بۇگىن ەلوردادا «كوكتەمگى استانا» اتتى جالپى قالالىق سەنبىلىك ءوتىپ جاتىر. بيىل قار ادەتتەگىدەن تىم كوپ تۇسكەندىكتەن, بۇل ءىس-شارا سۋ تاسقىنىنىڭ الدىن الۋ ماقساتىندا ۇيىمداستىرىلۋدا.
سەنبىلىككە شىققان استانالىقتار نەگىزىنەن اۋلالاردىڭ, شاعىن اۋدانداردىڭ جانە تۇرعىن الاپتاردىڭ قارىنىڭ كۇرەلۋىنە كۇش سالىپ جاتىر. سولاردىڭ ىشىندە بەلسەندى جاستار ارداگەرلەردىڭ, جالعىز ىلىكتى تۇرعىنداردىڭ, مۇمكىندىگى شەكتەۋلى ادامداردىڭ ۇيلەرىنە بارىپ, اۋلالارىن قاردان تازارتۋعا قولعابىس ەتۋدە.
– بۇل سەنبىلىك استانا اكىمى اسەت يسەكەشەۆتىڭ باستاماسىمەن قولعا الىنعان «مەيىرىمدى قالا» جوباسىنىڭ ماقساتتى جالعاسى دەۋگە دە بولادى. ويتكەنى قالانىڭ بەلسەندى جاستارى اۋلالارىنىڭ قارىن تازالاۋعا مۇمكىندىگى جوق وسىنداي تۇرعىنداردىڭ ۇيلەرىنە كەلىپ, كومەك قولىن سوزۋدا. ءۇش اۋدان بويىنشا 1000-نان اسا جاس بۇگىن ەكى قولعا ءبىر كۇرەك ۇستادى. جاستاردىڭ ىشىندە ەكسپو كورمەسىنە ءتىل ۇيرەنىپ, تىڭعىلىقتى دايىندالىپ جۇرگەن ەرىكتىلەر دە بار, – دەدى استانا قالاسىنىڭ جاستار ساياساتى ماسەلەلەرى باسقارماسىنىڭ اسحات ورالوۆ.
ونىڭ ايتۋىنشا, «كوكتەمگى استانا» سەنبىلىگىنىڭ اياسىندا بەلسەندى جاستار 100-دەن استام ۇيلەردىڭ اۋلالارىن تازالاماق. ولار مۇنداي شارۋانى ەكى اپتا بۇرىن باستاپ كەتىپتى: بۇرناعى اپتادا 35 ءۇيدىڭ, وتكەن اپتادا 50 شاقتى ءۇيدىڭ قارىن تازالاعان.
الماتى اۋدانىندا سەنبىلىك كەزىندە 43 مەردىگەرلىك ۇيىم, 500-دەن استام تەحنيكا مەن 1000-دەن اسا جول جۇمىسشىلارى تارتىلدى. بۇل اۋداندا الەۋمەتتىك نىسانداردىڭ قارىن كۇرەۋگە 100-دەن اسا ستۋدەنتتەر كومەكتەسۋدە.
ەسىل اۋدانىندا شارۋانىڭ كوبى ۇركەر تۇرعىن الابىندا اتقارىلدى. بۇل ايماقتا 119 تيەگىش, 33 قار جينايتىن تەحنيكا جۇمىس ىستەپ جاتىر. جالپى شەتتە 11 ۋچاسكەنىڭ قارى تازالاندى.
ال سارىارقا اۋدانىندا ورتاق ىسكە 516 ارناۋلى تەحنيكا جۇمىلدىرىلدى. بۇل اۋداندا جۇمىستىڭ كورىگى كوكتال تۇرعىن الاپتارىندا قىزدى. جالپى ءبىر كۇندە ونداعان قارت تۇرعىنداردىڭ ۇيلەرىنىڭ قارى كۇرەلدى.
ورىنبەك وتەمۇرات
