىمى جۋرناليستەردى ەرتىپ, ورتالىق الاڭعا قاراي اياڭدادى. جولشىباي بۋرابايدىڭ ماسەلەلەرىمەن تانىستىرىپ كەلەدى. «ارينە, بىزدە دە شەشىلمەگەن ماسەلە بار. ونى ءوزىمىز جاقسى بىلەمىز» دەدى اكىم. ونىڭ ايتۋىنشا, بۋراباي كەنتىندە اۋماعى 14 گەكتاردى الاتىن جاڭا ىقشام اۋداننىڭ قۇرىلىسى باستالىپتى. بىزگە كەنتتىڭ ورتالىق الاڭى مەن كوشەلەرىندەگى اياقتالعان جوندەۋ جۇمىستارىن كورسەتتى. جاڭادان ەكى اللەيا سالىنىپ, قالدىقتاردى سۇرىپتايتىن زاماناۋي كونتەينەرلەر مەن ورتالىق كوشەلەردىڭ بارىنە جاڭادان جول بەلگىلەرى قويىلىپتى. وسىنىڭ ناتيجەسىندە وقىس وقيعالار ايتارىلىقتاي ازايعان.
ورتالىق الاڭنان سوڭ, تۋريستىك الاڭعا قاراي بەتتەدىك. وندا ولكەتانۋ جانە تابيعات مۋزەيى, حايۋاناتتار ساياباعى, كادەسىي دۇكەندەرى, ويىن-ساۋىق ورتالىقتارى شوعىرلانعان. بۇل جەردەگى حايۋاناتتار ساياباعىن بولاشاقتا سافاري-ساياباققا اينالدىرۋ ماقساتىندا كەڭەيتۋ جوسپارلانعان كورىنەدى.
مالىك مىرزالين كول جاعاسىنداعى پروبلەمالاردى دا ءسوز ەتتى. كوركەيتۋ ءۇشىن اعىلشىن ينۆەستورلارى 10 سۋ سىرعاناعى بار ءۇستى جابىق اكۆاساياباق سالۋدا. قۇنى – 200 ملن تەڭگە. جوبا 2019 جىلى اياقتالۋى ءتيىس. ارينە, ينۆەستورلارمەن كەلىسىم قيىنعا سوققان ەكەن. ويتكەنى ولار اشىق اسپان استىنداعى ساياباق سالعىسى كەلەدى. ال تۋريستەر ءۇشىن تەك ماۋسىمدىق كەزدە ەمەس, اكۆاساياباقتىڭ جىل بويى جۇمىس ىستەگەنى ءتيىمدى. جالپى, كول جاعاسىندا تەگىن جانە اقىلى جاعاجايلار بار. باعاسى 500 تەڭگەدەن باستالىپ, قىزمەت كورسەتۋ تۇرىنە بايلانىستى كوبەيە بەرەدى.
بولەكتاۋ بيىگىندەگى سۇحبات
اكىم جۋرناليستەرگە سەرۋەن رەتىندە بولەكتاۋدىڭ ەڭ بيىك جەرىنە شىعۋدى ۇسىندى. ارينە, تاۋعا شىعۋ قالام يەلەرىنە وڭايعا سوقپادى. ءار جەرگە ءبىر توقتاپ, شارشاپ-شالدىعىپ جەتكەندە اكىم جۋرناليستەردى جوعارىدان كۇتىپ الدى. ەلدەن بۇرىن جىلدام جەتكەنىنە قاراپ, اكىم اپتا سايىن تاۋعا شىعاتىن شىعار دەپ ويلادىق. بولەكتاۋدىڭ باسىنداعى سۇلۋلىقتى سوزبەن جەتكىزۋ مۇمكىن ەمەس. اللانىڭ قازاققا بەرگەن بايلىعىنا تامسانىپ بولعاننان كەيىن, اكىم ءتۋريزمدى دامىتۋدىڭ باسقا دا جوبالارى تۋرالى ايتا باستادى.
«الدا جۇزەگە اساتىن جوبالاردىڭ ءبىرى – بولەكتاۋ تاۋىنىڭ ماڭايىندا تۇرعىزىلاتىن 233 گەكتار اۋماقتى قامتيتىن بىرنەشە نىسان. ول – سپورت جانە ساۋىقتىرۋ ورتالىقتارى, وتباسىلىق قوناقۇيلەر, اكۆاساياباق, سىرعاناۋ الاڭدارى جانە تاعى باسقالار. بۇگىندە اتالعان جوبالاردىڭ ينجەنەرلىك ينفراقۇرىلىمدارى بويىنشا جۇمىستار جۇرگىزىلۋدە. ەكىنشى ۇلكەن جوبا –ششۋچە كولىنىڭ جاعاسىندا, Rixos Borovoe قوناقۇيىنىڭ جانىنان كوتتەدجدەر قالاشىعىن تۇرعىزۋ. جاقىن ارادا قالاشىق قۇرىلىسى باستالادى. تاعى ءبىر جوبا – بۋراباي كەنتىندەگى جاڭا مەشىت پەن 14 گەكتار جەردى قامتيتىن كوپبەيىندى كەشەننىڭ قۇرىلىسى اياقتالۋعا جاقىن. بۋراباي كەنتىنەن باستاۋ الاتىن كەشەن كولگە دەيىن جالعاسادى. اتالعان قۇرىلىس نىساندارى – ۇكىمەت پەن مادەنيەت جانە سپورت مينيسترلىگىنىڭ ءتۋريزمدى دامىتۋدا بىرلەسىپ قولعا العان جوبالارى. سونىمەن قاتار, اقىلباي كولىندە ات سپورتى جانە كوكشەتاۋدىڭ سولتۇستىك جاق بەتىندە تاۋدان سىرعاناۋ كەشەندەرى بوي كوتەرمەك. قازىرگى ۋاقىتتا الدىڭعى قاتارلى كومپانيالارمەن جۇمىستار جۇرگىزىلدى. الدىمەن تاۋدان سىرعاناۋدىڭ ءارتۇرلى دەڭگەيى بويىنشا ۇزىندىعى 5 شاقىرىم جەردى الاتىن 14 تاۋدان ءتۇسۋ قۇرىلعىسى سالىناتىن بولادى» دەدى وبلىس اكىمى مالىك مىرزالين.
قالاۋىڭىز قاي جەر: بۋراباي نەمەسە انتاليا
بۋرابايدان گورى تۇرىك ەلىنە بارىپ دەمالعان الدەقايدا ارزان. جۇرتتىڭ كوبى وسىنداي پىكىردى ءجيى ايتاتىنى راس. «بۋراباي شىنىمەن شەتەلدەن قىمبات پا؟» دەگەن ساۋال اكىمگە توتەسىنەن قويىلدى. مالىك مىرزالين بۇل ساۋال بۇگىنگى كۇنگە دەيىن اقمولا وبلىسى اكىمدەرىنە ۇنەمى قويىلاتىنىن ايتىپ, جىميدى.
«قازىر جاعداي قالىپقا ءتۇستى. بۇگىنگى كۇنگە دەيىن بۋراباي شيپاجايىندا ەشقانداي باسەكەلەستىك بولمادى. ادامدار جىلىنا ءبىر رەت, ياعني جاز بويى عانا جۇمىس ىستەپ, جىلدىق تابىس تاپقىسى كەلدى. بۇل اينالىپ كەلگەندە, باعانىڭ وسۋىنە اكەلەدى. ءبىزدىڭ ماقسات – جىل بويعى قىزمەتتى دامىتۋ. بۇل تۇرعىدا ينۆەستورلار تارتىلىپ, جاڭادان ينفراقۇرىلىمدار قولعا الىندى. جىل بويى جۇمىس ىستەيتىن قوناقۇيلەر سالىنۋدا. ارينە, ولاردىڭ قىزمەت ساپاسى مەن باعاسى رەتتەلەتىن بولادى. ال وسىعان دەيىن جۇمىس ىستەپ كەلگەن قوناقۇيلەر باسەكەگە قابىلەتتى ءارى قولجەتىمدى قىزمەت كورسەتىپ, باعانى ءتۇسىرۋى كەرەك» دەيدى وبلىس اكىمى.
بەلگىلى بولعانداي, بۋرابايداعى قوناقۇيلەردى ساناتىنا قاراي ستاندارتتاۋ ماسەلەسى قولعا الىنعان. مۇندا Four seasons باعدارلاماسى بويىنشا اي سايىن ءۇش-ءتورت شارا ۇيىمداستىرىلادى. تۋريستەر ءۇشىن سپورتتىق, مادەني, ويىن-ساۋىق باعدارلامالارى بار. ارينە, بۇل ماسەلەنىڭ ءبارىن كەشەندى تۇردە شەشۋ كەرەك. سوندىقتان اكىمدىك Burabay PASS تۋريستەرگە ارنالعان كارتا جوباسىن ىسكە قوسىپتى. ول جۇيە بويىنشا ۇناتقان قوناقۇيىڭىزدى برونداپ, الدىن الا تولەم جاسايسىز. سوسىن قولىڭىزعا كەشەندى كارتا بەرىلەدى.
«وسى كارتانىڭ ىشىندە ءبارى قاراستىرىلعان. ياعني, اقشاڭىزدى ەلۋ پايىزعا دەيىن ۇنەمدەۋگە بولادى. بۇل – وتە قولجەتىمدى باعا. سودان كەيىن عانا بۋرابايدا نەمەسە تۇركيادا دەمالعان قانشالىقتى ارزانىراق تۇسەتىنىن سالىستىرا الاسىز» دەدى اقمولا وبلىسىنىڭ اكىمى مالىك مىرزالين.
اجەتحانا دا ماڭىزدى
قازاقستاننىڭ قاي وڭىرىنە جول تارتساڭىز دا, جول بويىنداعى اجەتحانالاردىڭ جايى سىن كوتەرمەيدى. ماسەلەن, وسى جازدا الاكولدىڭ جاربۇلاق جاقتاعى جاعاسىنا جولىمىز تۇسكەن ەدى. اۆتوبۋس ايالداعان ەكى جەردىڭ دە دارەتحاناسى ادام ايتسا نانعىسىز جاعدايدا بولدى. تەگىن اجەتحانا تۇگىلى, اقىلى اجەتحانانىڭ وزىنە كىرۋ مۇمكىن ەمەس. قۇلاعالى تۇرعان اجەتحانانىڭ نە ەسىگى نە توبەسى جوق. باسقا امال جوق. اۆتوبۋستىڭ قىرىققا جۋىق جولاۋشىسى جالعىز دارەتحانانىڭ كەزەگىندە تۇردى. ءتۋريزمدى دامىتۋ ءۇشىن تىم بولماسا جول بويىنداعى اجەتحانالاردى رەتكە كەلتىرگەن ءجون-اۋ. ال بۋرابايعا بارار جولدا بۇل ماسەلە تولىعىمەن شەشىمىن تاپقانى قۋانتتى. «جۇرتتىڭ كوبى اكىم دەگەن اجەتحانا سەكىلدى ۇساق-تۇيەك ماسەلەمەن اينالىسپاۋى ءتيىس دەپ سىناپ جاتادى. مەن ول ويمەن كەلىسپەيمىن, كەرىسىنشە اينالىسۋى كەرەك» دەگەندى ايتىپ قالدى. بۇعان دەيىن «استانا-بۋراباي» تاسجولى بويىنداعى اجەتحانالار ماسەلەسىنە قاتىستى ءبىرشاما سىن ايتىلىپ كەلگەنى اقيقات. بۇگىندە جول بويىندا «قازاۆتوجول» ۇلتتىق كومپانياسىنىڭ باستاماسىمەن «Kazway» پاۆيلونى ىسكە قوسىلعان. ونىڭ ىشىندە ءدامحانا, دۇكەن, اجەتحانا, تەلەفون قۋاتتايتىن قۇرىلعى, wi-fi, اۆتوتۇراق, ياعني جولاۋشىعا قاجەتتىنىڭ ءبارى بار. ءبىر پاۆيلوننىڭ قۇنى – 22 ملن. مۇنى كاسىپكەرلەر جالعا الىپ, ءوز ىستەرىن جۇرگىزىپ وتىر.
«اقمولا وبلىسى بويىنشا وسىنداي 6 پاۆيلون بار, ونىڭ تورتەۋى تاسجول بويىندا, ەكەۋى بۋراباي كۋرورتىندا ورنالاسقان. بۇدان بولەك, بۋرابايدىڭ وزىندە ەۋروپالىق ستاندارتقا ساي زاماناۋي ءۇش اجەتحانا قويىلدى, الداعى ۋاقىتتا ولاردىڭ سانىن ون ءبىر داناعا جەتكىزۋ قاراستىرىلۋدا» دەدى مالىك مىرزالين.
نە دەسەك تە, جۋرناليستەردى كۇتىپ الىپ, بارلىق پروبلەمالاردى كورسەتىپ, الداعى جوبالار تۋرالى كەڭىنەن مالىمدەگەن اقمولا وبلىسىنىڭ اكىمى مالىك مىرزالين تىم قاراپايىمدىلىعىمەن تاڭ قالدىردى. اينالاسىنا بيزنەستەن قىزمەتكە كەلگەن ءوزى سەكىلدى قاراپايىم ازاماتتار جينالعانىن كوردىك. ويتكەنى ايماق باسشىسى قوناقۇي, مەيرامحانا يەلەرىمەن ءجيى كەزدەسىپ, ورتاق ماسەلەلەردى بىرگە تالقىلاعاندى داستۇرگە اينالدىرعان ەكەن. بۋرابايعا دەمالۋعا ەمەس, جۇمىس بابىمەن ءجيى كەلەتىنى دە سوندىقتان.
كوز تويماس سۇلۋلىعىنا قاراپ «قازاقستاننىڭ شۆەيتسارياسى» اتانعان بۋرابايعا مەملەكەت تاراپىنان قولداۋ دا كوپ, قاراجات تا جەتكىلىكتى. سوندىقتان بارىن سالىپ, جانىن سالىپ قىزمەت ەتسە, بۇل بۋراباي ءالى تالاي اكىمنىڭ باعىن جاندىرار ەدى.
