قر پرەمەر-ءمينيسترى اسقار ماميننىڭ توراعالىعىمەن وتكەن ۇكىمەت وتىرىسىندا ەلدەگى سانيتارلىق-ەپيدەميولوگيالىق جاعداي قارالدى.
دەنساۋلىق ساقتاۋ ءمينيسترى الەكسەي تسوي قازاقستانداعى سانيتارلىق-ەپيدەميولوگيالىق احۋال جالپى تۇراقتانىپ كەلە جاتقانىن ايتتى. ۆيرۋستىڭ رەپرودۋكتيۆتىك يندەكسى 0,97 قۇرايدى, ينفەكتسيالىق توسەك ورىندار 53 پايىزعا, رەانيماتسيالىق توسەكتەر 47 پايىزعا تولى.
بۇگىنگى تاڭدا 6,1 ملن-نان استام ادام ۆاكتسينانىڭ ءبىرىنشى كومپونەنتىن, 4,8 ملن-نان استام ادام ەكىنشى كومپونەنتىن الدى. ۆاكتسينالاۋدىڭ جاقسى قارقىنىنا الماتى, شىمكەنت قالالارىندا جانە تۇركىستان وبلىسىندا قول جەتكىزىلدى.
ۇكىمەت باسشىسى ماڭعىستاۋ, اتىراۋ, قوستاناي جانە باتىس قازاقستان وبلىستارىندا ۆاكتسينالاۋ قارقىنىن ەداۋىر كۇشەيتۋدى تاپسىردى. پرەمەر-مينيستر جاڭا وقۋ جىلىنا دايىندىق اياسىندا 25 تامىزعا دەيىن مۇعالىمدەردى ۆاكتسينالاۋدى اياقتاپ, وقۋ ورىندارىنىڭ دايىندىعىنا باقىلاۋدى كۇشەيتۋ قاجەت ەكەنىن اتاپ ءوتتى.
ا.مامين حالىقتىڭ شەكتەۋ شارالارىن ساقتاۋىن ودان ءارى باقىلاۋدى جانە مونيتورينگتىك توپتار قىزمەتىنىڭ تيىمدىلىگىن ارتتىرۋدى, ۆاكتسينالاۋ قاجەتتىلىگى تۋرالى اقپاراتتىق جۇمىستى كەڭەيتۋدى تاپسىردى.
«قىزىل ايماقتارداعى» وڭىرلەردە دەمالىس كۇنگى لوكداۋنداردى ساقتاۋ قاجەت. حالىقتىڭ شەكتەۋ تالاپتارىنىڭ ورىندالۋىن باقىلاۋدى جالعاستىرۋ كەرەك. بۇل ءۇشىن وڭىرلەردە مونيتورينگ توپتارىنىڭ سانى كوبەيتىلدى, ولاردىڭ قىزمەتىنىڭ تيىمدىلىگىن كۇشەيتۋ قاجەت. بارلىق وڭىرلەر مەن مەملەكەتتىك ورگاندار ۆاكتسينا سالدىرۋدىڭ قاجەتتىگى تۋرالى اقپاراتتىق جۇمىستى كەڭەيتىلسىن» دەدى اسقار مامين.
دەنساۋلىق ساقتاۋ ءمينيسترى الەكسەي تسوي ۇكىمەت باسشىسىنا كارانتيندىك ءىس-شارالاردىڭ تالاپتارى بۇزىلاتىن جاعدايلاردى ءمالىم ەتتى.
«كارانتيندىك ءىس-شارالاردىڭ قولدانىستا بولۋىنا قاراماستان بىرقاتار وڭىردە كوپ ادامنىڭ جينالۋىمەن سالتاناتتى ءىس-شارالار, ۇيلەنۋ تويلارىن, ەسكە الۋ تۇسكى اسىن بەرۋ تىيىلماي وتىر. كارانتيندى ورەسكەل بۇزۋ فاكتىلەرى دە انىقتالىپ جاتىر. وسىعان وراي جەرگىلىكتى اتقارۋشى ورگاندارعا مونيتورينگ توپتارىنىڭ جۇمىسىن كۇشەيتۋدى تاپسىرۋىڭىزدى وتىنەمىن» دەدى مينيستر.
«قىزىل ايماقتا» ورنالاسقان وڭىرلەردە دەمالىس كۇندەرىنە ەنگىزىلگەن لوكداۋن ساقتالادى. Ashyq جوباسىنا قاتىسۋشىلار سانىن ارتتىرۋ جۇمىسى جالعاسادى. بۇگىنگى تاڭدا قوسىمشاعا 4 ملن-نان استام پايدالانۋشى تىركەلگەن, جوباعا 111 مىڭ بيزنەس سۋبەكتىسى قاتىسادى.
سونىمەن قاتار ۇكىمەت وتىرىسىندا جەم-شوپپەن قامتاماسىز ەتۋ جانە ەگىن جيناۋ ناۋقانىنا دايىندىق ماسەلەلەرى دە قارالدى.
مال ازىعىن دايىنداۋداعى قازىرگى جاعداي مەن قابىلدانىپ جاتقان شارالار تۋرالى اۋىل شارۋاشىلىعى ءمينيسترىنىڭ مىندەتىن اتقارۋشى ەربول قاراشوكەەۆ مالىمەت بەردى.
بيىلعى جاز ەرەكشە قۇرعاق بولدى, سونىڭ سالدارىنان ەلىمىزدىڭ باتىسى مەن وڭتۇستىگىندە بىرقاتار ءوڭىر زارداپ شەكتى. قۇرعاقشىلىقتان زارداپ شەككەن وڭىرلەردى جەم-شوپپەن قامتاماسىز ەتۋ ماسەلەلەرى جونىندەگى شەشىمدەردى جەرگىلىكتى جانە ورتالىق اتقارۋشى ورگانداردىڭ قىزمەتىن ۇيلەستىرۋ جونىندەگى رەسپۋبليكالىق جەدەل شتاب قابىلداپ جاتىر. بيىلعى 16 تامىزداعى جاعداي بويىنشا قازاقستاندا 20,7 ملن توننا ءىرى ازىق دايىندالدى, بۇل جوسپارلانعان جىلدىق كولەمنىڭ 81,7 پايىزىن قۇرايدى. ماڭعىستاۋ جانە قىزىلوردا وبلىستارىنا جەم-ءشوپ ساتىپ الۋعا ۇكىمەت رەزەرۆىنەن 3,6 ملرد تەڭگە ءبولىندى, جەم-ءشوپ دايىنداۋعا قوسىمشا 43,1 مىڭ توننا ارزانداتىلعان ديزەل وتىنى ءبولىندى. سولتۇستىك وڭىرلەردەن جەم-ءشوپ جەتكىزىلدى. باتىس وڭىرلەردى جەم-شوپپەن قامتاماسىز ەتۋ ماسەلەسىنە ۆولونتەرلەر دە كىرىستى. وسى جىلعى 23 تامىزدان باستاپ ءىرى ازىقتى رەسپۋبليكادان شىعارۋعا ۋاقىتشا تىيىم سالۋدى ەنگىزۋ تۋرالى شەشىم كۇشىنە ەنەدى, بيىلعى 1 قىركۇيەكتەن باستاپ مال جەمىن ەكسپورتتاۋعا كۆوتالاۋ ەنگىزىلەدى. «قابىلدانعان شارالاردىڭ ارقاسىندا جەم-شوپپەن قامتاماسىز ەتۋ ماسەلەسى جالپى تۇراقتاندى» دەپ ا.مامين, اۋىل شارۋاشىلىعى مينيسترلىگى مەن اكىمدىكتەرگە وسى باعىتتاعى جۇمىستى جالعاستىرىپ, جاعدايدى ەرەكشە باقىلاۋدا ۇستاۋدى تاپسىردى. ۇكىمەت باسشىسى ەگىن جيناۋ ناۋقانىن قارجىلىق جانە ماتەريالدىق-تەحنيكالىق قامتاماسىز ەتۋ بويىنشا بارلىق شارالار قابىلدانعانىن اتاپ ءوتتى. بيىل اۋا رايىنىڭ قولايسىزدىعىنا بايلانىستى جەتەكشى استىق ءوندىرۋشى ەلدەردە بيداي ونىمدىلىگىنىڭ تومەندەۋى بولجانۋدا. بولجام بويىنشا قازاقستاندا ءداندى داقىلداردىڭ جەتكىلىكتى كولەمى جينالادى. سونىمەن قاتار 6,5-7 ملن تونناعا جۋىق ەكسپورتتىق الەۋەت ساقتالادى. ۇكىمەت باسشىسى ەگىن جيناۋ ناۋقانىن ساپالى وتكىزىپ, ەلەۆاتورلاردىڭ ءونىمدى قابىلداۋ مەن ساقتاۋعا دايىندىعىن قامتاماسىز ەتۋ, استىق قابىلداۋ كاسىپورىندارىنىڭ ونى ساقتاۋ ءۇشىن ۋاقىتىلى قابىلداۋى قاجەت ەكەنىن اتاپ ءوتتى. ەنەرگەتيكا مينيسترلىگىنە ەگىن جيناۋ كەزىندە ججم-ءدى ۋاقىتىلى قامتاماسىز ەتۋ ماسەلەسىن تۇراقتى باقىلاۋدا ۇستاۋ تاپسىرىلدى.
