15-17 قازان كۇندەرى ەلوردادا تاۋەلسىزدىكتىڭ 30 جىلدىعى اياسىندا ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ گاسترولدىك ساپارى وتەدى. الماتىداعى ونەر ۇجىمى ق.قۋانىشباەۆ اتىنداعى قازاق مەملەكەتتىك اكادەميالىق مۋزىكالىق-دراما تەاترى ساحناسىندا بىرنەشە سپەكتاكل ۇسىنادى.
تاياۋدا ءوزىنىڭ 75-ماۋسىمىن اشقان بايىرعى تەاتر ەلورداعا ءتورت قويىلىم اكەلە جاتىر. ونىڭ العاشقىسى – ءىلياس جانسۇگىروۆتىڭ شىعارماسى جەلىسىمەن دارىندى رەجيسسەر فارحاد مولداعالي ساحنالاعان «قۇلاگەر» ساۋندراماسى. بۇل قويىلىم جازدا «ەلوردا – ونەر ولكەسى» اتتى قازاقستان, وزبەكستان, قىرعىزستان تەاترلارىنىڭ شىعارماشىلىق كەزدەسۋى اياسىندا باس قالادا كورسەتىلدى. بىراق سول ۋاقىتتا ىندەتتىڭ بەتى قايتپاي تۇرعانىنا بايلانىستى كوپشىلىك سپەكتاكلدى تاماشالاي المادى. ەندى ەلوردالىق تەاترسۇيەر قاۋىمعا ەلدى قىزىقتىراتىن قويىلىمدى كورۋگە تاعى دا مۇمكىندىك بەرىلىپ وتىر.
15 قازان كۇنى قازاقتىڭ كلاسسيك قالامگەرى سايىن مۇراتبەكوۆتىڭ تۋعانىنا 85 جىل تولادى. مۇسىرەپوۆ تەاترىنىڭ رەپەرتۋارىندا كورنەكتى جازۋشىنىڭ شىعارماسى جەلىسىمەن قويىلعان «جۋسان ءيىسى» دراماسى بار. قويۋشى رەجيسسەرى – جۇلدىزبەك جۇمانباي. گاسترول اياسىندا وسى سپەكتاكل دە ۇسىنىلادى.
مۇسىرەپوۆتىكتەر كورنەكتى جازۋشى ءازىلحان نۇرشايىقوۆتىڭ «ماحاببات, قىزىق مول جىلدار» شىعارماسىن دا ساحناعا لايىقتاپ ۇلگەردى. مۇنى فارحاد مولداعالي جۇزەگە اسىردى. باس قالا تۇرعىندارى مەن قوناقتارى وسى قويىلىمدى دا كورە الادى.
بالالار دا بازارلىقسىز قالمايدى. ولارعا «جەتى لاق» ورىس حالىق ەرتەگىسى جەلىسىمەن ساحنالانعان «تۋعان كۇن» سپەكتاكلى ۇسىنىلادى. قويىلىمدى قازاق تىلىنە اۋدارىپ, ينتسەنيروۆكاسىن جاساعان – ۇلان بولاتبەك. ال قويۋشى رەجيسسەرى – شاعۋان ۇمبەتقاليەۆ.
