قىتايدىڭ پەكين قالاسىندا شانحاي ىنتىماقتاستىق ۇيىمى مەملەكەتتەرىنىڭ قۇقىق قورعاۋ باسقارمالارى باس قوستى. قازاقستاندىق دەلەگاتسيانى استانا قالاسى ىشكى ىستەر دەپارتامەنتىنىڭ باسشىسى پوليتسيا گەنەرال-مايورى امانتاي اۋباكىروۆ باستاپ باردى.
اتالمىش كونفەرەنتسيانىڭ ماقساتى ايقىن. ەلدەر اراسىنداعى ىنتىماقتاستىقتى نىعايتۋ, قاۋىپسىزدىك پەن تۇراقتىلىقتى قورعاۋ, دوستىق قارىم-قاتىناستى جاقسارتۋدى كوزدەيدى. اشىلۋ سالتاناتىندا ءسوز سويلەگەن قىتايدىڭ مەملەكەتتىك كەڭەس مۇشەسى جانە قوعامدىق قاۋىپسىزدىك ءمينيسترى گو شەنكۋن استانالىق پوليتسەيلەردى تەرروريزممەن, كيبەرقىلمىستارمەن, ەسىرتكى جانە ترانسۇلتتىق ۇيىمداسقان قىلمىستارمەن بىرلەسە كۇرەسۋگە شاقىردى. ءوز كەزەگىندە دەپارتامەنت باسشىسى امانتاي اۋباكىروۆ شانحاي ۇيىمى مەملەكەتتەرىنىڭ
پوليتسياسىمەن اشىق جانە ەلوردالىق تاجىريبەمەن بولىسۋگە دايىن ەكەندىگىن اتاپ ءوتتى.
ودان كەيىن كونفەرەنتسياعا قاتىسۋشىلار پەكيننىڭ جەدەل باسقارۋ ورتالىعىنا بارىپ, ارنايى ءبولىم قىزمەتكەرلەرىنىڭ دەنە دايىندىقتارىن باقىلادى. بەيجىڭدىك پوليتسەيلەر قويان-قولتىق كۇرەسىنىڭ ەلەمەنتتەرىن كورسەتىپ, تۇتقىنعا تۇسكەندەردى ءتۇرلى جاعدايلاردان بوساتىپ الۋ: عيماراتتان, اۆتوكولىكتەن, قىلمىسكەرلەردى قۇرىقتاۋ, ءتۇرلى قارۋلاردان جاسالاتىن سنايپەرلىك داعدىلار, جاپپاي تارتىپسىزدىك كەزىندەگى ءىس-ارەكەتتەر الگوريتمىن كورسەتتى. پوليتسەيلەرگە ارنايى تەحنيكانىڭ كورسەتىلىمى دە ۇسىنىلدى.
ايتا كەتكەن ءجون, وتكەن قازان ايىندا رەسمي ساپار اياسىندا قىتايدىڭ نينسيا-حۋەيلىك اۆتونومدى اۋدانى مەن شانسي پروۆينتسياسىنىڭ قوعامدىق قاۋىپسىزدىك دەپارتامەنتى قىزمەتكەرلەرى استانا قالاسى ىشكى ىستەر دەپارتامەنتىندە بولىپ, ءوزارا تاجىريبە الماسقان ەدى. جەدەل-ىزدەستىرۋ شارالارىن جۇرگىزۋ ماقساتىندا استانا قالاسىنا رەسەيدەن, قىرعىزتان جانە وزبەكستان ەلىنەن دە ارىپتەستەر بىرنەشە مارتە كەلىپ كەتتى.
– كەلەر جىلى استانادا
«ەكسپو-2017» حالىقارالىق كورمەسى وتكىزىلەدى. سوعان وراي كەڭ اۋقىمدى حالىقارالىق ءىس-شارالاردى وتكىزۋ كەزىندە قوعامدىق قاۋىپسىزدىك پەن ءتارتىپتى قورعاۋدى قامتاماسىز ەتۋ بويىنشا مۇنداي تاجىريبە الماسۋ وزەكتى, – دەيدى ا.اۋباكىروۆ.
گۇلميرا ايماعانبەت
