كەشە استاناداعى تاۋەلسىزدىك سارايىندا «Global Silk Road» جىبەك جولى ەلدەرى قالالارى مەرلەرىنىڭ I فورۋمى ءوز جۇمىسىن باستادى. بۇل باسقوسۋدا الەمنىڭ 60 ەلىنەن جيىلعان 30-دان اسا قالا باسشىلارى, 2 مىڭ دەلەگات ساۋدا-ساتتىق, بيزنەس, ينۆەستيتسيا جانە مادەني بايلانىستار سالاسىنداعى زور مۇمكىندىكتەردى اشىق تالقىلايدى. مەرلەر فورۋمى قالالار مەن ۇكىمەتتەر كوشباسشىلارىنىڭ, سالالىق ساراپشىلاردىڭ باسىن بىرىكتىرەتىن بىرەگەي الاڭ بولىپ تابىلادى. ايتا كەتەلىك, بۇگىن بەيبىتشىلىك جانە كەلىسىم سارايىندا استانا اكىمى اسەت يسەكەشەۆتىڭ قاتىسۋىمەن «Global Silk Road» جىبەك جولى ەلدەرى قالالارى مەرلەرىنىڭ I فورۋمىنىڭ پلەنارلىق وتىرىسى وتەدى.
قازاقستاننىڭ ەلورداسى 2017 جىلى شىۇ جانە تمد ەلدەرى استانالارىنىڭ ىسكەرلىك الەۋەتى رەيتينگىندە ءبىر ساتى العا جىلجىپ, 4-ءشى ورىندى يەلەندى. بەدەلدى رەيتينگتە 1-ءشى ورىندا – بەيجىڭ, 2-ءشى ورىندا – ماسكەۋ, 3-ءشى ورىندا – نيۋ-دەلي, 4-ءشى ورىندا – استانا, 5-ءشى ورىندا باكۋ تۇر. مۇنداي جاعىمدى جاڭالىقتى كەشە اتالعان فورۋم شەڭبەرىندە وتكەن «MICE: بيزنەس-تۋريزم» اتتى دوڭگەلەك ۇستەلدە R&C كورمەلىك عىلىمي-زەرتتەۋ ورتالىعىنىڭ باس ديرەكتورى داريا وستروۆسكايا جاريا ەتتى. ونىڭ ايتۋىنشا, ىسكەرلىك وقيعالار نارىعىندا جاڭادان پايدا بولعان قالا ءۇشىن بۇل وتە ۇلكەن جەتىستىك. «بيىل ەكىنشى رەت جۇرگىزىلگەن بۇل رەيتينگتىڭ مىندەتى – ىسكەرلىك كەزدەسۋلەردى ۇيىمداستىرۋ ءۇشىن قالالار الەۋەتىن انىقتاۋ. ونى بەس ءتۇرلى كريتەريلەر بويىنشا انىقتادىق. اتاپ ايتقاندا, بىرىنشىدەن, ول ينفراقۇرىلىمنىڭ دامۋى, ەكىنشىسى – پرومو-كومپانيالاردىڭ جانە فۋتۋريستىك برەندتىڭ پايدا بولۋى. ۇشىنشىدەن, سوڭعى 3-5 جىلداعى ءىرى حالىقارالىق شارالاردى وتكىزۋ تاجىريبەسى ەسكەرىلەدى. ءتورتىنشى كريتەري – مەملەكەت تاراپىنان جاسالاتىن قولداۋ, بەسىنشىسى – ءوڭىردىڭ رەاكراتسيالىق مۇمكىندىكتەرى» دەپ اڭگىمەلەدى شەتەلدىك ساراپشى.
R&C كورمەلىك عىلىمي-زەرتتەۋ ورتالىعى باسشىسى بۇل باعىتتاعى استانانىڭ تابىستارىنا ەرەكشە توقتالدى. ونىڭ پايىمداۋىنشا, استانا كونۆەنشن-بيۋرونىڭ قۇرىلۋى, 2017 جىلى ەكسپو كورمەسىن وتكىزۋ كەزىندەگى شەتەل تۋريستەرىن تارتۋ شارالارى, ۆيزالىق ءتارتىپتى جەڭىلدەتۋ, جەرگىلىكتى بيلىكتىڭ قولداۋى ەلوردامىزدىڭ ىسكەرلىك الەۋەتىن ارتتىرا ءتۇستى. ىسكەرلىك يندۋستريانى دامىتۋداعى استانانىڭ ديناميكاسى وتە جوعارى. ماسەلەن, 2017 جىلى «Doing Business» رەيتينگىندەگى كورسەتكىشى – 36. حالىقارالىق كونگرەستەر مەن كونفەرەنتسيالار قاۋىمداستىعىنىڭ رەيتينگىندەگى ءىس-شارالار سانى جونىنەن 286-شى (دۇنيە ءجۇزى بويىنشا), 68-ءشى ورىندى (ازيا بويىنشا) يەلەندى. بۇعان قوسا, كورمەلەر نارىعىنداعى جىلدىق ءوسىم 6%-عا ۇلعايعان. مۇنداي تابىسقا قول جەتكىزۋگە ۆيزالىق ءتارتىپتى جەڭىلدەتۋ جانە 2020 جىلعا دەيىنگى ءتۋريزمدى دامىتۋ باعدارلاماسى وڭ ىقپال ەتكەنى رەيتينگتە ايتىلعان.
«الەمدىك دەڭگەيدەگى ىسكەرلىك, تۋريستىك, بيزنەس ءىس-شارالاردى وتكىزۋ – بۇل استانانىڭ باسىمدىق بەرىلگەن باعىتى. مەنىڭشە, باس قالانىڭ قازاقستاننىڭ باستى بيزنەس ورتالىعى رەتىندە وركەندەۋى دە – زاڭدىلىق. استانا حالىقارالىق قارجى ورتالىعى ازيا ءۇشىن عانا ەمەس, الەمدىك قارجىلىق حابقا اينالاتىنىنا سەنىمىم زور. بۇل – وسى قالاعا ءۇشىنشى رەت كەلۋىم. اسىرەسە, قازاقتاردىڭ اسا قوناقجايلىعى, سالەمدەسۋى, ءىلتيپاتى قاتتى ۇنايدى. قازاقتىڭ ۇلتتىق تاعامدارىن دا ءسۇيسىنىپ جەيمىن. قاي جاعىنان الساق تا, بۇل بىرەگەي قالا. 20 جىل بۇرىن ەن دالادا وسىنداي وركەنيەتتى ەلوردا بوي كوتەرەدى دەگەنگە ەشكىم سەنبەگەن. ال بۇگىن استانا ازيانىڭ ءىنجۋ-مارجانىنا اينالدى» دەدى داريا وستروۆسكايا ءبىزدىڭ گازەتكە بەرگەن تۇسىندىرمەسىندە.
«قازاق تۋريزم» اق ۇك توراعاسىنىڭ ورىنباسارى تيمۋر دۇيسەنعاليەۆ ەلىمىزدەگى بيزنەس ءتۋريزمنىڭ كەلەشەگى ەكى ءىرى وڭىردە قارقىندى دامىپ كەلە جاتقانىن ايتادى. «بۇل – الماتى جانە الماتى وبلىسى, استانا جانە بۋراباي شيپاجاي ايماعى. ءىرى ىسكەرلىك شارالاردى وتكىزەتىن ءوڭىر – تۇركىستان. اتالعان وڭىرلەردىڭ كەلەشەگى وتە زور. استانا ءۇشىن بيزنەس تۋريزم – ءنومىر ءبىرىنشى ءتۋريزمنىڭ ءتۇرى. ويتكەنى ەلورداعا بيزنەس وكىلدەرى ءجيى كەلەدى. بۇل تەندەنتسيانى دامىتا بەرۋىمىز كەرەك. ىسكەر جانداردى تابيعاتى عاجايىپ جەرلەرگە اپاراتىن كەرەمەت مۇمكىندىكتەرىمىز بار. جينالىس وتكىزەتىن ۇستەل, ورىندىقتار بارلىق جەردە بار. ال ءبىز شەتەلدىكتەر باسقا ەش جەردە كورمەيتىن نارسەلەرمەن قىزىقتىرۋعا ءتيىسپىز» دەيدى ول.
