10 جەلتوقسان – ەلوردا تاريحىندا ەرەكشە كۇن. 1997 جىلى وسى كۇنى الاتاۋ باۋرايىنان ارقا توسىنە جاڭا استانا بار ءسان-سالتاناتىمەن كوشىپ كەلدى. سول كۇننەن باستاپ تۇڭعىش پرەزيدەنت-ەلباسى نۇرسۇلتان نازارباەۆتىڭ جارلىعىنا سايكەس اقمولا قالاسى قازاقستان رەسپۋبليكاسىنىڭ استاناسى بولىپ جاريالاندى. بۇگىن بۇل تاريحي ساتكە 22 جىل تولىپ وتىر.
سول ۋاقىتتاعى اقمولا مەن قازىرگى نۇر-سۇلتان شاھارى اراسىنداعى ايىرماشىلىق جەر مەن كوكتەي. 300 مىڭعا جۋىق تۇرعىنى بولعان قالا حالقىنىڭ سانى بۇگىندە 1 ميلليون ادامنان استى. ەلوردانىڭ ساۋلەتىنە ساي داۋلەتى قالىپتاستى.
ارتقا بۇرىلىپ قاراساق, سول ءبىر تاريحي ءساتتىڭ ەڭ ءبىر ماڭىزدى, كوركەم كورىنىسى ەلباسىعا ءبىر توپ اقساقالدىڭ جاڭا استانا كىلتىن تاپسىرۋ سالتاناتى مەن باتا بەرۋى بولدى. ءيا, سول وقيعا تالايلاردىڭ جۇرەگىن تولقىتقانى ءسوزسىز. 
– بۇدان بىلاي جانە عاسىردان-عاسىرعا وسىندا, ۇلان-بايتاق ەلدىڭ كىندىگىندەگى حالىق تاعدىرى ءۇشىن ومىرشەڭ تاعدىرى بار شەشىمدەر قابىلداناتىن بولادى. بۇل جەردە وتانىمىزدىڭ جۇرەگى سوعادى. وسى جەردەن قازاقستان ءۇشىنشى مىڭجىلدىقتىڭ تابالدىرىعىندا ءوزىنىڭ تاريحي تاعدىرىن ايقىندايتىن بولادى, – دەگەن ەدى سول ءبىر تاريحي وقيعا كەزىندە نۇرسۇلتان نازارباەۆ.
