ەلوردانىڭ ازىق-تۇلىك بەلدەۋى
قازاقستان پرەزيدەنتىنىڭ كوكشەتاۋ قالاسىنا جۇمىس ساپارى اقمولا وبلىسىن دامىتۋ جونىندە كەڭەس وتكىزۋمەن باستالدى.
قاسىم-جومارت توقاەۆ ۇكىمەت مۇشەلەرى مەن وبلىس اكتيۆىنىڭ الدىندا سويلەگەن سوزىندە قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىشۇلى نازارباەۆتىڭ تاريحي ەڭبەگىن اتاپ ءوتىپ, كورەگەن كوشباسشىلىعىنىڭ ارقاسىندا ەلىمىز الەۋمەتتىك-ەكونوميكالىق دامۋدا, سونداي-اق حالىقارالىق ارەناداعى ءوز ورنىن نىعايتۋدا ەلەۋلى تابىستارعا قول جەتكىزگەنىن اتاپ ءوتتى.
– ۇكىمەتتىڭ, پارلامەنت دەپۋتاتتارىنىڭ, وبلىس اكىمدەرىنىڭ مىندەتى – ەلباسىنىڭ ۇزاق مەرزىمدى ستراتەگياسىن, ۇلت جوسپارىن جانە بەس ينستيتۋتسيونالدىق رەفورمانى ىسكە اسىرۋعا بارلىق كۇش-جىگەرىن جۇمساۋ, – دەدى مەملەكەت باسشىسى.
پرەزيدەنت جاڭا مەملەكەتتىك يندۋستريالىق-يننوۆاتسيالىق باعدارلامانى ساپالى جۇزەگە اسىرۋدىڭ ماڭىزدىلىعىنا نازار اۋدارىپ, الدىڭعى باعدارلامالاردا كەتكەن كەمشىلىكتەردى ەسكەرۋ كەرەكتىگىن تاپسىردى. قاسىم-جومارت توقاەۆ جوسپارلاردى ىسكە اسىرۋ ءۇشىن جالاڭ ەسەپ ەمەس, سالماقتى تالداۋ, ءتيىمدى ءىس-ارەكەتتەر قاجەت دەپ سانايدى.
– مەملەكەت باسشىسى رەتىندە, حالىقتىڭ ماڭىزدى تالاپ-تىلەكتەرىن قاناعاتتاندىرۋعا ارنالعان ءتيىمدى جۇمىس كۇتەمىن, – دەدى قاسىم-جومارت توقاەۆ.
قازاقستان پرەزيدەنتى اقمولا وبلىسىنىڭ دامۋى تۋرالى ايتا كەلىپ, ءوڭىردىڭ اۋىل شارۋاشىلىعى, يندۋستريالىق-يننوۆاتسيالىق ساياسات, ماشينا جاساۋ, ءتۇرلى-ءتۇستى مەتاللۋرگيا, قۇرىلىس جانە قۇس شارۋاشىلىعى سالالارىندا وڭ وزگەرىستەر بار ەكەنىنە توقتالدى.
پرەزيدەنت ەڭبەك ونىمدىلىگىن ارتتىرۋ, ونىڭ ىشىندە, اۋىل شارۋاشىلىعى – ءوڭىر ەكونوميكاسىن وركەندەتۋدىڭ باستى فاكتورى ەكەنىنە توقتالدى.
قاسىم-جومارت توقاەۆ اۋىل شارۋاشىلىعى مينيسترلىگىنە اگرارلىق ءوڭىرلەردىڭ اكىمدىكتەرىمەن بىرلەسىپ, اگروونەركاسىپ كەشەنىندەگى ەڭبەك ونىمدىلىگىن ۇلعايتۋ ءۇشىن جەتەكشى وتاندىق ازىرلەمەلەر ەنگىزە وتىرىپ, ناقتى شارالار قابىلداۋدى تاپسىردى.
مەملەكەت باسشىسى ەگىستىك القاپتارىن يگەرۋمەن اينالىسپايتىن لاتيفۋنديستەردەن جەردى قايتارىپ الۋ جونىندەگى تاپسىرماسىنا توقتالدى.
– مەنىڭ تاپسىرمام وتە باياۋ ورىندالىپ جاتىر. بۇدان تاپسىرمانىڭ ورىندالۋىن ادەيى سوزىپ وتىر دەگەن وي تۋادى. مۇنداي جاعدايدا قولداناتىن شارالار سيممەتريالى بولادى. ىقىلاسسىز ورىنداۋشىلارعا وڭاي تيمەيدى, – دەپ ەسكەرتتى قاسىم-جومارت توقاەۆ.
كەڭەس بارىسىندا مەملەكەت باسشىسى تۋريزم سالاسىنداعى شاعىن جانە ورتا بيزنەستى دامىتۋ ماسەلەسىنە توقتالدى. ول بيزنەس جۇرگىزۋگە جاسالاتىن جەڭىلدىك بويىنشا وبلىستىڭ ارتتا قالعانىنا, جۇمىسپەن قامتىلعاندار مەن شاعىن جانە ورتا بيزنەس كاسىپورىندارىنىڭ ءونىم ءوندىرىسى تومەن ەكەنىنە نازار اۋداردى.
قاسىم-جومارت توقاەۆ «قاراپايىم زاتتار ەكونوميكاسى» جوبالارىنا كاسىپكەرلەردى بەلسەندى تۇردە جۇمىلدىرۋ كەرەك دەپ ەسەپتەيدى.
– مىسالى, بۇل باعىتتا ونەركاسىپ, اۋىل شارۋاشىلىعى, قىزمەت كورسەتۋ سالالارىنىڭ مۇمكىندىكتەرى مول. شاعىن جانە ورتا بيزنەستىڭ الەۋەتىن ەلوردانىڭ ازىق-تۇلىك بەلدەۋىن قامتاماسىز ەتۋ ءۇشىن پايدالانعان ءجون, – دەدى مەملەكەت باسشىسى.
ءوڭىردىڭ تابيعي دەمالىس ورىندارى مەن مادەني مۇرا نىساندارى جايىندا ايتقان پرەزيدەنت تۋريستىك الەۋەتتىڭ ءالى دە تولىق پايدالانىلماي جاتقانىنا توقتالدى. قاسىم-جومارت توقاەۆ تۋريزم سالاسى ايماقتىڭ جالپى ءونىمىنىڭ 0,5 پايىزىن عانا قۇراپ وتىرعانىن باسا ايتىپ, ءتۋريزمدى دامىتۋعا ارنالعان مەملەكەتتىك باعدارلاما بويىنشا 2025 جىلى ەلىمىزدە اتالعان كورسەتكىشتى 8 پايىزعا جەتكىزۋ تاپسىرىلعانىن اتاپ ءوتتى.
– ۇكىمەتكە وبلىس اكىمدىگىمەن بىرلەسىپ, 2020-2021 جىلدارى ارشالى جانە تسەلينوگراد اۋداندارىندا گاز تاراتۋ جەلىسىن سالۋدى تاپسىرامىن, – دەدى پرەزيدەنت.
قاسىم-جومارت توقاەۆ ينفراقۇرىلىمدى دامىتۋ جونىندەگى مىندەتتەرگە توقتالىپ, ۇكىمەتكە حالىقارالىق قارجى ينستيتۋتتارىنان نەسيە تارتا وتىرىپ, اقمولا وبلىسىندا جەو سالۋ مۇمكىندىگىن قاراستىرۋدى تاپسىردى.
مەملەكەت باسشىسى وبلىستىڭ اگلومەراتسيالىق ايماعىنىڭ ينفراقۇرىلىمىنا قاتىستى ماسەلەلەردى تەزدەتىپ شەشۋ جايىندا ايتىپ, قوسشى اۋىلىن مىسالعا كەلتىردى.
– قوسشى اۋىلىنداعى حالىقتىڭ سانىنا قاتىستى ءۇش ءتۇرلى دەرەك بار: ناقتى ەسەپ بويىنشا 52,5 مىڭ حالىق تۇرادى; ءۇي شارۋاشىلىعىنىڭ تىركەۋ داپتەرىندەگى تۇرعىندار سانى – 34 مىڭ; كوشى-قون قىزمەتى رەسمي تۇردە 16,5 مىڭ ادامدى تىركەگەن. بۇل – قاي تۇرعىدان الساڭىز دا, قاۋىپتى جاعداي. جاقىندا حالىق ساناعى بولادى. تۇرعىنداردىڭ سانى مەن ولاردىڭ ءومىر ساپاسى جايىندا ناقتى ءبىلۋىمىز كەرەك, – دەدى قاسىم-جومارت توقاەۆ.
پرەزيدەنت ايماقتى دامىتۋدا كەشەندى باسقارۋ تاسىلىنە كوشۋ قاجەتتىگىن اتاپ ءوتىپ, حالقىمىزدىڭ تۇرمىس ساپاسىن ارتتىرۋ باستى ماقسات ەكەنىن جەتكىزدى.
– ول ءۇشىن نۇر-سۇلتان قالاسى مەن اقمولا وبلىسى اكىمدىكتەرىنىڭ اراسىنداعى جۇمىستاردىڭ ءوزارا ۇيلەسىمدىلىگىن جانداندىرۋ كەرەك, – دەدى مەملەكەت باسشىسى.