استانادا جاسىل بەلدەۋدەگى كوشەتتەر سانى ارتىپ, كارىز تازارتۋ قۇرىلىسى سالىنادى. وسى باعىتتاعى جۇمىستاردى ساپالى جۇرگىزۋ ءۇشىن ۇكىمەت باسشىسىنىڭ ءبىرىنشى ورىنباسارى رومان سكليار, استانا قالاسىنىڭ اكىمى جەڭىس قاسىمبەك, اقمولا وبلىسىنىڭ اكىمى ەرمەك مارجىقپاەۆ قالامەن شەكارالاس اۋماقتى اۋەدەن باقىلادى.
تىكۇشاقپەن ارالاۋ بارىسىندا مايبالىق كولىنىڭ, پرەوبراجەنسك سۋ تورابىنىڭ جانە تاعى باسقاسىنىڭ كولەمى ناقتىلاندى.
جاڭا اۋىز سۋ ستانساسىنىڭ (3-سسس) پايدالانۋعا بەرىلۋىن جانە سۋ تۇتىنۋ كولەمىنىڭ كوبەيگەنى ەسكەرىلە وتىرىپ, قالاعا سۋ بۇرۋ كولەمى ارتتى. تازارتۋ قۇرىلىستارىنىڭ (1-كتق) قۋاتى جەتكىلىكسىز, سوندىقتان وسى جىلدىڭ كۇزىندە ەكىنشى كارىز تازارتۋ قۇرىلىسى (2-كتق) باستالادى. بۇل عيماراتتىڭ قۋاتى تاۋلىگىنە 200 مىڭ تەكشە مەتر بولادى.
ارالاۋ بارىسىندا «استانا-كوگالداندىرۋ قۇرىلىسى» جشس-گە قاراستى باققا باردى. ونىڭ اۋدانى 350 گەكتارعا جۋىق, ءارتۇرلى اعاش تۇرلەرىنىڭ كوشەتى وسىرىلەدى. تالىمباق جىل سايىن 30 مىڭ دانا كوشەت بەرە الادى. 2025 جىلدان باستاپ اعاش تۇقىمدارىنىڭ 100 مىڭ كوشەتىنە, تامىر جۇيەسى جابىق 45 مىڭ بۇتاعا جانە تامىر جۇيەسى اشىق 300 مىڭ بۇتاعا دەيىن كوبەيتىلەدى دەپ جوسپارلانىپ وتىر.
جىل سايىن جاسىل بەلدەۋدەگى كوشەتتەر سانى ارتىپ كەلەدى. مىسالى, بيىلدىڭ وزىندە تەك جاسىل بەلدەۋدە 500 مىڭعا جۋىق جاسىل جەلەك (اعاشتار, بۇتالار جانە ت.ب.) وتىرعىزۋ جوسپارلاندى. قالانىڭ وزىندە وسى كولەمدە جاسىل جەلەك وتىرعىزىلدى.
ەلوردانىڭ جاسىل بەلدەۋىنىڭ جالپى اۋدانى – 15 مىڭ گەكتار. وندا 11,5 ملن استام اعاش پەن 2 ميلليون بۇتا وسەدى. نەگىزىنەن جاپىراقتى اعاش تۇرلەرىنە باسىمدىق بەرىلەدى.
