استاناداعى ەسىل وزەنىنىڭ بەتىنە جاڭا جىل قارساڭىندا ماڭايعا جارىق شاشاتىن ۇلكەن ساعات ورناتىلدى. جارىق ديودتار تۇندە ادەمى كومپوزيتسيانى قۇرايتىن ساعات تسيفەربلاتىنىڭ ديامەترى – 17 مەتر. ونىڭ وزەندە ورنالاسۋى كونسترۋكتسيانى ەرەكشەلەندىرىپ تۇر.
ساعاتتىڭ اينالاسىندا قىستا دەمالۋعا جايلى ورىن جاسالعان. مۇندا ەلوردا تۇرعىندارى مەن قوناقتارىنا ارنالىپ سىرعاناقتار مەن 8000 شارشى مەتردى الىپ وتىرعان ۇلكەن مۇز ايدىنى سالىندى. ساعات ناقتى مەحانيزممەن جابدىقتالعان جانە جاڭا جىل ءتۇنى ول سول ماڭايدا وتەتىن وتشاشۋدان بەلگى بەرەتىن بولادى.
ەسىل وزەنىندە ورناتىلعان بۇل ساعات الەمدەگى اشىق اسپان استىنداعى ەڭ ۇلكەن ساعات بولىپ سانالىپ, گيننەستىڭ رەكوردتار كىتابىنا ەنۋى مۇمكىن. مانحەتتەندەگى (نيۋ-دجەرسي شتاتى) گۋدزون وزەنىندە ورناتىلعان بارشاعا تانىمال Colgate ساعاتىنىڭ ديامەترى – 15,24 مەتر. ازىرگە اقش-تاعى بۇل كونسترۋكتسيا ەڭ الىپ ساعات بولىپ سانالادى.
2017 جىلدىڭ قارساڭىنداعى استانا ەرتەگىلەردەگى ادەمى كەيىپكە ەنىپ وتىر. ەسىلدىڭ بەتىنە ورناتىلعان ۇلكەن ساعات ەلوردانىڭ اجارىن ءتىپتى اشا ءتۇستى. وزەن بويىندا سەرۋەندەگەندى جاقسى كورەتىن حالىق تا ساعاتتىڭ جارىعى ماڭايدى قاراڭعى تۇسكەندە دە كۇندىزگىدەي ەتىپ وتىرعانىن ايتۋدا. جالپى, باس قالانىڭ جاڭا جىل الدىندا قۇلپىرىپ شىعا كەلۋىنە قالالىق مادەنيەت, مۇراعاتتار جانە قۇجاتتاما باسقارماسى ۇلكەن ەڭبەك ءسىڭىردى. قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ استانا قالاسى بويىنشا دەپارتامەنتى تاراپىنان دا بۇل باسقارمانىڭ ەڭبەگى ەلەنىپ, «استانا قالاسى بويىنشا كادر قىزمەتىنىڭ جۇمىسىن ۇزدىك ۇيىمداستىراتىن مەملەكەتتىك مەكەمەسى» اتالىمىندا جەڭىمپاز اتاندى.
