ايازعا جانە بورانعا قاراماستان, ەلوردانىڭ كوممۋنالدىق قىزمەتتەرى كۇشەيتىلگەن رەجيمدە جۇمىس ىستەپ جاتىر. «يگى ىستەر مارافونى» جوباسى اياسىندا ەلوردالىق ەرىكتىلەر الەۋمەتتىك كاسىپكەر راحيما مۋكۋشەۆامەن بىرلەسىپ تازالىق قىزمەتكەرلەرىن قولداپ, ولارعا جىلى شارفتار تاراتتى, دەپ حابارلايدى astana-akshamy.kz.
اكتسيانىڭ باستى ماقساتى – ايازدى كۇندەرى دە جۇمىس ىستەيتىن تازالىق قىزمەتكەرلەرىنە قولداۋ كورسەتۋ. ءىس-شارا اياسىندا ەرىكتىلەر ەلوردا كوشەلەرىندەگى ءتارتىپ پەن تازالىقتى قاداعالايتىن كوممۋنالدىق قىزمەت ماماندارىنا جىلى سنۋدتار تاراتتى.
«مۇنداي قايىرىمدىلىق اكتسياسى العاش رەت ءوتىپ وتىرعان جوق. وسىعان دەيىن بىزدە «قۇراق-كورپە» ستيلىندەگى ەكو-شىرشا قۇرۋ جوباسى بولعان. وسىلايشا, تۇرعىندار مەن كاسىپكەرلەردى جاقسىلىق جاساۋعا شاقىرامىز», – دەيدى الەۋمەتتىك كاسىپكەر راحيما مۇقىشەۆا.
ءبىر اي ىشىندە 6-70 جاس ارالىعىنداعى قالا تۇرعىندارى توقۋ تاجىريبەسى جوق 100-دەن استام جىلى شارف جاسادى. قايىرىمدىلىق اكتسياسىنا 70-كە جۋىق ەرىكتى قاتىستى.
«بۇگىن بىزگە جىلى شارفتار سىيعا بەرىلدى, اسىرەسە ايازدى كۇندەردە ەرەكشە جىلۋ سىيلايدى. ەرىكتىلەرگە قامقورلىعى مەن باعا جەتپەس كومەگى ءۇشىن العىسىمىز شەكسىز», – دەدى كوممۋنالدىق قىزمەتكەرلەردىڭ ءبىرى قايرات احمەتوۆ.
ەستەرىڭىزگە سالا كەتەيىك, ەلوردادا يگى ىستەر مارافونى جالعاسىپ جاتىر. اكتسيانىڭ باستى ماقساتى – ەرىكتىلەر مەن تۇرعىندارعا حالىقتىڭ الەۋمەتتىك ءالسىز ساناتتارىنا, قارت ادامدارعا, مۇقتاج زەينەتكەرلەرگە بارىنشا كومەك كورسەتۋگە مۇمكىندىك بەرۋ.
