تاۋەلسىزدىگىمىزدىڭ ءتول قۇرداسى – استاناداعى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ اشىلۋى تۇڭعىش بالامنىڭ دۇنيەگە كەلۋىمەن سايكەس كەلدى. سوندىقتان بۇل ونەر وشاعىن وتباسىمىز ەرەكشە قادىر تۇتادى.
اياعىم اۋىر كەزىندە ىشتەگى بالاعا قاتەر تونگەندىكتەن اۋرۋحانادا ۇزاق جاتىپ, دارىگەرلەر بەلگىلەگەن قاتاڭ رەجيمدى ساقتاۋىما تۋرا كەلدى. 1991 جىلدىڭ 15 قاراشاسىندا تەاتر كلاسسيك قالامگەرىمىز عابيت مۇسىرەپوۆتىڭ «اقان سەرى-اقتوقتى» سپەكتاكلىمەن اشىلدى. دارىگەرلەردەن قاشىپ شىعىپ, جۇبايىم جومارت جانە بارشا تۋعاندارىممەن قويىلىمدى تاماشالاپ, تاريحي ءساتتىڭ كۋاگەرى بولدىق.
ەرتەڭىندە دارىگەرلەردەن قاتاڭ ەسكەرتۋ ەستىدىم. ولار ەندىگى جەردە 5 مينۋتقا دا سىرتقا شىعارمايتىنداي ەتتى. ەكى اپتادان سوڭ وبلىستىق ەمحاناعا اۋىستىردى. بوساناتىن مەرزىمىم 16 جەلتوقسان ەدى. الايدا قازاقستان پرەزيدەنتىنىڭ تۇڭعىش سايلاۋى كۇنى وتكەن 1 جەلتوقساندا قىز بالانى تۋدىم.
الپىس جىل ەڭبەكتەن قول ۇزبەي, 45 جىل بريگادير بولعان العاشقى تىڭگەرلەردىڭ ءبىرى, اناممەن 60 جىل وتاسىپ, گاۋھار توي وتكىزگەن اكەم ورىنبەك پەن باتىر انا, اتاقتى قاجىمۇقان بالۋاننىڭ جيەنى شەشەم سارقىت «كوك اسپاننان ەلىمىزگە مارجاندارعا تولى نۇر جاۋىپ, نۇرسۇلتاننىڭ نۇرلى زامانى كەلسىن» دەگەن ىرىممەن سول تۇلا بويى تۇڭعىشىما مارجاننۇر اتىن قويدى.
مارجاننۇر الەم ءارتىسى, قازاقستاننىڭ ەڭبەك ەرى ايمان مۇساقوجاەۆا قۇرعان قازاق ۇلتتىق ونەر ۋنيۆەرسيتەتىندە 6,5 جاسىنان مۋزىكالىق ءبىلىم الا باستادى. ونەر ۋنيۆەرسيتەتىنىڭ بارلىق ساتىسىنان ءوتىپ, ونەرتانۋ ماگيسترى اتانعان مارجاننۇر ستۋدەنت كەزىنەن قاللەكي تەاترىنىڭ كامەرالىق وركەسترىندە قىزمەت ەتۋدە. وسى تەاتر ارتىستەرىمەن بىرگە استانا قالاسىنىڭ ماسكەۋدەگى كۇندەرىنە استانالىق «ايگولەك» جاس سكريپكاشىلار ءانسامبلى قۇرامىندا بارعان بولاتىن. بۇل ساپار تۋرالى قازاقستاننىڭ حالىق ءارتىسى گۇلجان اسپەتوۆا: «بالالار جاستىقتارىنا قاراماي وزدەرىن سەنىمدى, ەركىن ۇستاپ, كۇردەلى شىعارمالاردىڭ ءوزىن كەرەمەت ورىندادى. جاس استانانىڭ اسقارالى بولاشاعىن كورسەتىپ, ماسكەۋلىكتەردى تاڭداندىردى» دەگەن ەدى.
ال مارجاننۇر ءوزى جۇمىس ىستەيتىن تەاتردىڭ تالانتتى ارتىستەرىن تانىستىرىپ, ونەر وشاعىنىڭ ءار جاڭا قويىلىمىنا ۇيدەگى بىزدەردى, قۇربى دوستارى مەن ولاردىڭ اتا-انالارىن ۇنەمى شاقىرىپ جۇرەدى.
«بالانىڭ تاربيەسىن قۇرساقتا جاتقانىنان باستاۋ كەرەك» دەگەن ءسوز بار. سول سياقتى قىزىم دۇنيەگە كەلمەي جاتىپ مەن وعان ۇلتتىق تاربيە بەرۋگە تىرىستىم. اپالى-ءسىڭلى مۇساقوجاەۆالاردىڭ شاكىرتى مارجاننۇرىم قازىر كلاسسيكالىق سكريپكادا ويناۋمەن قاتار بەينەلەۋ ونەرىمەن اينالىسادى. جاقسىلىق اتاۋلىنى كورۋگە قۇشتار قىزىم تانىمىن ودان ءارى ارتتىرۋدا. ءوزى دۇنيەگە كەلگەن استانانىڭ دامۋىنا شاما-شارقىنشا ۇلەسىن قوسۋدا. تۇڭعىشىما قاراپ وتىرىپ, ەلوردانىڭ ەرتەڭى, ارايلى استانانىڭ بولاشاعى جارقىن ەكەنىنە سەنەمىن.
مايرا ماكىباەۆا,
ولكەتانۋشى, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ عىلىمي كىتاپحانا قىزمەتكەرى
