كۇن جىلىنىپ, قار ەرىگەلى بەرى قالاداعى كوممۋنالدىق شارۋاشىلىق ماماندارى كوكتەمگى قاربالاس جۇمىستارعا قىزۋ كىرىسىپ تە كەتتى. بۇگىنگى تاڭدا ەلورداداعى ءۇش اۋداندا دا سۋ تاسقىنىنا قارسى جۇمىستاردىڭ جوسپارى پىسىقتالىپ, سۋ اعاتىن ارىقتار مەن جولدار شۇعىل تۇردە قاردان تازارتىلۋدا.
وسىعان وراي, بيىل ناۋرىز ايىنان باستاپ الماتى اۋدانى بويىنشا سۋ تاسقىنىنا قاتىستى تۇسكەن وتىنىشتەر مەن ارىزداردى قابىلدايتىن ارنايى بىرەگەي انىقتامالىق تەلەفون جەلىسى قىزمەت اتقارۋدا. وعان كۇن سايىن 48-43-37 ءنومىرى ارقىلى حابارلاسقان تۇرعىندار, اسىرەسە, جەكە سەكتورلارداعى قاردى شىعارۋ ءجونىندە ءوتىنىش بىلدىرۋدە.
بيىلعى جىلدىڭ باسىندا «استانا تازالىق» جشس-مەن اۋدان باسشىلارى اراسىندا بەكىتىلگەن كەستەگە سايكەس, ماماندار وسى ماڭداعى كارىزدەر مەن سۋ جۇرەتىن ارنالاردى قاردان جانە مۇزدان تازارتۋدا. بۇل رەتتە استانا قالاسى توتەنشە جاعدايلار دەپارتامەنتىنىڭ قىزمەتكەرلەرى جاقىندا اۋدان تۇرعىندارىنا كوكتەمگى سۋ تاسقىنى مەن ءورت قاۋىپسىزدىگى تاقىرىبىندا جادىنامالار تاراتىپ, توتەنشە جاعداي كەزىندەگى ارەكەتتەر تۋرالى ءتۇسىندىرۋ جۇمىستارىن جۇرگىزدى.
كوكتەمگى سۋ تاسقىنعا قارسى جۇمىستاردىڭ بارلىعىن الماتى اۋدانى اكىمى اپپاراتىنداعى اۋدان اۋماعىنان كوكتەمگى سۋ تاسقىنىن وتكىزىپ جىبەرۋ جونىندەگى ارنايى شتاب باقىلاپ, قاداعالاپ وتىر. استانا قالاسى اكىمىنىڭ تاپسىرماسى بويىنشا سۋ تاسقىنىنىڭ الدىن الۋعا جاۋاپتى باسقارمالارمەن, كوممۋنالدىق قىزمەتتەرمەن, كاسىپورىندار جانە مەردىگەر ۇيىمدارمەن تولىقتىرىلعان وسى شتاب قۇرامىنداعىلاردىڭ باستى ماقساتى – اپاتتى جاعدايلاردىڭ الدىن الۋ.
بۇگىنگە دەيىن اۋدان اۋماعىنداعى 100-دەن اسا الەۋمەتتىك نىساننىڭ, سونىڭ ىشىندە 36 بالاباقشا, 38 مەكتەپ, 27 دەنساۋلىق ساقتاۋ نىسانىنىڭ ماڭايى اۋداننىڭ مەردىگەر ۇيىمدارىنىڭ كومەگىمەن قاردان تازارتىلىپ, وسى ۋاقىتقا دەيىن جالپى كولەمى 13 946 مەتر بولاتىن 32 كوشەدەگى كارىز قۇدىقتارى قاردان جانە قاتقان مۇزدان ارىلدى. جالپى, سۋ تاسقىنىنا قارسى ءىس-شارالارعا اۋدان بويىنشا 3 جەر قازۋ قۇرىلعىسى بار ماشينا جانە 1 بۋلدوزەر, 65 ارنايى دايىندالعان تەحنيكا, 2 سۋسورعىش ماشينا, 14 مامانداندىرىلعان تەحنيكا ساقاداي ساي.
گۇلبارشىن وكەشقىزى
ماتەريالدى «استانا اقشامى» گازەتىنىڭ astana-akshamy.kz رەسمي سايتىنا سىلتەمە جاساعاندا عانا پايدالانۋعا رۇقسات ەتىلەدى.
