قازىرگى تاڭدا الەمدىك ەكونوميكادا ءتۋريزمنىڭ الار ورنى ەرەكشە. سوندىقتان تۋريزم بيۋدجەتتىڭ قامباسىن قومپايتىپ, ءبۇيىرىن تومپايتار بىردەن-ءبىر تابىس كوزى ءارى وتە كۇردەلى سالا. ءبىر جاعىنان ەلدەردىڭ ىنتىماقتاستىعىن ارتتىرىپ, مادەني ومىرىنە دە ەلەۋلى وزگەرىستەر اكەلەدى. ءتۋريزمدى جەتىلدىرۋ حالىقتىڭ قاجەتتىلىكتەرىن عانا قاناعاتتاندىرىپ قويماي, الەۋمەتتىك-ەكونوميكالىق تۇرعىداعى ماڭىزدى ماسەلەلەردى شەشۋگە پايداسىن تيگىزىپ, دامۋشى ەلدەر ساناتىنا جەتكىزەتىنە قانىقپىز.
ماسەلەن, ءتۋريزمدى دامىتىپ وتىرعان ەلدەردىڭ تاباتىن تابىس كوزى ەكسپورتتىڭ بارلىق مولشەرىنىڭ 10-35-كە دەيىنگى پايىزىن قۇرايدى ەكەن. بۇل دەگەنىمىز وتە جوعارى كورسەتكىش, ءارى ەن بايلىقتىڭ ارناسى ەمەس پە؟
وسى جاعدايدى جەتە تۇسىنگەن پرەزيدەنت قاسىم-جومارت توقاەۆ «ۇلىتاۋ» ۇلتتىق تاريحي-مادەني جانە تابيعي مۇراجاي قورىعىندا وتكەن «ۇلىتاۋ 2019» حالىقارالىق تۋريستىك فورۋمىندا قازاقستانعا تۋريست تارتۋ قاجەتتىگىنە اسا ءمان بەرە كەلىپ: «ءبىز سالالىق مەملەكەتتىك باعدارلامانى قابىلدادىق. ونى تولىق جۇزەگە اسىرۋ تۋريزم ۇلەسىن ءجىو-دەگى 8 پايىزعا دەيىن ارتتىرۋعا مۇمكىندىك بەرەدى. كەلۋشىلەردىڭ سانى 9 ميلليونعا دەيىن, ال ىشكى تۋريستەردىڭ سانى 8 ميلليونعا دەيىن ءوسۋى ءتيىس. وسى سالادا جۇمىس ىستەيتىن ادامداردىڭ سانىن 650 مىڭعا جەتكىزۋ كەرەك» دەپ مالىمدەمە جاساعان بولاتىن. ءسوز اراسىندا ءتۋريزمنىڭ ماڭىزدىلىعىن تىلگە تيەك ەتە كەلىپ: « كوپتەگەن شەتەلدىك تۋريستەردى بەس جۇلدىزدى قوناق ۇيلەر, كۋرورتتار سياقتى امبەباپ دۇنيەلەر جالىقتىردى. ولاردى ءارتۇرلى حالىقتاردىڭ مادەنيەتىن, ادەت-عۇرپى مەن سالت-ءداستۇرىن زەرتتەۋ, بارعان ەلدىڭ تاريحىمەن تانىسۋ قىزىقتىرادى. سوندىقتان الەمدە وزىندىك ەرەكشەلىگى بار جەرلەرگە بارۋعا, تاريحي فەستيۆالدارعا جانە كونە ءارى قايتا قالپىنا كەلتىرىلگەن ماڭىزدى وقيعالارعا قاتىسۋعا دەگەن سۇرانىس ارتىپ وتىر. ءبىز وسىنداي ۇردىستەردى پايدالانۋىمىز قاجەت. قازاقستاننىڭ الەمگە ۇسىناتىن بىرەگەي ورىندارى بار» دەپ ەكپىن تۇسىرە ايتقانىنان دا قۇلاعدارمىز.
مەملەكەت باسشىسىنىڭ مالىمدەۋىنەن كەيىن نۇر-سۇلتان قالاسىنىڭ اكىمى ا. كولگىنوۆ ەلوردادا ءتۋريزمدى دامىتۋ جونىندە كەڭەس وتكىزدى. القالى جيىندا تۋريزم سالاسىنداعى جۇمىستى جانداندىرۋ جانە بىرقاتار ءىرى ءىس-شارالار مەن فەستيۆالدەر وتكىزۋدى جوسپارلاۋ قاجەتتىلىگىنە باسا نازار اۋدارىلدى. «پرەزيدەنت «ۇلىتاۋ – 2019» حالىقارالىق تۋريستىك فورۋمىندا ەلىمىزگە جىلىنا 9 ميلليون تۋريست كەلەتىن مەملەكەتتىك باعدارلامانى جۇزەگە اسىرۋدى تاپسىردى. ءبىز قازىر تۋريزم ۋنيۆەرسيتەتىن اشۋ ماسەلەسىن قاراستىرۋدامىز. سوندا ءبىز ىشكى نارىقتى كاسىبي كادرلارمەن قامتاماسىز ەتە الامىز» دەگەن قالا باسشىسى نۇر-سۇلتان شاھارى ەۋرازيا استاناسى رەتىندە ورنالاسۋى ءتيىس, ءارى تۋريستەر كوپ بولعان سايىن, ءىس-شارالاردى كوپ وتكىزۋ قاجەتتىگىنە توقتالدى.
ەلوردادا تۋريزم تەك ماۋسىمدىق ەمەس, جىل بوي ۇزدىكسىز جالعاسپاق. ويتكەنى قولداعى بار اقپاراتقا سۇيەنسەك, استانامىزعا جىلىنا 1 ميلليون 300 مىڭ ادام كەلەدى ەكەن. سونداي-اق نۇر-سۇلتان قالاسى كونگرەستەر مەن كونفەرەنتسيالاردىڭ حالىقارالىق اسسوتسياتسياسىنىڭ (ICCA) مۇشەسى. سول سەبەپتى دە قاۋىمداستىق مۇشەلەرىنە اقپارات الماسۋعا مۇمكىندىك بەرىپ, ءىرى دەڭگەيدەگى ءىس-شارالاردى وتكىزۋدى قامتاماسىز ەتۋمەن قاتار ىسكەرلىك (MICE) ءتۋريزمدى وتكىزۋ ءۇشىن تابىستى الاڭ دەپ تانىلعانىن ەسكەرگەن ءجون. سوندىقتان قازىردەن باستاپ باس قالادا حالىقارالىق اۆيارەيستەردىڭ سانىن ارتتىرۋ, ءىرى حالىقارالىق فەستيۆالدەر مەن جارىستار وتكىزۋدى جوسپارلاۋ, قالانى تۋريستەر ءۇشىن تارتىمدى جانە جايلى ەتۋ كەزەك كۇتتىرمەيتىن مىندەتتەردىڭ ءبىرى بولماق.
نەگىزىنەن ەركە ەسىلدىڭ بويىندا ءسان قۇرعان كەربەز استانانى ىسكەرلىك تۋريزم ورتالىعىنا اينالدىرۋ ماسەلەسى بۇدان بۇرىن دا سان مارتە كوتەرىلىپ, ۇلكەن-ۇلكەن مىنبەرلەردەن از ايتىلعان جوق. تەك سوعان اسا ءمان بەرمەدىك پە, شابان اتتىڭ جۇرىسىندەي ءىسىمىز ونبەي قويعانى راس. دەگەنمەن دە اۋىزدى قۋ شوپپەن سۋرتۋگە دە بولماس. قول قۋسىرىپ قاراپ وتىرعان ءجايىمىز جوق. قولدان كەلگەنشە اتقارىلىپ جاتقان كەشەندى شارالاردىڭ قاراسى دا ءبىرشاما بارشىلىق ەكەنىن ايتا كەتكەن ءجون. «ساباقتى ينە ساتىمەن» بولىپ ءسوز ورايى كەلگەندە بايانداي كەتەيىن.
الدىڭعى جىلى, ياعني 2017 جىلدىڭ سوڭىندا وتاندىق جانە شەتەلدىك تاجىريبەلى مامانداردىڭ تاباندىلىعى مەن جاۋاپكەرشىلىگىنىڭ ارقاسىندا «استانا قالاسىندا تۋريستىك سالانى دامىتۋدىڭ جول كارتاسى» كەشەندى باعدارلاماسىنىڭ تۇساۋكەسەرى ءوتتى. جول كارتاسىندا بەلگىلەنگەن جوباعا سايكەس, الداعى ۋاقىتتا استاناداعى تۋريستىك سالانى – ىسكەرلىك, قالالىق دەمالىس تۇرلەرى جانە مەديتسينالىق تۋريزم باعىتتارىندا دامىتۋعا باسىمدىق بەرىلەتىن بولعان. باس قالامىزعا تۋريستەردى بارىنشا كوپ تارتۋ ماقساتىندا عارىش مۋزەيى, بوتانيكالىق باق, جابىق گۇلزارلار, اكۆاپاركتەر جانە باسقا بۇقارالىق مادەني دەمالىس ورىندارى ىسكە قوسىلىپ, ناتيجەسىندە 2020 جىلى ەلورداعا كەلەتىن تۋريستەردىڭ جالپى سانىن ەكى ميلليون ادامعا جەتكىزۋ, ونىڭ ىشىندە ءبىر ميلليوننان استام شەتەلدىك تۋريستەردى تارتۋ كوزدەلگەن.
قوناقجاي قازاق ەلى ءۇشىن استانامىزدا ۇيالماي كورسەتىپ, تاڭداي قاقتىراتىن جەرلەردەن ەش كەمدە ەمەسپىز. الەمدە تەڭدەسى جوق
ەكسپو-2017 كورمەسىن ابىرويمەن وتكىزگەننەن كەيىن بوساپ قالعان پاۆيلوندار تۋريزم سالاسىن دامىتۋعا بارىنشا ىقپال ەتەتىن مول مۇرانىڭ ءبىرى ەكەندىگى ەش داۋ تۋدىرماسى انىق. اتالمىش كورمەنىڭ بىرەگەي نىسانى – «نۇر الەم» مۋزەي-پاۆيلونىن ساراپشىلار پاريجدەگى ەيفەل مۇناراسى, لوندونداعى حرۋستال سارايى سياقتى عيماراتتارمەن يىق تىرەسە الاتىن الەمدىك مۇرا ۇلگىلەرىنىڭ قاتارىنان ورىن الادى دەگەن پىكىرلەرى كوڭىلگە قونادى.
ءيا, استانانىڭ ىسكەرلىك ءتۋريزمدى دامىتۋعا قاجەتتى الەۋەتى زور. وسى ورايدا تەك ءبىر كوكەيكەستى ماسەلەنى ەسكەرۋىمىز قاجەت سەكىلدى. ەگەر تورتكۇل دۇنيەدەن تۋريست تارتار بولساق بار ءتۇيىن باعاعا كەلىپ تىرەلەتىنى انىق. سوندىقتان ەلىمىزدەگى اۋە كومپانيالارى, قوناق ۇيلەر, تاكسي قىزمەت كورسەتۋ باعاسىن تىم شارىقتاتىپ جىبەرمەۋىنە قاتاڭ باقسىلاۋ جاسالسا نۇر ۇستىنە نۇر. ال ازىرگە ەلوردا تۋريزم ورتالىعىنا اينالاتىنىنا سەنىم مول.
بەيبىت وسپان
