بۇگىن – مادەنيەت جانە ونەر قىزمەتكەرلەرى كۇنى. نۇر-سۇلتان قالاسى مادەنيەت باسقارماسىنا قارايتىن مادەني مەكەمەلەردىڭ اراسىندا ە.راحماديەۆ اتىنداعى مەملەكەتتىك اكادەميالىق فيلارمونياسىنىڭ الاتىن ورنى ەرەك. شيرەك عاسىر بۇرىن اقمولا وبلىستىق فيلارمونياسى نەگىزىندە قۇرىلعان ونەر وشاعى وسى جىلدار ىشىندە كوپتەگەن جەتىستىكتەرگە جەتتى.
بۇگىنگى تاڭدا ەلوردا فيلارمونياسى كونتسەرتتىك-اعارتۋشىلىق باعىتتاعى مەكەمەلەردىڭ اراسىندا ەلىمىزدە جەتەكشى ورىندى الادى. ونەر وشاعىندا 11 شىعارماشىلىق توپ بار. اتاپ ايتقاندا, قازاق وركەسترى, سيمفونيالىق وركەستر, ۇرلەمەلى اسپاپتار وركەسترى, ىشەكتى كۆارتەت, كامەرالىق حور, «سارىارقا» فولكلورلىق ءانسامبلى, «شالقىما» حالىق بي ءانسامبلى, ءبىر مەزگىلدە 75 شىعارما ورىنداپ, قازاقستاننىڭ رەكوردتار كىتابىنا ەنگەن «قورقىت» ەتنو-ءانسامبلى, كلاسسيكالىق جانە ەسترادالىق ۆوكال ءبولىمى, حالىق ءانى ءبولىمى, «الەم» ەسترادالىق بي ءانسامبلى.
ەلوردا فيلارمونياسىندا ەلىمىزدە عانا ەمەس, كەيبىر شەتەلدەردە دە تانىمال قازاقستاننىڭ جانە تاتارستاننىڭ حالىق ءارتىسى نۇرجامال ۇسەنباەۆا, قازاقستاننىڭ ەڭبەك سىڭىرگەن ءارتىسى مايرا ءىلياسوۆا, قازاقستاننىڭ ەڭبەك سىڭىرگەن قايراتكەرلەرى ەرنار مىنتاەۆ, ايتقالي جايىموۆ, ايگۇل قوسانوۆا, بيبىگۇل جانۇزاق, ازامات جىلتىرگوزوۆ, التىناي جوراباەۆا, گۇلزيرا بوكەيحان, ارايلىم راحىمقىزى, «قۇرمەت» وردەنىنىڭ يەگەرى ابدراسۋل ەسەكەەۆ, مادەنيەت قايراتكەرى نۇراي تاناباەۆ, ت.ب. ونەر جۇلدىزدارى جۇمىس ىستەيدى.
مۋزىكالىق مادەنيەتتىڭ ەڭ جاقسى داستۇرلەرىن ساقتاۋ ءۇشىن فيلارمونيا الەمدەگى جەتەكشى ورىنداۋشىلار مەن شەتەلدىك ديريجەرلەرمەن ىنتىماقتاستىق ورناتقان. بۇل قاتاردا رەسەي, گەرمانيا, پولشا, اقش, لاتۆيا, يزرايل, سلوۆەنيا, گرەتسيا, يتاليا, تاعى باسقا ەلدەردەگى كشيشتوف پەندەرەتسكي, ۆلاديمير اشكەنازي, الەكساندر چايكوۆسكي, دەنيس شاپوۆالوۆ, ساۋليۋس سوندەتسكيس, پلاسيدو دومينگو, اندرەا بوچچەللي, سارا برايتمان, لارا فابيان, سۋمي دجو, دەنيس ماتسۋەۆ, ۆلاديمير كراينەۆ, رينات سالاۆاتوۆ, بەندجامين يۋسۋپوۆ, روبەرت كانەتتي, اناستاسيوس پاپپاس, روبەرت گۋتتەر, ماكسيم ۆەنگەروۆ, ماركو سكياۆو سىندى تانىمال ەسىمدەر بار.
2019 جىلى سيمفونيالىق وركەستر «Festival Des Orchestres Du Monde» (الەم قالالارىنىڭ فەستيۆالى) اتتى حالىقارالىق فەستيۆالگە العاشقى وتاندىق وركەستر بولىپ قاتىستى. ونەر ۇجىمىن اتاقتى فرانتسۋز ديريجەرى فيليپپ يۋي شاقىردى.
فيلارمونيادا الەمگە ايگىلى ارتىستەر مەن قازاقستان كومپوزيتورلارىنىڭ مەرەيتويلىق كونتسەرتتەرى ۇزىلمەيدى. سونىڭ ىشىندە كەيىنگى جىلدارى شاكەن ايمانوۆتىڭ «تاقيالى پەرىشتە» ءفيلمىنىڭ 45 جىلدىعىنا وراي وتكەن كونتسەرتتى, وسپان باتىردىڭ 120 جىلدىعىنا ارنالعان «قايقايا شاپكان قاراگەر», كەنەن ازىرباەۆتىڭ 135 جىلدىعىنا ارنالعان «مەن سۇيەمىن حالقىمدى», سەگىز سەرىنىڭ 200 جىلدىعىنا وراي وتكەن «مۇحامەدكاناپيا. «سەگىز سەرى», تولەگەن مومبەكوۆتىڭ 100 جىلدىعىنا ارنالعان «سالتانات» سىندى كونتسەرتتەردى اتاپ وتۋگە بولادى. ال كەشە عانا قازاق وركەسترى كورنەكتى كومپوزيتور كەنجەبەك كۇمىسبەكوۆتىڭ تۋعانىنا 95 جىل تولۋىنا وراي «دالا سىرى» اتتى كونتسەرت وتكىزدى.
كامەرالىق حور حالىقارالىق كونكۋرستار مەن فەستيۆالداردا بىرنەشە رەت ماقتالدى. سوندا ۇجىمنىڭ كاسىبيلىگى جايىندا دا ايتىلدى. 25 ەلدەن 500-دەن استام ادام قاتىسقان «استانا – الەمنىڭ داۋىسى» اتتى ءىرى حالىقارالىق فەستيۆالدى اشۋعا وسى ونەر ۇجىمىنا تاپسىرىلۋى دا تەگىن ەمەس.
فيلارمونيا الەۋمەتتىك وسال توپتارعا ارنالعان كوپتەگەن قايىرىمدىلىق شارالارىن وتكىزەدى. جىل سايىن قارتتار ۇيىندە, بالالار ۇيىندە, بالالاردى وڭالتۋ ورتالىقتارىندا, ەمحانالاردا جانە تۇزەتۋ مەكەمەلەرىندە كونتسەرت بەرەدى. ونەر وشاعى كەشتەرىنە زەينەتكەرلەر مەن مۇمكىندىگى شەكتەۋلى جاندارعا تەگىن كىرە الادى.
فيلارمونيا سوليستەرى اراسىندا كوپتەگەن حالىقارالىق جانە رەسپۋبليكالىق بايقاۋلاردىڭ لاۋرەاتتارى بار. ماسەلەن, كۇنى كەشە عانا قىزىلوردا قالاسىندا وتكەن ءانشى-كومپوزيتور, قازاقستاننىڭ ەڭبەك سىڭىرگەن قايراتكەرى باتىرحان شوكەنوۆتىڭ تۋعانىنا 60 جىل تولۋىنا ارنالعان «وتان-انا» ءىىى رەسپۋبليكالىق انشىلەر بايقاۋىنا ەلوردالىق فيلارمونيانىڭ كلاسسيكالىق جانە ەسترادالىق ۆوكال ءبولىمىنىڭ ءسوليسى اقبوتا قۇسنادين قاتىسىپ, باس جۇلدەنى جەڭىپ الدى. ال ونىڭ فيلارمونياداعى ارىپتەسى ايدىن جۇماباي ەكىنشى ورىنعا يە بولدى.
وتكەن جىلى ەلوردالىق فيلارمونياعا كورنەكتى كومپوزيتور, كسرو حالىق ءارتىسى, قاز كسر مەملەكەتتىك سىيلىعىنىڭ لاۋرەاتى, قازاقستاننىڭ ەڭبەك ەرى ەركەعالي راحماديەۆتىڭ اتى بەرىلدى. قازىر ونەر وشاعى ءارتۇرلى باعىتتاعى مۋزىكالىق شىعارمالاردى ناسيحاتتاۋعا ءوز ۇلەسىن قوسىپ, اعارتۋشىلىق باعىتتى دا قاتار ۇستاپ وتىر. ەل مەن ەلوردا مادەنيەتىنىڭ ورلەۋىندە دە فيلارمونيانىڭ وزىندىك ۇلەسى بار. جاس ۇرپاقتى تاربيەلەۋ, ۇلتتىق ونەردىڭ مايەگىن ساقتاۋ جانە جەتىلدىرۋ, الەمدىك ۇردىستەردەن قالماي, العا ورلەۋ قىزمەتىن دە ورىنداپ كەلە جاتىر.
فيلارمونيا ۇجىمدارى مەن ارتىستەرىن كاسىبي مەرەكەلەرىمەن قۇتتىقتاپ, شىعارماشىلىق تابىستار تىلەيمىز! ءاردايىم ونەردىڭ ورىندە بولىڭىزدار!
