جىل سايىن قىركۇيەكتىڭ ورتاسىنان باستالىپ, ەكى ايعا سوزىلاتىن ەمحانالارعا تىركەلۋ ناۋقانى باستالدى.
بۇل شارا ەلىمىزدىڭ تۇرعىلىقتى ازاماتتارى مەن شەتەلدىكتەردى, سونىمەن بىرگە ازاماتتىعى جوق تۇلعالاردىڭ دا قالاعان ەمحانانى تاڭداپ, تىركەلۋگە مۇمكىندىك بەرەدى. الدىڭعى جىلعى تىركەۋ ناۋقانىنىڭ قورىتىندىسى بويىنشا 1 ميلليونداي ادام ەمحاناعا تىركەلىپتى. استانا قالاسى بويىنشا باستاپقى مەديتسينالىق-سانيتارلىق كومەك كورسەتەتىن 44 دەنساۋلىق ساقتاۋ ۇيىمى تۇرعىنداردى تىركەۋگە دايىن. مەديتسينالىق قىزمەتتى جەتكىزۋشىلەردىڭ 16-سىنىڭ مەملەكەتتىك-جەكەمەنشىك فورماسى بار, 15-ءى – مەملەكەتتىك جانە جەكەمەنشىك ارىپتەستىك مەكەمە. قالا مەديتسينالىق قىزمەت كورسەتۋ بويىنشا 556 ۋچاسكەلەرگە بولىنگەن.
ەمحانالارعا تىركەلۋ ءۇشىن ازاماتتار تاڭداپ العان مەديتسينا ۇيىمىنا تىكەلەي بارىپ, ەلەكتروندى ۇكىمەت پورتالى ارقىلى ونلاين رەجيمدە جانە حالىققا قىزمەت كورسەتۋ ورتالىقتارى ارقىلى تىركەلە الادى. ەمحانا ارقىلى تىركەلۋ ءۇشىن جەكە كۋالىگىڭىزدى الىپ, باس دارىگەردىڭ اتىنا ءوتىنىش جازاسىز. ونلاين رەجيمدە تىركەلۋ ءۇشىن جۇيەگە كىرىپ, ەلەكتروندى ءوتىنىمدى تولتىراسىز. ال حقكو ارقىلى تىركەلۋ ءۇشىن Connection Points ءبولىمىنىڭ قىزمەتىن قولدانا الاسىز. ەمحاناعا تىركەلەر الدىندا وتباسىلىق قىزمەت كورسەتۋ جانە مەديتسينالىق-سانيتارلىق كومەكتىڭ قولجەتىمدىلىگىن ەسكەرىپ, ۇيىڭىزگە جاقىن ەمحانانى تاڭداعان ءجون. بۇل دارىگەردىڭ جەدەل كومەك كورسەتۋىنە مۇمكىندىك بەرەدى.
