نۇر-سۇلتان قالاسى مەملەكەتتىك اكادەميالىق فيلارمونياسى قۇرامىندا 11 ءبولىم جۇمىس ىستەيدى.
– فيلارمونيا بولىمدەرىنىڭ ارقايسىسى ۇلكەن قۇراممەن جاساقتالعان. كەڭەس وداعى كەزىنەن بەرى كەلە جاتقان قازاق وركەسترىندە 120 ادامداي ەڭبەكتەنەدى. مۇنىڭ سىرتىندا سيمفونيالىق وركەستر, ۇرمەلى اسپاپتار وركەسترى, ەكى انسامبل بار. ونىڭ ءبىرى – بيىلعى ناۋرىزدا عانا گيننەس رەكوردتار كىتابىنا ەنگەن ەتنوانسامبل. ەكىنشىسى – «سارىارقا» فولكلورلىق ءانسامبلى. بارلىعى دا – كوپتەگەن حالىقارالىق كونكۋرستاردىڭ, فەستيۆالداردىڭ لاۋرەاتتارى. سونىمەن قاتار ەسترادالىق جانە كلاسسيكالىق ۆوكال بولىمدەرىندە قازاقستاننىڭ ەڭبەگى سىڭگەن قايراتكەرلەرى, الدىڭعى بۋىن اعا-اپكەلەرىمىز قىزمەت ەتەدى. سول سياقتى ءداستۇرلى اندەرىمىز دە شەت قالعان ەمەس. حالىق ءانى بولىمىندە كەزىندە قايرات بايبوسىنوۆ سىندى اعالارىمىز ونەر كورسەتكەن. سولاردىڭ قانشاما شاكىرتتەرى بۇگىندە وسى بولىمدە قىزمەت ەتىپ كەلە جاتىر. عازيزا جۇبانوۆا اتىنداعى شەكتى اسپاپتار كۆارتەتىندە ءتول تۋىندىلارىمىز, سونىڭ ىشىندە كۇيلەرىمىز زاماناۋي تۇرعىدا وڭدەلەدى, – دەيدى فيلارمونيانىڭ قوعاممەن بايلانىس جانە حالىقارالىق قاتىناستار ءبولىمىنىڭ جەتەكشىسى مەيرامعازى ساپارعاليەۆ.
سونىمەن قاتار ول فيلارمونيادا ءداستۇرلى ءان دە, زاماناۋي بي دە شەت قالماعانىن ايتادى.
– «شالقىما» حالىقتىق بي ءانسامبلى – ۇلتتىق بيلەرىمىزدى ناقىشىنا كەلتىرىپ, ۇلتتىق ونەرىمىزدى شەتەلدىك قوناقتارعا تانىستىرىپ جۇرگەن توپتىڭ ءبىرى. جاستاردىڭ دا اۋەنى, ولاردىڭ ءريتمى دە شەتىن قالعان جوق. «الەم بي» ەسترادا ءانسامبلىنىڭ ونەرى زاماناۋي بيگە كوبىرەك باعىتتالعان. فيلارمونيانىڭ وسى 11 بولىمىنە قوسىمشا تەحنيكالىق قولداۋ كورسەتەتىن ماماندار, ساحنانىڭ سىرتىندا كيىم جونىندە ستيليست جانە گريم بولىمدەرىن قوسقاندا فيلارمونيادا 740-قا جۋىق ادام قىزمەت ەتەدى, – دەيدى مەيرامعازى ساپارعاليەۆ.
ەلوردالىق فيلارمونيا بيىل باس-اياعى 678 ءىس-شارا وتكىزدى.
– مەملەكەتتىك اكادەميالىق فيلارمونيا پاندەمياعا دەيىن بىرنەشە ءىس-شارا ۇيىمداستىردى. قاڭتار ايىنىڭ سوڭىنان ناۋرىزدىڭ 8-ىنە دەيىن, ياعني ەلىمىزدە توتەنشە جاعداي رەجيمى جاريالانعانعا دەيىن كورەرمەندەر ونداعان ءىس-شارانى تاماشالادى. كارانتين باستالعان ۋاقىتتان كوپتەگەن كونتسەرت ونلاين فورماتتا ءوتتى. سونىڭ ىشىندە تۋىسقان تۇركى جۇرتىنداعى حالىقارالىق ۇيىمدارمەن بىرلەسىپ وتكىزىلگەن ءىس-شارالار بار. ماسەلەن, سيمفونيالىق وركەستر ءبىراز تۋىندىلاردى ونلاين فورماتىندا كورشىلەس مەملەكەتتەردىڭ ۇيىمدارىمەن بىرگە جازدى. جيىنى 678 نەگىزگى شارا وتكىزىپپىز. سونىڭ 192-ءسى – وفلاين, ياعني كورەرمەنسىز وتكەن, – دەيدى مەيرامعازى ساپارعاليەۆ.
ونىڭ ايتۋىنشا, ونەرپازدار ونلاين فورماتتا شەبەرلىك ساباقتارى مەن شاعىن كونتسەرتتەر ۇسىنعان.
– 1 مامىر, 7 جانە 9 مامىر, استانا كۇنى سىندى ايتۋلى مەرەكەلەر قارساڭىندا جاعدايدى بارىنشا پايدالانا وتىرىپ, ءارتۇرلى بەينەباياندىق تۋىندىلار ۇسىنىلدى. الەۋمەتتىك جەلىلەر ارقىلى تىكەلەي ەفيردە ونلاين كونتسەرتتەر وتكىزىلدى. ونلاين وتكەن بارلىق شارالاردى قوسقاندا 1,5 ميلليون كورەرمەنگە تۋىندىلارىمىزدى ۇسىندىق, – دەيدى مەيرامعازى ساپارعاليەۆ.
