4 شىلدە كۇنى استانا كۇنىنە ارنالعان مەرەكەلىك شارالار رەسمي تۇردە باستالىپ, سونىڭ ايشىقتى كورىنىسى رەتىندە ەسىلدىڭ قوس جاعالاۋى توعىساتىن تۇستا ەلىمىزدىڭ مەملەكەتتىك تۋىن كوتەرۋ ءراسىمى ءوتتى. وعان ەلباسى نۇرسۇلتان نازارباەۆ قاتىستى. جىلداعى داستۇردەگىدەي, ءراسىم كەزىندە مەملەكەت باسشىسى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى جوعارى اسكەري وقۋ ورىندارىنىڭ تۇلەكتەرىنە وفيتسەرلىك شەن تاپسىردى.
ەلوردا تويىنىڭ لەبى قاشان دا ەرەكشە. اسىرەسە, استانالىقتار ءۇشىن. رەسمي شارا وتەتىن «اتامەكەن» – قازاقستان كارتاسى» ەتنومەموريالدىق كەشەنىنىڭ ماڭايىندا حالىق كوپ. قاز-قاتار ساپ تۇزەگەن ساربازدار دا شارانىڭ ماڭىزدىلىعىن ايعاقتاي تۇسكەن.
الاڭعا پرەزيدەنت نۇرسۇلتان نازارباەۆ
كەلگەننەن كەيىن مەملەكەتتىك تۋ بىرتىندەپ كوككە قاراي كوتەرىلە باستادى. ستەللانىڭ ۇشار تۇسى – 111 مەتر بيىكتىككە جەتكەندە كوك تۋىمىز تۇعىرىنا قوندى. وسى ساتتە مەملەكەتتىك ءانۇران شىرقالىپ سالا بەردى.
جۇرتشىلىقتى مەرەكەسىمەن قۇتتىقتاعان ەلباسى كوك بايراعىمىز جەلبىرەپ, ءانۇرانىمىز شىرقالعان سايىن ءاربىر قازاقستاندىق ەلىنە دەگەن ەرەك سەزىمگە بولەنەتىنىن جەتكىزدى.
– بۇل – ءبارىمىزدىڭ ورتاق تابىسىمىزعا, تاۋەلسىز ەلدىڭ باتىل قادامىنا دەگەن ماقتانىش. بۇگىندە بۇكىل الەم ءۇشىن بۇل بايراق – تابىستى مەملەكەتتىڭ جانە ءبىزدىڭ ۇلتتىق ءبىرلىگىمىزدىڭ سيمۆولى. قازاقستاننىڭ تۋىندا التىن كۇن بەينەلەنگەن, سول كۇن مەن ماڭگىلىك اسپان استىندا ۇلان-بايتاق دالامىز كوسىلىپ جاتىر. تاياۋدا وسى بايراق دۇنيەجۇزىلىك «ەكسپو-2017» كورمەسىنىڭ اجارىن اشاتىن بولادى. تۋ كوتەرۋ ارقىلى الداعى وليمپيادا ويىندارى مەن وزگە دە سپورت جارىستارىندا ەلىمىزدىڭ ءالى تالاي جەڭىستەرى اسپەتتەلەتىنىنە سەنىمدىمىن. بايراق مەملەكەتتىگىمىزدى ساقتاۋ, ونى نىعايتۋ كەرەكتىگىن كۇن سايىن ەسىمىزگە سالىپ تۇرادى, – دەدى نۇرسۇلتان نازارباەۆ.
وسىناۋ ايتۋلى راسىمگە سەبەپ بولىپ وتىرعان استانا كۇنى – جالپى ۇلتتىق ماڭىزدى مەرەكە. سەبەبى, استانا – وتانىمىزدىڭ جۇرەگى, ازاتتىعىمىزدىڭ ايبىنى. مەملەكەت باسشىسى ەلوردانىڭ ءاربىر جەتىستىگىندە بارشا ازاماتتىڭ ورتاق ءارى شابىتتى ەڭبەگىنىڭ جەمىسى جاتقانىن اتاپ ءوتتى.
– استانانى سالۋعا رەسپۋبليكامىزدىڭ تۇكپىر-تۇكپىرىنەن كەلەدى. سوندىقتان, استانا كۇنى – ءار وتباسىنىڭ, ءاربىر قازاقستاندىقتىڭ جۇرەگىنە جاقىن مەرەكە. بۇل قالادا ۋاقىتتىڭ قان تامىرى ەكى ەسە ءجيى سوعادى. ەلوردا كوركى جىل سايىن وزگەرىپ كەلەدى. بۇگىندە قالا الدىندا ەلىمىزدى جاڭا بيىكتەرگە باستايتىن زور ماقساتتار تۇر. سونىڭ باستىسى –
«ەكسپو – 2017» كورمەسى. بۇل جاھاندىق
شارا استانالىقتاردىڭ تۇرمىس ساپاسىن جاڭا دەڭگەيگە كوتەرىپ, ەلىمىزدىڭ جەتىستىكتەرىن ەسەلەي تۇسەدى. وسى تاماشا مەرەكەنى اتاپ وتە وتىرىپ, ءبىز حالقىمىزدىڭ ەڭبەكقورلىعى مەن تاباندىلىعىن, كۇش-قۋاتىن دارىپتەيمىز, – دەدى ەلباسى.
بۇدان كەيىن سالتاناتتى ءراسىم ەلىمىزدەگى جوعارى اسكەري وقۋ ورىندارىنىڭ تۇلەكتەرىنە وفيتسەرلىك شەن تاپسىرۋعا ۇلاسىپ, قورعانىس مينيسترلىگى قۇرلىق اسكەرلەرى اسكەري ينستيتۋتىن, ىشكى ىستەر مينيسترلىگى ىشكى اسكەرلەر اسكەري ينستيتۋتىن, ۇلتتىق قاۋىپسىزدىك كوميتەتىنىڭ اسكەري ينستيتۋتىن ۇزدىك ءبىتىرۋشى
12 تۇلەك پرەزيدەنتتىڭ قولىنان پوگون الدى.
سالتاناتتى جيىندا نۇرسۇلتان نازارباەۆ
بارشا قازاقستاندىقتى استانا كۇنىمەن قۇتتىقتاپ, ءاربىر شاڭىراققا باق-بەرەكە تىلەدى.
نۇرسۇلتان نازارباەۆ:
– ەلىمىزدىڭ جۇرەگى, تاۋەلسىزدىگىمىزدىڭ تىرەگى استانانىڭ مەرەكەسى – بۇكىل قازاقستاندىقتاردىڭ مەرەكەسى. باس قالامىز – تۇتاس ەل دامۋىنا سەرپىن بەرگەن, كەمەل كەلەشەكە جول اشقان قاستەرلى بويتۇمارىمىز. شىن مانىندە, ەۋرازيا جاۋھارىنا اينالعان استانا ەلىمىزدى بيىك بەلەستەرگە جەتەلەپ تۇر. جاھان جۇرتىنىڭ نازارى اۋعان حالىقارالىق شارالاردىڭ ەلوردا تورىندە ءوتۋى – سونىڭ بەلگىسى. ءبىز تاۋەلسىزدىك جىلدارى جاڭا استانا سالۋ ارقىلى حالقىمىزدىڭ جاسامپاز قۋاتىن دۇنيەجۇزىنە پاش ەتتىك. ەندىگى مۇراتىمىز – بىرلىگى جاراسقان وتانىمىزدى ماڭگىلىك ەل ەتۋ. بۇل ءۇشىن ءاربىر ازامات تاتۋلىق پەن تۇراقتىلىقتىڭ قولداۋشىسى بولۋى كەرەك.
قىمبات توقتامۇرات
