ەلوردالىق ءورت سوندىرۋشىلەر قوستاناي وبلىسىنا كومەككە اتتاندى. قوستاناي وبلىسىندا ورمان ورتىنە قارسى كۇرەس ءجۇرىپ جاتقانىنا ءتورت تاۋلىك بولدى. ەلوردالىق تجد-ءنىڭ 98 ەرجۇرەك قۇتقارۋشىسى, 18 ءورت ءسوندىرۋ تەحنيكاسى ءورت ءسوندىرۋ قىزمەتى باستىعىنىڭ ورىنباسارى پولكوۆنيك ر.ەكيشەۆتىڭ باسشىلىعىمەن قوستاناي وبلىسىنىڭ اۋليەكول اۋدانىنا ورتكە قارسى كۇرەستە ارىپتەستەرىنە كومەك كورسەتۋ ءۇشىن جولعا شىقتى, – دەلىنگەن تجد حابارلاماسىندا. تجم حابارلاۋىنشا, اۋليەكولدەگى ءورت اۋماعى 9 مىڭ گەكتاردان استى, ورماننىڭ جالپى اۋماعى 40 مىڭ گەكتار.
وبلىسقا وزگە ايماقتاردان كومەك كورسەتىلىپ جاتىر. نۇر-سۇلتان قالاسى, اقمولا مەن سولتۇستىك قازاقستان وبلىستارىنان ءورت ءسوندىرۋ قۇرالدارى مەن قوسىمشا كۇشتەر جىبەرىلدى.
قوستاناي وبلىسى اۋليەكول اۋدانىنداعى ورىن العان تابيعي ءورت اپاتىنا بايلانىستى قازاقستان حالقى اسسامبلەياسى ءورت سالدارىنان زارداپ شەككەن حالىققا كومەك كورسەتۋ اكتسياسىن باستادى.
4 قىركۇيەك كۇنى نۇر-سۇلتان, الماتى, شىمكەنت قالالارىنىڭ جانە بارلىق وبلىستاردىڭ دوستىق ۇيلەرىندەگى ۆولونتەرلىك ورتالىقتاردىڭ بازاسىندا قاراجات پەن قاجەتتى زاتتاردى جيناۋ ءۇشىن جەدەل شتابتار قۇرىلدى.
كەلىپ تۇسكەن اقپارات بويىنشا ەۆاكۋاتسيالانعان ازاماتتار ازىق-تۇلىكپەن, ءدارى-دارمەكپەن جانە توسەك-ورىنمەن قامتاماسىز ەتىلگەن.
زارداپ شەككەن ازاماتتارعا ۇيلەرىن, قوجالىقتارىن, كيىمدەرى مەن تۇرمىسقا كەرەك زاتتارىن قالپىنا كەلتىرۋ قاجەت.
Amanat پارتياسى قوستاناي وبلىسىنىڭ زارداپ شەككەن جانە ەۆاكۋاتسيالانعان تۇرعىندارى ءۇشىن 312 توننا گۋمانيتارلىق كومەك جينادى. نۇر-سۇلتان قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسى كاسىپكەرلەردىڭ كومەگىمەن تاعى دا 4,5 توننا ءبىرىنشى قاجەتتىلىكتەگى زاتتاردى جينادى.
قوستاناي وبلىسى بويىنشا جەرگىلىكتى اۋقىمداعى توتەنشە جاعداي جاريالاندى. وبلىس اكىمدىگىنىڭ رەزەرۆىنەن زارداپ شەككەندەرگە كومەك كورسەتىلدى. بۇل – ەڭ الدىمەن, جاتىن ورىن جانە تاماقتانۋ. 1 800 ادام ەۆاكۋاتسيالاندى. مەكتەپتەرگە 200-گە جۋىق ادام ورنالاستىرىلدى. كوبىسى قاۋىپسىزدىگىن تەكسەرىپ ءوز ۇيلەرىنە ورالدى, قالعاندارى تۋىستارىن پانالادى, – دەپ ءمالىم ەتتى قوستاناي وبلىسى اكىمدىگىنىڭ ءباسپاسوز قىزمەتى.
وقيعا بويىنشا ارنايى كوميسسيا قۇرىلدى. كوميسسيا شەشىمىنە سايكەس تابيعي اپاتتان زارداپ شەككەندەردىڭ ء(ۇي-جايى ورتەنگەن تۇرعىندارعا) بارلىعىنا قاجەتتى كومەك كورسەتىلەدى. قوستاناي وبلىسىنىڭ اكىمى ارحيمەد مۇحامبەتوۆ پەن توتەنشە جاعدايلار ءمينيسترى يۋري يلين ەۆاكۋاتسيالانعان تۇرعىندارمەن كەزدەستى. حالىقتىڭ قاۋىپسىزدىگىن قامتاماسىز ەتۋ ماقساتىندا وزەرنوە اۋىلىنان (250 ادام) جانە امانقاراعاي اۋىلىنان سولتۇستىك بولىگىنەن (1000 ادام), كالينينو اۋىلىنان (228 ادام), لەسنوە اۋىلىنان (363 ادام) جالپى بارلىعى 1841 ادام ەۆاكۋاتسيالاندى. جەرگىلىكتى اتقارۋشى ورگاندار ەۆاكۋاتسيالانعان ادامداردى اۋليەكول ورتا مەكتەبى مەن اۋليەكول مەكتەپ-ينتەرناتىنا ورنالاستىرۋدى ۇيىمداستىردى.
گۇلشات ساپارقىزى
