مەملەكەت باسشىسى استانا قالاسىنىڭ اكىمى اسەت يسەكەشەۆتى قابىلدادى. كەزدەسۋدە قازاقستان پرەزيدەنتىنە ەلوردانىڭ الەۋمەتتىك-ەكونوميكالىق دامۋى جانە استانانىڭ 20 جىلدىعىن مەرەكەلەۋگە دايىندىق بارىسى جونىندە مالىمدەلدى.
– 2017 جىلدىڭ قورىتىندىسى بويىنشا قالانىڭ الەۋمەتتىك-ەكونوميكالىق دامۋ كورسەتكىشى 2 ەسەگە جۋىق ارتتى. ونەركاسىپ 7 پايىزعا ءوستى. سوڭعى بەس جىل ىشىندە 46 يندۋستريالدىق جوبا 1 تريلليون تەڭگە كىرىس اكەلدى, – دەدى اسەت يسەكەشەۆ.
سونداي-اق, نۇرسۇلتان نازارباەۆقا نەگىزگى كاپيتالعا تارتىلعان جەكە ينۆەستيتسيالار كولەمى ۇلعايىپ, ەسەپتى كەزەڭ ىشىندە ونىڭ ۇلەسى 70 پايىز بولعانى تۋرالى باياندالدى.
– وتكەن جىلى 2,4 ميلليون شارشى مەتر تۇرعىن ءۇي سالىنىپ, رەكوردتىق كورسەتكىشكە قول جەتكىزىلگەن ەدى. ءبىز قازىر جەكە ينۆەستورلار مەن ۇلتتىق كومپانيالار ەسەبىنەن قالانىڭ ءتورت اۋدانىندا قۇرىلىس جۇمىستارىن جۇرگىزىپ جاتىرمىز, – دەدى استانا قالاسىنىڭ اكىمى.
ءا.يسەكەشەۆ نۇرسۇلتان نازارباەۆقا ەلورداداعى ينفراقۇرىلىمدىق جوبالاردىڭ ىسكە اسىرىلۋ بارىسى مەن استانا ماڭىندا جاڭا جولدار سالۋ جوسپارى جونىندە مالىمدەدى.
مەملەكەت باسشىسى ەلوردادا باسقا وڭىرلەردىڭ اكىمدىكتەرىمەن بىرلەسىپ سالىنعان بىرقاتار الەۋمەتتىك نىساننىڭ قۇرىلىسىنا قاتىستى جۇمىستاردى وڭ باعالادى.
قازاقستان پرەزيدەنتى كەزدەسۋ سوڭىندا ناقتى تاپسىرمالار بەردى.
