پارلامەنت ءماجىلىسىنىڭ دەپۋتاتتارىن سايلاۋ بارىسىن باقىلاۋعا 817 xالىقارالىق بايقاۋشى كەلدى. ولار وسىناۋ ساياسي ۋاقيعانىڭ جاي-جاپسارىن تاڭدانىسپەن ءارى اسقان ريزاشىلىقپەن اڭگىمەلەدى.
– قۇرمەتتى مەنىڭ باۋىرلارىم! – دەپ باستادى ءوز ءسوزىن رەسەي دۋماسىنىڭ دەپۋتاتى, قوعام جانە مادەنيەت قايراتكەرى يوسيف كوبزون جۋرناليستەرمەن كەزدەسۋىندە. – سىزدەردى شىنىندا دا باۋىرىمداي كورەمىن. قازاقستان – مەن ءۇشىن تۋىسقان ەل. ەڭ العاش بۇل توپىراققا 1956 جىلى سارباز كەزىمدە تابانىم ءتيدى. ءبىز قوستاناي وبلىسىنىڭ جانگەلدين اۋدانىندا ەگىن جيناعانبىز. سول ۋاقىتتان بەرى قازاق دالاسىن جاتسىنعان ەمەسپىن. استانانىڭ 1 جىلدىق تويىنا قاتىسىپ, باس قالا تۋرالى ءانىمدى ارنادىم, – دەدى تانىمال ءانشى اعىنان اقتارىلىپ. بۇدان سوڭ ول قازاقستاندىقتاردىڭ سايلاۋدا دۇرىس تاڭداۋ جاسايتىنىنا سەنىمدى ەكەنىن جەتكىزدى. بارشا ازاماتتى مۇنداي ماڭىزدى شارانىڭ اربىرىنە بەلسەندى اتسالىسۋعا شاقىردى.
ەلوردالىقتاردىڭ سايلاۋعا قۇلشىنا قاتىسقانىن قىرعىز بايقاۋشىلارى ەرەكشە اتاپ ءوتتى. «بۇگىن ءبىز بىرنەشە سايلاۋ ۋچاسكەسىنە بارىپ, وتە جاقسى اسەر الدىق. مەنى تاڭعى ساعات 7-دە سايلاۋ ۋچاسكەلەرى اشىلعان ساتتەن باستاپ داۋىس بەرۋشىلەردىڭ لەگى كوپ بولعاندىعى تاڭعالدىردى. ماسەلەن, نازارباەۆ ۋنيۆەرسيتەتىندەگى سايلاۋ ۋچاسكەسىندە نەبارى 50 مينۋتتىڭ ىشىندە 400 ادام داۋىس بەردى» دەدى قىرعىزستان رەسپۋبليكاسىنىڭ ورتالىق سايلاۋ جانە رەفەرەندۋمدار وتكىزۋ كوميسسياسىنىڭ مۇشەسى راشيد بەكباساروۆ. ونىڭ بۇل پىكىرىن بوسنيا جانە گەرتسوگوۆينا مەملەكەتىنىڭ بايقاۋشىسى زوران تەشانوۆيچ تا قوشتادى. «داۋىس بەرۋگە كەلگەن xالىقتىڭ سانى وتە كوپ. بۇل جاعداي بىزگە تاڭسىق كورىنگەنى راس. ويتكەنى, ەۋروپادا سايلاۋشىلاردىڭ بەلسەندىلىگى تومەندەپ كەلەدى. ال قازاقستاندا تۇسكە دەيىن سايلاۋشىلاردىڭ 50 پايىزى داۋىس بەرىپ ۇلگەرگەن» دەگەن ول سايلاۋدىڭ دەموكراتيالىق سيپاتتا ۇيىمداستىرىلعانىن ايتتى.
ال بولگاريانىڭ وڭىرلىك دامۋ ەكس-ءمينيسترى دەسيسلاۆا تەرزيەۆا مەن يتاليا سەناتورى فرانكو پانيتستسا مۇمكىندىگى شەكتەۋلى جانداردىڭ داۋىس
بەرۋدەن تىسقارى قالماي, كەرىسىنشە, ۋچاسكەگە كەلىپ, ءوز تاڭداۋلارىن جاساعانىنا ريزا بولىپتى. سايلاۋدا ەشقانداي زاڭ بۇزۋشىلىقتاردىڭ انىقتالماعانىن اعىلشىن بايقاۋشىسى الان سپەنس مالىمدەدى. «قازاقستان رەسپۋبليكاسىنىڭ كونستيتۋتسياسىنا قايشى كەلەتىن زاڭسىز ارەكەتتەردى كوزىمىز شالمادى. بارلىعى «سايلاۋ تۋرالى» زاڭعا ساي ورىندالدى» دەدى ۇلىبريتانيالىق قوناق.
بوتاگوز ماراتقىزى
