ەرەكشە مىندەتى بار ەمحانا
2007 جىلدان بەرى ەلوردا تۇرعىندارىنا قىزمەت كورسەتە باستاعان استانا قالاسى اكىمدىگىنىڭ №4 ەمحاناسى بۇگىندە مىڭداعان ادامنىڭ دەنساۋلىعىن ساقتاۋ جولىندا تىڭعىلىقتى جۇمىس اتقارىپ وتىرعان مەكەمە سانالادى.
![](https://astana-akshamy.kz/img/2017/11/IMG_4728.jpg)
دەنساۋلىق ساقتاۋ سالاسىنىڭ ۇزدىگى, تاجىريبەلى ءدارىگەر سەرىك شايمەردەنوۆ باسقاراتىن اتالمىش ەمحانادا بەسىكتەگى بالادان باستاپ, قارتايعان ارداگەر قاۋىمىنا العاشقى مەديتسينالىق-سانيتارلىق كومەك بەرۋ, اۋرۋدىڭ الدىن الۋعا باعىتتالعان دياگنوستيكالىق جانە ەمدەۋ قىزمەتتەرىن جۇرگىزۋ, تەگىن مەديتسينالىق كومەكتىڭ كەپىلدى كولەمى اياسىندا مامانداندىرىلعان ەم-دوم قىزمەتىن كورسەتۋ جۇزەگە اسىرىلىپ وتىر.
اتالمىش ەمحانادا ناۋقاس ادامداردى ەمدەۋ قىزمەتىنىڭ ساپاسىن كوتەرۋگە ەرەكشە تالاپ قويىلعان. استانا قالاسى اكىمدىگىنىڭ قولداۋىمەن قازىرگى زامانعى مەديتسينالىق قوندىرعىلارمەن, قۇرال-جابدىقتارمەن قامتاماسىز ەتىلگەن مەكەمەدە ناۋقاستارعا ساپالى قىزمەت كورسەتۋ ءۇشىن بارلىق جاعداي جاسالعان. ەمحانا ىشىندەگى كۇندىزگى ستاتسيونار قىزمەتىنە جۇگىنۋشىلەر قاتارىنىڭ جىلدان-جىلعا ارتا ءتۇسۋىن سول دارىگەرلەرگە دەگەن سەنىمنىڭ كورسەتكىشى دەۋگە بولادى.
مەديتسينالىق قىزمەت كورسەتۋ بويىنشا استانا تۇرعىندارىنىڭ جاقسى ءىلتيپاتىنا بولەنىپ وتىرعان ەمحانانىڭ ءبىر ايتارلىق ەرەكشەلىگى, مۇندا 2014 جىلدان بەرى ارداگەرلەر ءبولىمى جۇمىس ىستەيدى. استانا قالاسى اكىمىنىڭ تاپسىرماسى بويىنشا ۇلى وتان سوعىسىنا قاتىسۋشىلار مەن ولارعا تەڭەستىرىلگەن ازاماتتارعا ورتالىقتاندىرىلعان قىزمەت كورسەتۋ ماقساتىندا قۇرىلعان بولىمدە, شىن مانىندە, ەرەكشە ەمدەۋ قىزمەتىنە, مامانداندىرىلعان كومەككە مۇقتاج ادامدارعا ەم-دوم بەرىلىپ كەلەدى. ولاردىڭ قاتارىندا ۇلى وتان سوعىسىنا قاتىسقان ارداگەرلەر, جاۋىنگەر-ينتەرناتسيوناليستەر, چەرنوبىل اپاتى زاردابىن جويۋعا قاتىسۋشىلار, سەمەي يادرولىق پوليگونى قاسىرەتىن تارتۋشىلار, سوعىس كەزىندەگى تىل ەڭبەككەرلەرى, دەربەس زەينەتكەرلەر جانە باسقا دا جەڭىلدىك يەلەرى بار. ال مۇنداي كاتەگورياداعى ازاماتتارعا قىزمەت كورسەتۋ ايرىقشا جاۋاپكەرشىلىكتى جانە بىلىكتىلىكتى تالاپ ەتەتىنى ءسوزسىز. وسى تۇرعىدا 2500 ادامعا قىزمەت كورسەتىپ وتىرعان بولىمدەگى ماماندارعا ارداگەر قاۋىمنىڭ ايتار العىسى شەكسىز دەۋگە بولادى. ءبولىم مەڭگەرۋشىسى بولىپ وتىرعان بىلىكتى دارىگەر سۆەتلانا كورولكوۆا, اعا مەيىربيكە قىزمەتىن اتقاراتىن ءتاجىريبەلى مامان گۇلجاينات ابدەشەۆا, دارىگەرلەر گۇلنار بەيسەنباەۆا, گۇلسىم ماۋلەتباەۆا, دانيار ءابدىحاديروۆ, مەدبيكەلەر ايگەرىم ورمانوۆا, ءلاززات حاميدۋللينا, جانسايا سالىمگەرەەۆا, باقىتجامال يمانبەردى جانە باسقالارى ەكى ۋچاسكەنىڭ جۇمىسىن جۇيەلى ۇيلەستىرىپ, ناۋقاستارعا ساپالى قىزمەت كورسەتىپ كەلەدى.
– سوعىس ارداگەرلەرى مەن ۇكىمەت تاراپىنان جەڭىلدىكتەر بەرىلگەن باسقا دا ازاماتتارعا قىزمەت كورسەتىپ وتىرعان №4 قالالىق ەمحانا ۇجىمىنا ايتار العىسىمىز شەكسىز. مۇندا قاشان كەلسەك تە, ءدارىگەرلەرىمىز جىلى جۇزبەن قارسى الادى. قاجەت بولعان جاعدايدا كۇندىزگى ستاتسيوناردان دا ەم الامىز. ەمحانا باسشىسى سەرىك شايمەردەنوۆ تەك قانا ەمدەۋ شارالارىنا ماڭىز بەرىپ قويماي, وسىندا ەمدەلەتىن ارداگەر ۇرپاققا قۇرمەت ءبىلدىرۋ, سونداي-اق, باسقا دا مەملەكەتتىك جانە ۇلتتىق مەرەكەلەرگە ارنالعان شارالاردى ۇيىمداستىرادى. بۇل دا ەمدەلۋشىلەر ءۇشىن ۇلكەن الەۋمەتتىك قولداۋ دەسە بولادى, – دەيدى اۋعان سوعىسىنا قاتىسۋشى جاۋىنگەر-ينتەرناتسيوناليست سەمبەك قابيەۆ.
ءيا, ەمدەۋ قىزمەتىندە وسىنداي ەرەكشە مىندەتى بار ەمحاناعا كەلۋشىلەردىڭ كوڭىل كۇيى كوپ نارسەنى اڭعارتادى. بۇل رەتتە №4 ەمحانانىڭ قالا تۇرعىندارى تاراپىنان جاقسى سوزگە, يگى قۇرمەتكە بولەنىپ جۇرگەنىن تاعى دا قايتالاپ ايتقىمىز كەلەدى. ەمحانا ۇجىمىنىڭ ساپالى قىزمەت كورسەتۋگە باعىتتالعان جۇمىسى جەمىستى بولا بەرگەي!
عالىم قوجابەكوۆ